ကိုးရီးယားစစ်ပွဲအကြောင်း တစေ့တစောင်း

 ခင်မမမျိုး

-------------------------------------------------------------------------------

Myanmar Institute of Peace and Security Studies (MIPSS)

စစ်ရေး နှင့် မဟာဗျူဟာ လေ့လာရေး စာစဉ် အမှတ် (၁)

စက်တင်ဘာလ၊ ၂၀၁၂ ခုနှစ်

ကိုးရီးယားစစ်ပွဲအကြောင်း တစေ့တစောင်း

22jan11 Korean War by Khin Ma Ma Myo

နိဒါန်း

ကမ္ဘာ့အရေးမှာရော၊ မြန်မာ့အရေးမှာပါ ကိုးရီးယားဆိုတဲ့ စကားလုံးကို လူပြောများကြပါတယ်။ ကိုးရီးယားလို့ ဆိုလိုက်ရင် တောင်ကိုးရီးယားနဲ့ မြောက်ကိုးရီးယား ဆိုပြီး နှစ်နိုင်ငံဖြစ်နေတာ လူအများက သိကြပါတယ်။ ဒါပေမယ့် ဘာကြောင့် နိုင်ငံနှစ်ခု ကွဲထွက်ရလဲဆိုတာကိုတော့ လူသိနည်းပါတယ်။ ဒါနဲ့ ပတ်သက်ပြီး လေ့လာဆန်းစစ်သူအများစုက နိုင်ငံရေး ခေါင်းဆောင်များရဲ့ ၀ါဒရေးရာ ဦးစားပေးမှု၊ စစ်အေးတိုက်ပွဲကာလ ပြည်ပအင်အားကြီးနိုင်ငံများရဲ့ ၀င်ရောက်ခြယ်လှယ်မှု စတာတွေကို ထောက်ပြ ပြောဆိုကြပေမယ့် အဲဒီခေတ်ကာလ ကိုးရီးယားနိုင်ငံရေး ခေါင်းဆောင်များရဲ့ နိုင်ငံရေး အမြော်အမြင်နဲ့ အမျိုးသား အကျိုးစီးပွားကို ရှေ့တန်းတင်ဆုံးဖြတ်ခြင်း အားနည်းချက်တွေကလဲ ကိုးရီးယားစစ်ပွဲကြီး ပေါ် ပေါက်လာရခြင်းရဲ့ အခြေခံအကြောင်းရင်းထဲမှာ ထိပ်ဆုံးကနေ ပါဝင်ကြောင်း စစ်ရေးလေ့လာသူတွေက ထောက်ပြဝေဖန်ထားကြပါတယ်။ အခုဒီစာတမ်းမှာ ကိုးရီးယား နိုင်ငံကြီးကို နှစ်ပေါင်းများစွာကြာအောင် တောင်နဲ့မြောက် နှစ်ခြမ်းကွဲစေခဲ့တဲ့ ကိုးရီးယားစစ်ပွဲ အကြောင်းကို ရေးသားတင်ပြပါမယ်။

ကမ္ဘာစစ်များမှသည် စစ်အေးတိုက်ပွဲဆီသို့

၂၀ ရာစု အစောပိုင်းကာလမှာ ကိုးရီးယားနိုင်ငံဟာ ဘုရင်စနစ်ကျင့်သုံးတဲ့ လွတ်လပ်သော နိုင်ငံတနိုင်ငံ ဖြစ်ပါတယ်။ ဒီအချိန်ကာလတွေတုန်းက ကမ္ဘာပေါ်မှာ တောင်ကိုးရီးယားနဲ့ မြောက်ကိုးရီးယားဆိုတာ မရှိခဲ့သေးပါဘူး။ Yi မင်းဆက်ကနေ ကိုးရီးယားနိုင်ငံကို နှစ်ပေါင်းငါးရာကျော်ကြာအောင် အုပ်ချုပ် ခဲ့ပါတယ်။ (၁၉၁၀) ခုနှစ်ရောက်တော့ အင်အားကြီး အိမ်နီးချင်းနိုင်ငံဖြစ်တဲ့ ဂျပန်နိုင်ငံက ကိုးရီးယားနိုင်ငံကို ကျူးကျော်သိမ်းပိုက်ခဲ့ပါတယ်။ ဂျပန်တွေက ကိုးရီးယားနိုင်ငံငယ် တခုအဖြစ် အုပ်ချုပ်ခဲ့ပြီး ကိုးရီးယားလူမျိုးတွေရဲ့ အမျိုးသားရေး လက္ခဏာတွေကို ပျောက်ပြက်သွားအောင် ကြိုးပမ်းခဲ့ပါတယ်။ စီးပွားရေး၊ အစိုးရနဲ့ အဆင့်မြင့် ပညာရေးနယ်ပယ်တွေမှာ ဂျပန်ဘာသာစကားကို အသုံးပြုခဲ့ပါတယ်။

(၁၉၃၀) နှောင်းပိုင်းကာလရောက်တော့ ဂျပန်က အာရှတိုက်မှာ အင်ပါယာတိုးချဲ့ခဲ့ပါတယ်။ ဂျပန် တပ်မတော်ဟာ မန်ချူးရီးယားကို သိမ်းပိုက်ပြီး ကိုးရီးယားမြောက်ပိုင်းနယ်စပ်ဒေသကနေ တရုတ်ပြည်ကို သိမ်းပိုက်ဖို့ ကြိုးစားရာကနေ ၁၉၃၇ ခုနှစ်မှာ တရုတ်-ဂျပန်စစ်ပွဲကြီး စတင်လာပါတော့တယ်။ ဂျပန်တွေရဲ့ အင်ပါယာချဲ့ထွင်လာမှုဟာ တရုတ်ခေါင်းဆောင် ချန်ကေရှိတ်ကို ကျောထောက်နောက်ခံ ပေးထားတဲ့ အမေရိကန်နဲ့ပါ ထိပ်တိုက်ရင်ဆိုင်ရတဲ့ အခြေအနေကို ဦးတည်လာပါတယ်။ ၁၉၄၁၊ ဒီဇင်ဘာမှာ ဂျပန်က ပုလဲဆိပ်ကမ်းကို ဗုံးကြဲပြီး အမေရိကန်ကို စစ်ကြေညာရာကနေ ပစိဖိတ်စစ်မျက်နှာမှာ ဒုတိယ ကမ္ဘာစစ်ကြီး စတင်လာပါတော့တယ်။ ကနဦးအစမှာ ဂျပန်တွေဘက်ကနေ စစ်ရေးအရ အောင်ပွဲတွေ ရခဲ့ပေမယ့် စစ်ရေးဒီရေ အပြောင်းအလဲတွေ ဖြစ်ပေါ်လာခဲ့ပြီး (၁၉၄၅) ခုနှစ်မှာ ဖက်ဆစ်ဂျပန်က လက်နက်ချခဲ့ရပါတယ်။

ဒုတိယကမ္ဘာစစ်ပွဲကာလ (၁၉၃၉) ခုနှစ်ကနေ (၁၉၄၁) ခုနှစ်အတွင်းမှာ ဆိုဗီယက်ယူနီယံက မန်ချူးရီးယားနယ်စပ် စစ်မျက်နှာမှာ ဂျပန်ကို တိုက်ပွဲဝင်ခဲ့ပါတယ်။ ဒါပေမယ့် နောက်ပိုင်းမှာ နိုင်ငံနှစ်ခု အကြား ကြားနေစာချုပ် ချုပ်ဆိုပြီး ဂျပန်နဲ့ဆိုဗီယက်တို့အကြားက စစ်ပွဲတွေ ရပ်တန့်သွားခဲ့ပါတယ်။ အမေရိကန်ပြည်ထောင်စုက ဂျပန်နိုင်ငံ ဟီရိုရှီးမားကို အနုမြူဗုံးကြဲပြီး နောက်နှစ်ရက်အကြာမှသာ ဆိုဗီယက်ယူနီယံက ဂျပန်ကို စစ်ကြေညာခဲ့တာပါ။ ဂျပန်လက်နက်ချတဲ့ အချိန်ကျတော့ ဆိုဗီယက်ယူနီယံက မန်ချုးရီးယားကို ၀င်ရောက်သိမ်းပိုက်ပြီး ကိုးရီးယားမြောက်ပိုင်းဒေသအထိ ခြေကုပ်ယူတပ်စွဲခဲ့ပါတယ်။

ဂျပန်လက်နက်မချမီ ရက်ပိုင်းအလိုပါပဲ အမေရိကန် အစိုးရထိပ်ပိုင်းဆိုင်ရာ အရာရှိများအကြားမှာလဲ ကိုးရီးယားသိမ်းပိုက်ရေး စီမံချက်နဲ့ပတ်သက်ပြီး ပြန်လည်ပြုပြင် ညှိနှိုင်းစရာတွေ ပေါ်ထွက်လာခဲ့ပါတယ်။ အမေရိကန်သမ္မတ ထရူးမင်းရဲ့ စစ်ရေးအကြံပေးများက ကိုးရီးယားကို ဇုန်နှစ်ခု ခွဲခြားသိမ်းပိုက်ဖို့ အကြံပြုကြပါတယ်။ ကိုးရီးယား ပထ၀ီဝင်အနေအထားအရ ၃၈ မျဉ်းပြိုင်ရဲ့ မြောက်ပိုင်းကို ဆိုဗီယက် တပ်များက သိမ်းပိုက်ဖို့နဲ့ တောင်ပိုင်းဒေသကို အမေရိကန်တပ်များက သိမ်းပိုက်ဖို့ ဖြစ်ပါတယ်။ ဆိုဗီယက်ခေါင်းဆောင် စတာလင်က ဒီစီမံချက်ကို လက်ခံခဲ့ပါတယ်။ တမုဟုတ်ချင်းပဲ စတာလင်ရဲ့ အမိန့်နဲ့ General Ivan Chistiakov ရဲ့ တပ်တွေမှာ ကိုးရီးယားမြောက်ပိုင်းဒေသမှာ ဖြန့်ကျက်ပြီး နယ်မြေစိုးမိုးရေး ပြု လုပ်ခဲ့ပါတယ်။ များမကြာမီမှာပဲ အမေရိကန်တပ်တွေကနေ ကိုးရီးယားတောင်ပိုင်းကို သိမ်းပိုက်ခြေကုပ်ယူခဲ့ပါတယ်။ အမေရိကန်တပ် အကြီးအကဲကတော့ General John Hodge ဖြစ်ပါတယ်။

( ၃၈ မျဉ်းပြိုင်ဆိုတာ မြေပုံပေါ်မှာ ဆွဲထားတဲ့ လိုင်းတခုပဲ ဖြစ်ပါတယ်။ နိုင်ငံရဲ့ လမ်းပန်း ဆက်သွယ်ရေးအတွက် အရေးပါတဲ့ လမ်းမကြီးတွေနဲ့ ရထားလမ်းတွေကို ဖြတ်တောက်ထားပါတယ်)

ဒုတိယကမ္ဘာစစ်မပြီးခင်ကတည်းက ဆိုဗီယက်ယူနီယံနဲ့ အမေရိကန်တို့က ဂျပန်ကိုဖယ်ရှားပြီးတဲ့အခါ ကိုးရီးယားကို ကိုယ်ပိုင်အုပ်ချုပ်ခွင့်မပေးဖို့ သဘောတူထားခဲ့ကြပါတယ်။ အမေရိကန်ပြည်ထောင်စုက ကိုးရီးယားနိုင်ငံ လွတ်လပ်ရေး မရခင်မှာ ပြည်ပဦးဆောင်မှုအောက်မှာ ကာလအတိုင်းအတာတခု အထိနေဖို့ ကိုးရီးယားနိုင်ငံရေး ခေါင်းဆောင်တွေကို အကြံပြုပါတယ်။ ဒါပေမယ့် ကိုးရီးယား ပြည်သူ လူထုကတော့ ဂျပန်ကို အောင်ပွဲရပြီးတာနဲ့ ကိုးရီးယားနိုင်ငံ လွတ်လပ်ရေးရဖို့ မျှော်မှန်း ခဲ့ကြပါတယ်။ ကိုးရီးယားပြည်တွင်းမှာ အခြေစိုက်တဲ့ နိုင်ငံရေးအုပ်စုများက အမေရိကန် တပ်တွေ ကိုးရီးယားနိုင်ငံထဲကို စရောက်ချိန်မှာပဲ လွတ်လပ်သော ကိုးရီးယားပြည်သူ့သမ္မတနိုင်ငံ တည်ထောင်ကြောင်း ကြေညာ ခဲ့ကြပါတယ်။ ဂျပန်ကို တော်လှန်ခဲ့ကြတဲ့ ပြည်တွင်းအခြေစိုက် နိုင်ငံရေး အုပ်စုတွေဟာ နိုင်ငံအနှံ့မှာ ပြည်သူ့ကော်မတီတွေ တည်ထောင်ပြီး အစိုးရအနေနဲ့ အစားထိုးဖို့ ကြိုးပမ်းခဲ့ကြပါတယ်။ ဒီလိုလှုပ်ရှားမှုတွေကို အမေရိကန်နဲ့ ဆိုဗီယက်ပြည်ထောင်စုတို့က မနှစ်မြို့ခဲ့ ပါဘူး။ ကိုးရီးယားနိုင်ငံတော်သစ်ကို ကိုးရီးယားပြည်သူတွေရဲ့ ဖန်တီးခွင့်ကို ပေးအပ်လိုခြင်း မရှိပါဘူး။ ကိုးရီးယားနိုင်ငံကို တောင်မြောက်နှစ်ခြမ်းခွဲပြီး သိမ်းပိုက်ခံနယ်မြေများအဖြစ် ကာလအတန်ကြာ ဆက်ထားလိုပါတယ်။ နောက်ဆုံး သိမ်းပိုက်ခံနယ်မြေများအဖြစ် မထားနိုင်ရင်တောင် သူတို့ရဲ့ သြဇာခံ များကိုသာ ကိုးရီးယားနိုင်ငံခေါင်းဆောင်အဖြစ် တင်မြှောက်လိုကြပါတယ်။ ဒီနေရာမှာ ပြည်ပကို ရောက်နေတဲ့ ကိုးရီးယားနိုင်ငံရေးသမားများရဲ့ အခန်းကဏ္ဍက အရေးပါလာပါတယ်။

ဂျပန်တွေရဲ့ ဖိနှိပ်အုပ်ချုပ်မှုတွေကို တော်လှန်ရင်း အကြောင်းအမျိုးမျိုးနဲ့ ဆိုဗီယက်ယူနီယံ၊ တရုတ်နဲ့ အမေရိကန်နိုင်ငံတွေကို ရောက်နေတဲ့ ကိုးရီးယားနိုင်ငံရေးသမားတွေ အများအပြား ရှိပါတယ်။ အင်အားကြီး နိုင်ငံတွေဟာ သူတို့ရဲ့ သြဇာခံနိုင်ငံရေးသမားတွေကို ရွေးချယ်တဲ့အခါ ပြည်တွင်းမှာထက် ပြည်ပရောက် နိုင်ငံရေးသမားများထဲက ရွေးချယ်ပြီး စင်တင်ပေးလေ့ရှိပါတယ်။ ကိုးရီးယားနိုင်ငံရေး စာမျက်နှာမှာလဲ ဒီအတိုင်းပါပဲ။ ပြည်ပအခြေစိုက် နိုင်ငံရေးသမားတွေ ကိုးရီးယား နိုင်ငံကို ပြန်ဝင်လာတဲ့ အခါမှာ အမေရိကန်ပြည်ထောင်စုမှာ ၂၅ နှစ်ကြာနေထိုင်ခဲ့တဲ့ အသက် ခုနစ်ဆယ်အရွယ် nationalist တဦးဖြစ်တဲ့ Syngman Rhee ကို အမေရိကန်က ကြိုဆိုခဲ့သလို မန်ချူးရီးယားစစ်မျက်နှာမှာ ဂျပန်ကို တော်လှန်ပြီး နောက်ပိုင်း ဒုတိယကမ္ဘာစစ်ကာလတလျှောက် ဆိုဗီယက်ပြည်မှာ နေထိုင်ခဲ့တဲ့ communist တဦးဖြစ်တဲ့ Kim II Sung ကိုလဲ ဆိုဗီယက်က ပံ့ပိုးပေးလာပါတယ်။ ဒီလိုနဲ့ အမေရိကန်နဲ့ ဆိုဗီယက်တို့ရဲ့ သိမ်းပိုက်ခံ နယ်မြေဘ၀မှာ ဒီနှစ်နိုင်ငံရဲ့ ဆက်ဆံရေးတွေ ယိုယွင်းလာတာနဲ့အမျှ ကိုးရီးယားတောင်ပိုင်း မြောက်ပိုင်း ညီညွတ်ရေး လမ်းစကလဲ တစတစနဲ့ ပျောက်ကွယ်လာပါတယ်။

(၁၉၄၇) ခုနှစ်မှာ ကွန်မြူနစ်ဝါဒ တကမ္ဘာလုံး ပျံ့နှံ့သွားရေးကို တားဆီးမယ့် အမေရိကန်နိုင်ငံခြားရေး မူဝါဒတွေ ပါဝင်တဲ့ Truman Doctrine ထွက်ပေါ်လာပါတယ်။ ၁၉၄၉ ခုနှစ်ရောက်တော့ အမေရိကန်နဲ့ ဆိုဗီယက်ပြည်ထောင်စုတို့က ပွင့်ပွင့်လင်းလင်း ရန်သူတွေဘ၀ကို ရောက်နေပါပြီ။ စစ်အေးတိုက်ပွဲကြီး ကလဲ စတင်နေပါပြီ။ ကိုးရီးယား နယ်မြေနှစ်ခု ပေါင်းစီး ရေးအတွက် သဘောတူညီမှုက မရခဲ့ကြပါဘူး။

ကိုးရီးယားစစ်ပွဲအကြောင်း တစေ့တစောင်း

မြောက်ပိုင်းဒေသမှာ ဆိုဗီယက်ယူနီယံက သူစိတ်တိုင်းကျ ဆိုဗီယက်စတိုင် အစိုးရကို ဖန်တီးပါတယ်။ ပါဝါကို မြောက်ကိုးရီးယား ကွန်မြူနစ်အလုပ်သမားပါတီရဲ့ လက်ထဲမှာထားပြီး၊ အရေးပါတဲ့ အစိုးရ နေရာများကို ဆိုဗီယက်ပြည်ထောင်စုအတွင်းမှာ နေထိုင်ခဲ့ဖူးတဲ့ ကိုးရီးယားနိုင်ငံရေးသမားများကို နေရာပေးထားပါတယ်။ ၁၉၄၈ ခုနှစ်မှာ ဆိုဗီယက်တပ်တွေ ၃၈ မျဉ်းပြိုင်မြောက်ပိုင်း သိမ်းပိုက်ဇုန်ကနေ ထွက်ခွာတော့ ဒီနယ်မြေက ကိုးရီးယားဒီမိုကရက်တစ် ပြည်သူ့သမ္မတနိုင်ငံ ဖြစ်လာခဲ့ပါတယ်။ မြောက်ကိုးရီးယားလို့ လူအများသိကြတဲ့ ကိုးရီးယား ဒီမိုကရက်တစ် ပြည်သူ့သမ္မတနိုင်ငံမှာ Kim II Sung က သမ္မတဖြစ်လာခဲ့ပါတယ်။

၃၈ မျဉ်းပြိုင်ရဲ့ တောင်ပိုင်း အမေရိကန်သိမ်းပိုက်ခံနယ်မြေမှာတော့ နိုင်ငံရေးအသွင်ကူးပြောင်းမှုက ချောချောမွေ့မွေ့ မရှိခဲ့ပါဘူး။ ကိုးရီးယားနိုင်ငံတော်သစ်ကို တည်ထောင်ပြီး လွတ်လပ်ရေးကြေညာဖို့ လုပ်ခဲ့တဲ့ ပြည်သူ့ကော်မတီတွေကို ကွန်မြူနစ်အမာခံအဖွဲ့တွေဆိုပြီး အမေရိကန် အုပ်ချုပ်ရေး တာဝန် ရှိသူတွေက ဖိနှိပ်ခဲ့ကြပါတယ်။ ကမ္ဘာစစ်မတိုင်ခင်က ဂျပန် အင်ပါယာအတွက် အလုပ်လုပ်ပေးခဲ့တဲ့ ဖက်ဆစ်လက်ကိုင်ဒုတ် ရဲအရာရှိတွေနဲ့ ဗြူရိုကရက်တွေကို အသုံးချပြီး အမေရိကန်သြဇာခံ နိုင်ငံရေး သမားတွေကို ဆန့်ကျင်တဲ့ နိုင်ငံရေးအဖွဲ့တွေကို ချေမှုန်းသုတ်သင်မှုတွေ ရှိလာပါတယ်။ တောင်ကိုး ရီးယားရဲ့ အဲဒီအချိန်ကာလ နိုင်ငံရေးအခြေအနေဟာ ရုန်းရင်းဆန်ခတ်ဖြစ်မှုတွေ၊ လုပ်ကြံသတ်ဖြတ် မှုတွေ၊ ဖမ်းဆီးနှိပ် စက်မှုတွေနဲ့ ပြည့်နှက်နေခဲ့ပါတယ်။

၁၉၄၈ ရောက်တော့ ကုလသမဂ္ဂက ကြီးကြပ်ပြီး၊ အမေရိကန်ရုပ်သေး နိုင်ငံရေးခေါင်းဆောင် Syngman Rhee အနိုင်ရစေဖို့ အမေရိကန်အုပ်ချုပ်ရေး တာဝန်ရှိသူတွေက ဖန်တီးထားတဲ့ ရွေးကောက်ပွဲ ထွက်ပေါ်လာပါတယ်။ ရွေးကောက်ပွဲပြီးတော့ တောင်ကိုးရီးယားလို့ လူအများသိထားတဲ့ ကိုးရီးယား သမ္မတနိုင်ငံမှာ Syngman Rhee က သမ္မတဖြစ်လာခဲ့ပါ တယ်။

သူအာဏာရပြီး မကြာခင်မှာပဲ Cheju-do ဆိုတဲ့ ကျွန်းမှာ ပုန်ကန်မှုတွေ ပေါ်ပေါက်လာပြီး ကိုးရီးယားပြည်မအထိ ပြန့်နှံ့သွားပါတယ်။ Anti-Rhee သူပုန်တွေကို မြောက်ကိုးရီးယားက ကူညီ ထောက်ပံ့ပေးပါတယ်။ ဒီပုန်ကန်မှုကို Syngman Rhee က အမေရိကန်စစ်ရေး အကြံပေးတွေနဲ့ အကူအညီနဲ့ ပြင်းပြင်းထန်ထန် နှိမ်နင်းခဲ့ပါတယ်။ ဒီနှိမ်နင်းမှုမှာ ထောင်ပေါင်းများစွာသော တောင်ကိုးရီးယား ပြည်သူတွေရဲ့ အသက်တွေ ဆုံးရှုံးခဲ့ရပါတယ်။

တောင်ကိုးရီးယားနဲ့ မြောက်ကိုးရီးယားခေါင်းဆောင်များဟာ ကိုးရီးယားတနိုင်ငံလုံးကို အုပ်ချုပ်ခွင့်ရဖို့ အသည်းအသန် ကြိုးပမ်းခဲ့ကြပါတယ်။ (၁၉၄၉) ခုနှစ် နွေရာသီမှာ ၃၈ မျဉ်းပြိုင်တလျှောက်မှာရှိတဲ့ နှစ်ဘက်စစ်တပ်တွေအကြား ပစ်ခတ်မှုတွေ စတင်လာပါတယ်။ လေ့လာသူတွေရဲ့ အဆိုအရ (၁၉၅၀) ခုနှစ် ဇွန်လအထိမှာ ပုန်ကန်မှုတွေနဲ့ နယ်စပ်တိုက်ပွဲတွေမှာ သေဆုံးခဲ့တဲ့ ကိုးရီးယားလူမျိုး တသိန်းကျော် ရှိခဲ့ပါတယ်။ ဒီလို ပြည်တွင်းစစ်တွေနဲ့ အစပျိုးပြီး နောက်ပိုင်းမှာ လူအများအခေါ်အရ ကိုးရီးယားစစ်ပွဲ၊ စစ်ရေးလေ့လာသူတွေ အခေါ်အရ အင်အားကြီးနိုင်ငံတွေအကြားက proxy war တခု ဖြစ်ခဲ့တဲ့ စစ်ပွဲကြီးတခု စတင်ဖို့ အချိန်က တစတစ နီးကပ်လာပါတော့တယ်။ နှစ်ဘက်စလုံးက ခေါင်းဆောင် တွေဟာ ၃၈မျဉ်းပြိုင်ကို ကျော်ပြီး တနိုင်ငံနဲ့ တနိုင်ငံ သိမ်းပိုက်ဖို့ ကြံရွယ်လာကြပါတယ်။ ဒါပေမယ့် ရုပ်သေးကြိုးဆွဲနိုင်ငံကြီးနှစ်နိုင်ငံဖြစ်တဲ့ အမေရိကန်နဲ့ ဆိုဗီယက်ယူနီယံတို့က မီးစိမ်းမပြခဲ့ပါဘူး။

ဒီနေရာမှာ တတိယဇာတ်ကောင်အဖြစ် ၀င်လာခဲ့တာကတော့ တရုတ်ပြည်သူ့သမ္မတနိုင်ငံပဲ ဖြစ်ပါတယ်။ အဲဒီအချိန်ကာလက အမေရိကန်ပြည်ထောင်စုဟာ ဆိုဗီယက်ယူနီယံနဲ့ တိုက်ရိုက်ဖြစ်ပွားမယ့် စစ်ကို ဦးတည်စေတဲ့ စစ်ရေးကျူးကျော်မှုတွေ ပြုလုပ်ဖို့ ဆန္ဒမရှိသေးပါဘူး။ အမေရိကန် ထောက်လှမ်းရေး အရာရှိတွေက Syngman Rhee ရဲ့ အမျိုးသားရေး ၀ါဒကို သံသယရှိနေခဲ့ပါတယ်။ တပြိုင်နက် တည်းမှာပဲ စတာလင်ကလဲ အမေရိကန်နဲ့ ထိပ်တိုက်ရင်ဆိုင်မှု မပြုလုပ်လိုသေးပါဘူး။ မြောက်ကိုးရီးယား ခေါင်းဆောင် Kim II Sung ရဲ့ တောင်ကိုးရီးယားကို သိမ်းပိုက်နိုင်မယ့် အရည်အချင်းကိုလဲ မယုံကြည် ကြပါဘူး။ မြောက်ကိုးရီးယားက တောင်ကိုးရီးယားကို ကျူးကျော်လိုက်ရင် အမေရိကန်တပ်တွေ တောင်ကိုးရီးယားမြေပေါ်ကို ပြန်ရောက်လာမှာကို စိုးရိမ်ကြပါတယ်။ ဒါကြောင့် နှစ်ဘက်စလုံးက မီးစိမ်း မပြခဲ့ကြတာပါ။

ကိုးရီးယားစစ်ပွဲအကြောင်း တစေ့တစောင်း

ဒါပေမယ့် (၁၉၄၉) ခုနှစ်၊ အောက်တိုဘာလမှာ ကမ္ဘာ့နိုင်ငံရေးအခြေအနေက စတင်ပြောင်းလဲ လာပါတော့တယ်။ အဲဒီအချိန်မှာ တရုတ်နိုင်ငံအတွင်းမှာ ပြည်တွင်းစစ်အဆုံးသတ်သွားပါတယ်။ တရုတ်ကွန်မြူနစ်ပါတီခေါင်းဆောင် မော်စီတုန်းရဲ့ တပ်တွေဟာ ကူမင်တန် ချန်ကေရှိတ်တပ်တွေကို အနိုင်ရရှိပြီး တရုတ်ပြည်သူ့သမ္မတနိုင်ငံ ပေါ်ထွက်လာပါတော့တယ်။ ကူမင်တန်တပ်တွေက တရုတ်ပြည် အရှေ့ပိုင်း (၁၂၅) မိုင်အကွာမှာရှိတဲ့ မော်မိုဆာကျွန်း (ထိုင်ဝမ်) မှာ သွားပြီး တပ်စွဲကြပါတယ်။ (၁၉၅၀) ခုနှစ်၊ ဖေဖော်ဝါရီလကျတော့ မော်စီတုန်းက ဆိုဗီယက်ယူနီယံနဲ့ မဟာမိတ်စာချုပ်မှာ လက်မှတ်ရေး ထိုးခဲ့ပါတယ်။

ဒီလိုနဲ့ တရုတ်ပြည်က ကွန်မြူနစ်တွေရဲ့ အောင်ပွဲဟာ အမေရိကန်အစိုးရ ခေါင်းဆောင်တွေကို အာရှ အရှေ့ပိုင်းကို အာရုံစိုက်လာစေခဲ့ပါတော့တယ်။ တပြိုင်နက်တည်းမှာပဲ စတာလင်ရဲ့ ကိုးရီးယားအပေါ် ထားရှိတဲ့အမြင်ကိုလဲ ပြောင်းလဲစေခဲ့ပါတယ်။ (၁၉၅၀) ခုနှစ်၊ ဇန်န၀ါရီလမှာ Kim II Sung တောင်းဆို ထားတဲ့ စစ်လက်နက်ပစ္စည်းတွေကို စတာလင်က တင်သွင်းပေးခဲ့ပါတယ်။ ဧပြီလ ရောက်တော့ တရုတ်က အကူအညီပေးမယ်ဆိုရင် တောင်ကိုးရီးယားကို ၀င်တိုက်လို့ရကြောင်း ဆိုဗီယက်တွေက Kim II Sung ကို ပြောကြားခဲ့ပါတယ်။ မေလမှာ မော်စီတုန်းက Kim II Sung ရဲ့ စစ်ရေး စီမံချက်ကို လက်ခံ ခဲ့ပြီး လိုအပ်တဲ့ စစ်ရေးအထောက်အပံ့တွေ ပေးဖို့ သဘောတူညီခဲ့ပါတယ်။ ကိုးရီးယား စစ်ပွဲကြီး စတင်ဖို့ လမ်းတွေကတော့ ပွင့်သွားခဲ့ပါပြီ။

မြောက်ကိုးရီးယားက တောင်ကိုးရီးယားကို စတင်တိုက်ခိုက်ပြီ

ကိုးရီးယားစစ်ပွဲကြီး စတင်ခဲ့တဲ့ အချိန်ဟာ (၁၉၅၀) ခု၊ ဇွန်လ (၂၅) ရက်၊ နံနက်လေးနာရီအချိန်မှာပါ။ တောင်ကိုးရီးယား အနောက်ကမ်းရိုးတန်းဒေသက Ongjin ကျွန်းဆွယ်ကို မြောက်ကိုးရီးယား ပြည်သူ့ တပ်မတော်က လက်နက်ကြီး အကူအညီသုံးပြီး စတင်တိုက်ခိုက်ပါတော့တယ်။ စစ်စတင်ပြီး မကြာခင် အချိန်မှာပဲ ဒီသတင်းဟာ ၃၈ မျဉ်းပြိုင်တလျှောက် အရှေ့ဘက် မိုင် ၂၀၀ ကျော်ကို ပျံ့နှံ့သွားပါတယ်။ ၃၈ မျဉ်းပြိုင်ဆိုတာကလဲ ကာကွယ်ရေးရှုထောင့်အရ အချက်အချာကျတဲ့ နယ်စပ်မျဉ်း မဟုတ်ပါဘူး။

မြစ်ချောင်းအတားအဆီးနဲ့ တောင်တန်းအတားအဆီးတွေ မရှိပါဘူး။ အဲဒီအချိန်မှာ တောင်ကိုးရီးယား စစ်တပ်အရာရှိတွေနဲ့ သူတို့အားကိုးတဲ့ အမေရိကန်စစ်ဘက် အကြံပေးတွေက ခွင့်ယူထားချိန် ဖြစ်တာကြောင့် နာရီပိုင်းအတွင်းမှာတင် Kaesong ကို မြောက်ကိုးရီးယား တပ်တွေက သိမ်းပိုက်နိုင် ခဲ့ပါတယ်။ Churchon ဘက်မှာ ခုခံမှု အနည်းငယ် ကြုံတွေ့ရပေမယ့် မြောက်ကိုးရီးယားတပ်တွေကပဲ အနိုင်ရခဲ့ပါတယ်။

စာရွက်ပေါ်က ဂဏာန်းတွေကိုပဲ ကြည့်မယ်ဆိုရင် မြောက်ကိုးရီးယားနဲ့ တောင်ကိုးရီးယား တပ်သားအရေအတွက်က အတူတူပဲ ဖြစ်ပါတယ်။ စစ်အင်အား ကိုးသောင်းခွဲဆီရှိခဲ့ကြပါတယ်။ ဒါပေမယ့် မြောက်ကိုးရီးယား တပ်မတော်မှာက တရုတ်ပြည်တွင်းစစ်မှာ ကွန်မြူနစ်တွေဘက်ကနေ ၀င်တိုက် ပေးခဲ့ပြီး စစ်သက်အတွေ့အကြုံရှိတဲ့ တပ်သားတွေနဲ့ အရာရှိတွေ ပါဝင်နေခဲ့ပါတယ်။ တချို့ကကျတော့ ဆိုဗီယက်တပ်နီတော်မှာ အမှုထမ်းခဲ့သူတွေပါ။ ဒုတိယကမ္ဘာစစ်အတွင်းက ဆိုဗီယက် စစ်လက်နက် ပစ္စည်းတွေဖြစ်တဲ့ T-34 တင့်ကားတွေ အပါအ၀င် လက်နက်အင်အားကလဲ တောင့်တင်းခဲ့ပါတယ်။ တောင်ကိုးရီးယားစစ်တပ်ဘက်မှာကျတော့ အစိုးရက အမေရိကန် ရုပ်သေးအစိုးရ ဖြစ်နေပြီး၊ အမေရိကန် ကိုပဲ အုပ်ချုပ်ရေး၊ စစ်ရေး၊ သူပုန်နှိမ်နင်းရေးတွေမှာ အားကိုးနေရတာ ဖြစ်နေတဲ့အတွက် စစ်သက် အတွေ့အကြုံကလဲ နည်းပြီး လေ့ကျင့်သင်ကြားပေးမှုကလဲ အခြေအနေနဲ့ မကိုက်ညီသေးပါဘူး။

ဒါကြောင့် မြောက်ကိုးရီးယားက တောင်ကိုးရီးယားကို ကျူးကျော်ပြီး သုံးရက်အတွင်းမှာပဲ တောင်ကိုးရီးယားရဲ့ ဆိုးလ်မြို့တော်ကို သိမ်းပိုက်နိုင်ခဲ့ပါတယ်။ မြို့ရဲ့တောင်ပိုင်းကို ရှင်းလင်းရေး လုပ်နေတုန်းမှာတင် ဆုတ်ခွာသွားတဲ့ တောင်ကိုးရီးယားတပ်တွေဟာ ကြောက်လန့်တကြားဖြစ်ပြီး ဟန်မြစ်ပေါ်က တံတားတွေကို ချိုးဖျက်လိုက်တာကြောင်း တံတားတွေပေါ်မှာ ရှိနေဆဲဖြစ်တဲ့ ရာပေါင်း များစွာသော အရပ်သားပြည်သူတွေ သေဆုံးသွားခဲ့ပါတယ်။ သူတို့လိုအပ်မယ့် ရိက္ခာ ထောက်ပံ့ရေးနဲ့ စစ်လက်နက် အကူအညီလမ်းကြောင်းတွေကို ကိုယ်တိုင်ဖျက်ဆီးလိုက်သလို ဖြစ်သွားခဲ့ပါတယ်။

(မြောက်ကိုးရီးယားက တောင်ကိုးရီးယားကို ၁၉၅၀ ခုနှစ်၊ ဇွန်လ ၂၅ ရက်နေ့မှာ ကျူးကျော်ခဲ့ပြီး

သုံးရက်အတွင်းမှာ တောင်ကိုးရီးယား မြို့တော် ဆိုးလ်ကို သိမ်းပိုက်နိုင်ခဲ့ပါတယ်)

စစ်ပွဲတခုရဲ့ တရားမျှတမှု ရှုထောင့်ကနေ ကြည့်ရင်တော့ ဒီပွဲက ပြီးဆုံးသွားပါပြီ။ မြောက်ကိုးရီးယား တပ်တွေက ပြည်ပ လက်နက်အကူအညီ ယူထားပေမယ့် တိုက်ပွဲကို သူတို့ကိုယ်တိုင်ပဲ ဆင်နွှဲခဲ့တာပါ။ တောင်ကိုးရီးယား တပ်တွေကလဲ အမေရိကန်ရဲ့ လက်နက်အကူအညီ တင်သာမက စစ်ရေး အကြံပေးမှုတွေကိုပါ ယူထားပြီး ခုခံတိုက်ပွဲဝင်ခဲ့တာပါပဲ။ ဒီတိုက်ပွဲမှာ မြောက်ကိုးရီးယား စစ်တပ်က အနိုင်ရသွားခဲ့ပါတယ်။ ကိုးရီးယားတနိုင်ငံလုံးကို ကွန်မြူနစ်စနစ်နဲ့ အုပ်ချုပ်ဖို့ Kim II Sung ရဲ့ မျှော်မှန်းချက်တွေ ပြည့်ဝသွားပြီလို့ ဆိုနိုင်ပါတယ်။

ဒါပေမယ့် သူတို့ရဲ့ ရုပ်သေးသြဇာခံ အစိုးရ အုပ်ချုပ်နေတဲ့ တောင်ကိုးရီးယားဒေသရဲ့ စစ်တပ်တွေ စစ်ရှုံးတာကို အမေရိကန်နဲ့ မဟာမိတ်တွေက မနှစ်မြို့ခဲ့ကြပါဘူး။ ဗြိတိသျှဝန်ကြီးချုပ် အက်တလီက naked aggression လို့ ကြွေးကြော်ခဲ့ပါတယ်။ အမေရိကန်ကလဲ သူ့သြဇာခံနိုင်ငံဘက်ကနေ ၀င်ရောက် ကူညီပေးဖို့ စတင်ကြိုးပမ်းလာပါတော့တယ်။ အဲဒီအချိန်ကာလတုန်းက အမေရိကန်ရဲ့ ရုပ်သေးအဆင့် လောက်သာရှိသေးတဲ့ ကုလသမဂ္ဂ လုံခြုံရေးကောင်စီကလဲ အမေရိကန်ရဲ့ စစ်ရေးအရ ၀င်ရောက် စွက်ဖက်မှုကို legitimate ဖြစ်အောင် ပြုလုပ်ပေးပါတယ်။ ကမ္ဘာ့ငြိမ်းချမ်းရေးနဲ့ လုံခြုံရေး အတွက် ကုလသမဂ္ဂအဖွဲ့ဝင် နိုင်ငံအားလုံးက တောင်ကိုးရီးယားကို လိုအပ်တဲ့ ကူညီထောက်ပံ့မှု ပေးရမယ်လို့ ယူအက်လုံခြုံရေးကောင်စီက ကြေညာပါတော့တယ်။

ဒီတုန်းက ဒုတိယကမ္ဘာစစ်ကြီးပြီးစ၊ စစ်အေးတိုက်ပွဲ စကာစအချိန်မှာ တခါမှ မကွဲခဲ့ဖူးတဲ့ ကိုးရီးယား နိုင်ငံကို မြေပုံပေါ်မှာ တောင်နှင့်မြောက်ဖြစ်အောင် အမေရိကန်စစ်ဘက်အကြံပေးများက ခွဲခဲ့ပြီးမှ ကိုးရီးယား ပြည်သူအချင်းချင်း စစ်တိုက်ပြီး တဘက်မှ တဘက်ကို အနိုင်ရမှုဟာ ကမ္ဘာ့ ငြိမ်းချမ်းရေးကို ထိခိုက်သလား၊ မထိခိုက်သလား မသေချာပေမယ့် အမေရိကန်ရဲ့ ကွန်မြူနစ်နှိမ်နင်းရေး Truman Doctrine ကို အရှိုက်ထိသွားတာတော့ သေချာပါတယ်။

ဒီလိုနဲ့ ဇွန်လ ၂၇ ရက်နေ့မှာ ထွက်ပေါ်လာခဲ့တဲ့ UN Resolution ကို ကိုင်ပြီး အမေရိကန်က စတင်လှုပ်ရှားပါတော့တယ်။ ဂျပန်မှာ အခြေစိုက်နေတဲ့ အမေရိကန် ဗိုလ်ချုပ် Douglas MacArthur ကို ကိုးရီးယား ဆိုးလ်မြို့ရဲ့ တောင်ပိုင်း ဟန်မြစ် ကမ်းတဘက်က တောင်ကိုးရီးယားတပ်တွေဆီကို သွားဖို့ စေလွှတ်ခဲ့ပါတယ်။ ဇွန်လ ၂၉ ရက်နေ့မှာ ဗိုလ်ချုပ် မက်စ်အာသာ စစ်မြေပြင်ကိုရောက်သွားတော့ သွေးပျက်နေတဲ့ တောင်ကိုးရီးယားစစ်တပ်ကို တွေ့ရပါတော့တယ်။ သွေးပျက်နေတဲ့ တပ်သားတွေနဲ့ တိုက်ပွဲဝင်ဖို့ဆိုတာ မဖြစ်နိုင်တာကြောင့် အမေရိကန်တပ်သားတွေ ၀င်ရောက်စစ်ကူတိုက်ခိုက်မှ ရမယ် ဆိုတဲ့အကြောင်း ထရူးမင်းဆီကို အစီရင်ခံစာရောက်ပါတယ်။ အမေရိကန် သမ္မတက နောက်တနေ့မှာပဲ

ကိုးရီးယားစစ်ပွဲအကြောင်း တစေ့တစောင်း

ယူအက်စ်တပ်တွေကို တောင်ကိုးရီးယားကို စပြီး ပို့ပါတော့တယ်။ အမေရိကန်က ကုလသမဂ္ဂ လုံခြုံရေးကောင်စီက Resolution ကို ကိုင်ထားတဲ့အတွက် တခြားယူအင်နိုင်ငံတွေကလဲ တောင်ကိုးရီးယားဘက်ကနေ ကူညီတိုက်ခိုက်ရပါတယ်။ ဗြိတိန်၊ သြစတြေးလျ၊ ကနေဒါ၊ နယူးဇီလန်၊ ကိုလံဘီယာ၊ ဖိလစ်ပိုင်နဲ့ ထိုင်းနိုင်ငံတွေက ကုလသမဂ္ဂတပ်တွေ အနေနဲ့ ပါဝင်အား ဖြည့်ကြပါတယ်။

ဒါပေမယ့်လဲ ခြေလျင်စစ်သည်တွေအနေနဲ့ တောင်ကိုးရီးယားတပ်တွေနဲ့အတူ တိုက်ပွဲဝင်ခဲ့ကြတာက အမေရိကန်စစ်သည်တွေပါ။ အမေရိကန်စစ်တပ်က မြောက်ကိုးရီးယားတပ်တွေကို အလွယ်တကူ ချေမှုန်းနိုင်မယ်လို့ ထင်ခဲ့ကြပါတယ်။ ဒါပေမယ့်လဲ အမေရိကန်တပ်တွေဝင်လာပြီး သုံးပတ်အတွင်းမှာလဲ စစ်ပွဲဟာ သူတို့ မျှော်မှန်းသလောက် မလွယ်ကူမှန်း သိသွားကြပါတော့တယ်။ တောင်ကိုးရီးယားက အမေရိကန် ရုပ်သေးအစိုးရကို တော်လှန်နေကြတဲ့ တော်လှန်ရေးသမား သူပုန်တွေကလဲ အမေရိကန် တွေရဲ့ ထောက်ပံ့ရေးလမ်းကြောင်းတွေကို ဖျက်ဆီးပစ်ခဲ့ကြပါတယ်။ ဇူလိုင် (၂၀) မှာ အမေရိကန် ဗိုလ်ချုပ် William F. Dean ကို မြောက်ကိုးရီးယားတပ်က အရှင်ဖမ်းမိသွားပါတယ်။

ဇူလိုင်အကုန်ရောက်တော့ တောင်ကိုးရီးယားရဲ့ အနောက်ပိုင်းဒေသတခုလုံးဟာ မြောက်ကိုးရီးယား တပ်မတော်လက်ထဲ ကို ကျရောက်သွားပါပြီ။ အမေရိကန်နဲ့ တောင်ကိုးရီးယား စစ်တပ်တွေက Pusan Port ကို ဆုတ်ခွာကြပါတယ်။ စစ်ကူမ ရောက်ခင်မှာ Pusan Port တ၀ိုက်မှာ ခြေကုပ်ယူပြီး ခံစစ်တည်ဆောက်ဖို့ ရည်ရွယ်ချက်နဲ့ပါ။ ဒီအချိန်မှာ အမေရိကန်တပ်တွေက အရပ်သားတွေ အခြေချ နေထိုင်တဲ့ နယ်မြေဒေသတွေ အပါအ၀င် မြောက်ကိုးရီးယားတပ်တွေကို လေကြောင်းကနေ တိုက်ခိုက်မှုဖြစ်ပါတယ်။ ဒီလို လေကြောင်းကနေ တိုက်ခိုက်မှုတွေကြောင့် မြောက်ကိုးရီးယား တပ်သားတွေသာမက တောင်ကိုးရီးယား အရပ်သား ပြည်သူအများအပြားပါ သေကြေပျက်စီး ခဲ့ရပါတယ်။

သြဂုတ်လအစပိုင်းမှာ အမေရိကန်နဲ့ တောင်ကိုးရီးယားတပ်တွေဟာ ခံတပ်ခိုင်မာဖို့ ကြိုးပမ်းနေရဆဲပဲ ရှိပါသေးတယ်။ မြောက်ကိုးရီးယားတပ်တွေက Pusan Port နဲ့ မိုင်ငါးဆယ်ပဲ ဝေးတဲ့ Mason ကို ချီတက်လာကြပါပြီ။ အမေရိကန်စစ်တပ်က Lieutenant General Walton Walker က မရင်းတပ်မကြီးနဲ့ မြောက်ကိုးရီးယားတပ် ချီတက်ရာလမ်းကြောင်းကို ပိတ်ဆို့ဖို့ လုပ်ပါတယ်။ ဒါပေမယ့်လဲ မအောင်မြင် ခဲ့ပါဘူး။ ဒါကြောင့် နောက်ထပ်ချေမှုန်းရေးတပ်တွေကို မလွှတ်တော့ပဲ ခံစစ်ဒေသ ခိုင်မာရေးကိုသာ ဦးတည်ကြိုးပမ်းကြပါတော့တယ်။

Pusan Perimeter က တောင်ကနေ မြောက်အထိ မိုင်ရှစ်ဆယ် ကျယ်ဝန်ပြီး၊ အရှေ့အနောက် မိုင်ငါးဆယ်ခန့် ကျယ်ဝန်း ပါတယ်။ အရှေ့ဘက်မှာ Pohangdon မြို့ နဲ့ Yonil လေတပ်အခြေစိုက်စခန်း ရှိပါတယ်။ စစ်ရေးအချက်အချာကျတဲ့ နေရာတွေ ဖြစ်တာကြောင့် အမေရိကန်နဲ့ တောင်ကိုးရီးယား တပ်တွေက အသည်းအသန် ကာကွယ်ခဲ့ကြရပါတယ်။ ဒါပေမယ့်လဲ သြဂုတ် ဒုတိယပတ်ရောက်တော့ ဒီနေရာတွေကို မြောက်ကိုးရီးယားတပ်တွေက သိမ်းပိုက်လိုက်တာကြောင့် အမေရိကန်တပ်တွေနဲ့ တောင်ကိုးရီးယားတပ်တွေက ပင်လယ်ဘက်ကနေ ထွက်ပြေးခဲ့ရပါတယ်။ နောက်ပိုင်းမှာ အမေရိ ကန်လေတပ်က လေကြောင်းတိုက်ခိုက်မှုတွေ အကြီးအကျယ် ပြုလုပ်လာတာကြောင့် မြောက်ကိုးရီးယား တပ်တွေက ဆုတ်ခွာပေးလိုက်ရပါတယ်။

Pusan Preimeter မြေပုံ

မြောက်ကိုးရီးယားတပ်တွေက အမေရိကန်တပ်တွေရဲ့ ရှေ့တန်းဗျူဟာရုံးနဲ့ တောင်ကိုးရီးယား အစိုးရ ယာယီရုံးစိုက်ရာမြို့ဖြစ်တဲ့ Taegu ကို အာရုံစိုက်လာပါတယ်။ မြောက်ကိုးရီးယားတပ်တွေ နီးကပ် လာတာကြောင့် တောင်ကိုးရီးယားအစိုး ရက Pusan ကို ထွက်ပြေးရပါတော့တယ်။ နိုင်ငံရေး အချက်အချာနေရာဟာ Pusan ဖြစ်လာတာကြောင့် မြောက်ကိုးရီး ယားခေါင်းဆောင် Kim II Sung က စက်တင်ဘာ (၁) ရက်မတိုင်မီမှာ သိမ်းပိုက်ဖို့ အမိန့်ပေးလိုက်ပါတယ်။ အမေရိကန်ရဲ့ ရုပ်သေး အစိုးရဖြစ်တဲ့ တောင်ကိုးရီးယားအစိုးရကို အမေရိကန်စစ်တပ်က အထူးကာကွယ်ပေးခဲ့ရပါတယ်။ နောက်ဆုံး အမေရိကန်စစ်တပ်နဲ့တင် မလုံလောက်တော့ပဲ ဗြိတိန်ရဲ့ အကူအညီကိုပါ တောင်းခံလာ တာကြောင့် သြဂုတ်လနှောင်းပိုင်းမှာ ဗြိတိသျှတပ်မတခုက Pusan မှာ ခြေကုပ်သွားယူရပါတော့တယ်။

သြဂုတ် (၃၁) မှာ မြောက်ကိုးရီးယားစစ်တပ်က General Kim Chaik ရဲ့ Pusan စစ်ဆင်ရေးကြီး စတင်လာပါတယ်။ ဒါပေမယ့် နိုင်ငံသုံးခုရဲ့ စစ်တပ်သုံးခု ပူးပေါင်းပြီး ခုခံကာကွယ်နေတာကြောင့် မအောင်မြင်ခဲ့ပါဘူး။ စက်တင်ဘာ (၈) ရက် မှာ နှစ်ဘက်စလုံးက တဘက်နဲ့တဘက် ရင်ဆိုင် ထိန်းချုပ်ထားတဲ့ အဆင့်မှာပဲ ရှိနေပါသေးတယ်။ အဲဒီအချိန်မှာပဲ အမေရိကန် စစ်တပ်က ဗိုလ်ချုပ် မက်စ်အာသာရဲ့ Operation Chromite စစ်ဆင်ရေးကြီးက စတင်လာပါတော့တယ်။ စစ်ပွဲကြီး စတင် ချိန်တုန်းက တောင်ကိုးရီးယား အနောက်ပိုင်း Ichon Port ကို သိမ်းပိုက်ပြီး ဆိုးလ်မြို့တော်ကို ပြန်လည် သိမ်းပိုက်ဖို့ စီမံချက်ရှိခဲ့ဖူးပါတယ်။ မြောက်ကိုးရီးယားလက်ထဲကို ကျရောက်နေတဲ့ ဆိုးလ်မြို့တော်ကို သိမ်းပိုက်နိုင်မှသာ ဆက်သွယ် ရေးလမ်းကြောင်းနဲ့ ထောက်ပံ့ရေးလမ်းကြောင်းတွေကို ဖြတ်တောက် နိုင်ပြီး Pusan Perimeter ကို အာရုံစိုက်နေတဲ့ မြောက်ကိုးရီးယားတပ်တွေ ပြန်လည်ဆုတ်ခွာရေးကို ပြုလုပ်နိုင်မယ်လို့ ယူဆတာကြောင့် ဒီစီမံချက်ကို အသက်သွင်းဖို့ စတင်ကြိုးပမ်းပါတော့တယ်။ ဒီစစ်ဆင်ရေးအတွက် အထူးတပ်ဖြစ်တဲ့ X Corps ကို ဖွဲ့စည်းခဲ့ပါတယ်။

စက်တင်ဘာလ (၁၆) ရက်နေ့မှာ အမေရိကန်တပ်တွေက Inchon ကို သိမ်းပိုက်နိုင်ခဲ့ပါတယ်။ အဲဒီကနေတဆင့် ဆိုလ်း ကို သိမ်းပိုက်ဖို့ ကြိူးပမ်းတာမှာ မြောက်ကိုးရီးယား စစ်သည်နှစ်သောင်း ကျော်က ကာကွယ်ခဲ့ကြပါတယ်။ ဒါပေမယ့်လဲ အမေရိကန်တပ်တွေက အင်အားဖြည့်တိုက်ပွဲဝင်ခဲ့ကြ

၁၃

ကိုးရီးယားစစ်ပွဲအကြောင်း တစေ့တစောင်း

တာကြောင့် စစ်တင်ဘာ (၂၀) မှာ ဆိုးလ်မြို့တော်ရဲ့ ဆင်ခြေဖုန်း ဒေသတွေအထိ အမေရိကန်တပ်တွေ ၀င်ရောက်နိုင်ခဲ့ကြပါတယ်။ ဆိုးလ်မြို့တော်ကို အမေရိကန်တပ်တွေက သိမ်းပိုက်ပြီးချိန်မှာ Pusan Perimeter မှာ ရင်ဆိုင်ထိန်းချုပ်တိုက်ပွဲဝင်နေတဲ့ မြောက်ကိုးရီးယားတပ်တွေကရှေ့က အမေရိကန်၊ ဗြိတိန်နဲ့ တောင်ကိုးရီးယားတပ်တွေနဲ့ နောက်က အမေရိကန် X Corps တွေ အကြားမှာ ညပ်သွား ပါတယ်။ မြောက်ကိုးရီးယားတပ်တွေ အားပျော့လာချိန်မှာ ဗိုလ်ချုပ်မက်အာသာ ကိုယ်တိုင် တောင်ကိုးရီး ယားကိုသွားပြီး အမေရိကန်နဲ့ ယူအင်တပ်တွေကြောင့် အသက်ဆက်နေရတဲ့ တောင်ကိုးရီးယား အစိုးရကို အသက်ပြန်သွင်းပေးခဲ့ပါတယ်။ အမေရိကန်ရုပ်သေး ကိုးရီးယားခေါင်းဆောင် Syngman Rhee ကို သမ္မတရာထူး ပြန်ပေးအပ်ခဲ့ပါတယ်။ ထောင်ပေါင်းများစွာသော မြောက်ကိုးရီးယားတပ်သားတွေ စစ်အကျဉ်းသားတွေ ဖြစ်ခဲ့ပါတယ်။

စစ်ပွဲကာလအတွင်းမှာ လူမဆန်တဲ့ သတ်ဖြတ်မှုတွေကို နှစ်ဘက်စလုံးက ပြုလုပ်ခဲ့ကြပါတယ်။ အမေ ရိကန်စစ်သားနဲ့ တောင်ကိုးရီးယားစစ်သားတွေကို ဖမ်းမိတဲ့အခါ မြောက်ကိုးရီးယားတွေက နားနောက်မှာ သေနတ်ထောက်ပြီး တချက်တည်းနဲ့ အသေပစ်သတ်ပါတယ်။ တောင်ကိုးရီးယားတွေ ကလဲ ကွန်မြူနစ် လို့ သံသယရှိတဲ့ အရပ်သားတွေကိုပါ အစုလိုက်အပြုံလိုက် ပစ်သတ်ပါတယ်။ အမေရိကန်စစ်သား တွေဟာ တောင်ကိုးရီးယားတပ်တွေနဲ့အတူ နယ်မြေရှင်းလင်းရေး ထွက်ချိန်တွေမှာ ကျေးလက်ဒေသက ကွန်မြူနစ်ဝါဒ ထောက်ခံသူ အရပ်သား တောင်သူလယ်သမားတွေကို တောင်ကိုးရီးယားစစ်တပ်က ပစ်သတ်မှုတွေမှာပါ ပါဝင်ခဲ့ကြရပါသေးတယ်။ အဲဒီအချိန်ကာလတုန်းက တောင်ကိုးရီးယားအစိုးရဟာ အမေရိကန် အသက်သွင်းမှုကြောင့်သာ အသက်ရှင်နေပေမယ့် တောင်ကိုးရီးယား အရပ်သားပြည်သူ အများစုကတော့ ကွန်မြူနစ်ဝါဒကိုသာ ထောက်ခံခဲ့ကြပါတယ်။ ဒါကြောင့်လဲ Syngman Rhee အစိုးရနဲ့ စစ်တပ်က ကျေးလက်ဒေသက ကွန်မြူနစ်အမာခံတွေကို သူပုန်တွေလို့ သံသယရှိတာနဲ့ အစုလိုက် အပြုံလိုက် သတ်ဖြတ်ပစ်လိုက်ကြပါတယ်။ အဖမ်းမခံရတဲ့ မြောက်ကိုးရီးယားတပ်သားတွေက တောင်ကိုးရီးယားမှာ ရှိနေတဲ့ တော်လှန်ရေးသမား သူပုန်တွေနဲ့ လက်တွဲပြီး ဆက်လက် တိုက်ပွဲဝင်ကြပြန်ပါတယ်။ သူတို့တွေက ပြည်သူထဲမှာ တပ်ဖျောက် နေပါတယ်။ တောင်ကိုးရီးယားတွေက တော်လှန်ရေးသမားနဲ့ မြောက်ကိုးရီးယားတွေကို ရှာလို့ မတွေ့တော့ သူတို့ အခြေစိုက်မယ်ထင်တဲ့ နယ်မြေဒေသတွေ ကို သူပုန်နယ်မြေတွေ သတ်မှတ်ပြီး အမေရိကန်တွေကို ဗုံးကြဲခိုင်းပါတယ်။ ဒီဗုံးဒဏ် တွေကြောင့် အရပ်သားထောင်ပေါင်းများစွာရဲ့ အသက်တွေ ကြွေလွင့်ခဲ့ရပြန်ပါတယ်။

စစ်ပွဲက မပြီးသေးပါဘူး။ စက်တင်ဘာ (၂၇) ရက်ရောက်တော့ အမေရိကန်အစိုးရက ဗိုလ်ချုပ် မက်အာသာကို မြောက်ကိုးရီးယားကို ကျူးကျော်သိမ်းပိုက်ခွင့်ပေးလိုက်ပါတယ်။ ၃၈ မျဉ်းပြိုင်ကို ကျော်ပြီး မြောက်ကိုးရီးယား စစ်တပ်ကို ချေမှုန်းဖို့ ခွင့်ပြုချက်ရသွားပါတယ်။ အောက်တိုဘာ (၁) ရက်နေ့ ရောက်တော့ ယူအင်ရဲ့ Commander in Chief အနေနဲ့ ဗိုလ်ချုပ် မက်အာသာက မြောက်ကိုးရီးယားခေါင်းဆောင်တွေကို

‘I, as the United Nations Commander in Chief, call upon you and the forces under your command, in whatever part of Korea situated, forthwith to lay down your arms and cease hostilities under such military supervision as I may direct….’

လို့ ဆိုခဲ့ပါတယ်။

တင်းမာမှုအခြေအနေက တစတစ ဆိုးလာခဲ့ပါပြီ။ မြောက်ကိုးရီးယားနဲ့ တောင်ကိုးရီးယားတို့အကြားက ၀ါဒရေးရာအား ပြိုင်မှုတွေကို ပြည်ပစွက်ဖက်မှုတွေက အားဖြည့်ပေးထားတဲ့ စစ်ပွဲမှာ အမေရိကန် တပ်တွေက တောင်ကိုးရီးယားဘက်က ၀င်တိုက်ပေးရုံမက မြောက်ကိုးရီးယားကိုပါ သိမ်းပိုက်ဖို့ ခြိမ်းချောက်လာပါတယ်။ နှစ်ဘက် နိုင်ငံရေ၊ စစ်ရေးကစားပွဲက တရားမျှတမှု ချိန်ခွင်လျှာ ပျက်လာပါတယ်။ ဒီလိုအခြေအနေမှာ မြောက်ကိုးရီးယားနဲ့ နယ်နိမိတ်ချင်း ဆက်ဆံနေတဲ့ တရုတ်ကလက်ပိုက်ကြည့်မနေတော့ပါဘူး။

ကမ္ဘာ့နိုင်ငံရေးစင်မြင့်ပေါ်မှာကလဲ ချန်ကေရှိတ်တပ်တွေကို မော်စီတုန်းတပ်တွေက အနိုင်ယူပြီး တရုတ်ပြည်သူ့သမ္မတနိုင်ငံကြီးကို တည်ထောင်ပြီး ဖြစ်ပေမယ့် ယူအင်က အမေရိကန်ကျောထောက် နောက်ခံပေးထားတဲ့ ချန်ကေရှိတ်အစိုးရကိုပဲ တရုတ်အစိုးရအဖြစ် အသိအမှတ်ပြုပြီး လုံခြုံရေးကောင်စီ ကုလားထိုင်ပေါ်မှာ ထိုင်ခိုင်းထားပါတယ်။ မြောက်ကိုးရီးယားကို သိမ်းပိုက်ဖို့ပြင်နေတဲ့ အမေရိကန်စစ်ရေး မျှော်မှန်းချက်တွေရဲ့ နောက်ဆက်တွဲမှာ တရုတ်နိုင်ငံနဲ့ နယ်နိမိတ်ချင်း ထိစပ်နေမှုကို အခွင့်ကောင်းယူပြီး တရုတ်ရဲ့ အချုပ်အခြာအာဏာကို ထိခိုက်လာနိုင်ဖွယ် consequences တွေကလဲ ရှိနိုင်ကြောင်း တရုတ်မဟာဗျူဟာကျွမ်းကျင်သူတွေက သံသယရှိလာကြပါတယ်။

စစ်ပွဲတွင်းသို့ တရုတ်ဝင်လာပြီ

မူလအစတုန်းက အမေရိကန်နဲ့ ယူအင်ရဲ့ စစ်ရေးအရ ၀င်ရောက်စွက်ဖက်မှုဟာ တောင်ကိုးရီးယားကို ကာကွယ်ပေးဖို့လို့ ဆိုခဲ့ပါတယ်။ ဒါပေမယ့် စက်တင်ဘာလကုန်ရောက်တော့ အမေရိကန်က မြောက်ကိုးရီးယားကိုပါ ၀င်ရောက်ကျူးကျော်ပြီး မြောက်ကိုးရီးယားစစ်တပ်ကို ချေမှုန်းဖို့ ဖြစ်လာပါပြီ။ အမေရိကန်မဟာဗျူဟာ ကျွမ်းကျင်သူအချို့က ဒါနဲ့ ပတ်သက်ပြီး သဘောမတူခဲ့ကြပါဘူး။ မလိုလား အပ်တဲ့ နောက်ဆက်တွဲ ပြဿနာတွေ တက်လာတော့မယ်လို့ ယူဆပြီး သတိပေးခဲ့ကြပါတယ်။ သူတို့ရဲ့ သတိပေးချက်တွေကြောင့် အမေရိကန်သမ္မတ ထရူးမင်းက တရုတ်၊ ဆိုဗီယက်တို့နဲ့ ထိပ်တိုက်ရင်ဆိုင်မှု ဖြစ်လာမှာကို စိုးရိမ်လာပါတယ်။ တရုတ်ပြည်နဲ့ မြောက်ကိုးရီးယား နယ်စပ်ဖြစ်တဲ့ Yalu မြစ်ကြောင်း တလျှောက်မှာ လေကြောင်းတိုက်ခိုက်မှုနဲ့ တခြားစစ်ရေး အော်ပရေးရှင်းတွေ မပြုလုပ်ရဘူးလို့ ဗိုလ်ချုပ်မက်အာသာကို အမိန့်ပေးခဲ့ပါတယ်။ တရုတ်တပ်တွေနဲ့ ထိပ်တိုက်ရင်ဆိုင်မှု မဖြစ်ရလေအောင် တရုတ်နယ်စပ်နဲ့ မိုင်လေးဆယ်အတွင်းမှာ လှုပ်ရှားခြင်း မပြုဖို့ကိုလဲ မဟာဗျူဟာ ကျွမ်းကျင်သူတွေက တွက်ချက်တင်ပြပေးထားခဲ့ပါတယ်။ စစ်တင်ဘာ (၃၀) ရက် မှာပဲ မော်စီတုန်းအစိုးရက အမေရိကန်နိုင်ငံကို ‘The Chinese people absolutely will not tolerate foreign aggression, nor will they supinely tolerate seeing their neighbours being savagely invaded by imperialists’ ဆိုပြီး သတိပေးခဲ့ပါတယ်။ ဒါဟာ နယ်နိမိတ်ချင်း ထိစပ်နေတဲ့ အိမ်နီးချင်းနိုင်ငံတွေနဲ့ ပတ်သက်ပြီး တရုတ်နိုင်ငံရဲ့ သဘောထားဖြစ်ပါတယ်။

အမေရိကန်က ဒီလိုသတိပေးချက်ကို အလေးအနက် မထားခဲ့ပါဘူး။ တရုတ်နယ်စပ်ကို မရောက် သေးသရွေ့ တရုတ်အစိုးရနဲ့ ပြဿနာဖြစ်နိုင်ဖွယ် မရှိဘူးလို့ ယူဆထားခဲ့ကြပါတယ်။ အောက်တိုဘာလ ရောက်တော့ ဗိုလ်ချုပ်မက်အာသာတပ်တွေက မြောက်ကိုးရီးယားကို ကျူးကျော်ပါတော့တယ်။ အောက်တိုဘာလ (၁၂) ရက်နေ့မှာ မြောက်ကိုးရီးယား မြို့တော် Pyongyang ကို အမေရိကန်တပ်တွေ အများအပြားပါဝင်တဲ့ ယူအင်တပ်တွေက သိမ်းပိုက်ခဲ့ပါတယ်။ အောက်တိုဘာလ (၁၉) ရက်နေ့ ရောက်တော့ တရုတ်ပြည်သူ့လွတ်မြောက်ရေးတပ်မတော်ရဲ့ ခြေမြန်တပ်ရင်းအချို့က Yalu မြစ်ကိုကျော် ဖြတ်ပြီး မြောက်ကိုးရီးယားနယ်မြေထဲကို ချဉ်းနင်းဝင်ရောက် လာကြပါတော့တယ်။ နောက်ပိုင်းမှာ မြောက်ကိုးရီးယား စစ်မြေပြင်အတွက် အသုံးပြုတဲ့ တရုတ်ပြည်သူ့ လွတ်မြောက်ရေး တပ်မတော်ရဲ့ လက်အောက်ခံတပ်တွေကို တရုတ်ပြည်သူ့ ၀န်ထမ်းတပ်လို့ အမည်ခွဲခြား သတ်မှတ်ခဲ့ပါတယ်။

အောက်တိုဘာ (၂၅) ရက်နေ့ရောက်တော့ တရုတ်တပ်တွေနဲ့ ယူအင်တပ်တွေ စတင်ထိတွေ့မှု ဖြစ်ပြီး နိုဝင်ဘာ (၆) ရက်နေ့အထိ ပြင်းပြင်းထန်ထန် တိုက်ပွဲတွေ ဖြစ်ခဲ့ပါတယ်။ နိုဝင်ဘာ (၆) ရက်နေ့ရောက်တော့ ယူအင်တပ်တွေ ဘက်က အထိနာလာတာကြောင့် ဆုတ်ခွာပြီး ပြန်လည်စုစည်း ရပါတော့တယ်။ တရုတ်တပ်တွေကလဲ တောင်တန်းတွေ အကြားမှာ ပြောက်ကျား အသွင်နဲ့ ပြန်လည်ပျောက်ကွယ် သွားပြန်ပါတယ်။ အမေရိကန်တွေနဲ့အတူ တိုက်ပွဲဝင်နေတဲ့ ဗြိတိန်တပ် တွေက တရုတ်နဲ့ ဆွေးနွေးညှိနှိုင်းမှု လုပ်ပြီး အပစ်အခတ်ရပ်စဲရေး ဇုန်တခု သတ်မှတ်သင့်ကြောင်း အမေရိကန် ဗိုလ်ချုပ် တွေကို တင်ပြကြပါတယ်။

ဒါပေမယ့် အမေရိကန်တွေက လက်မခံခဲ့ကြပါဘူး။ နိုဝင်ဘာ (၂၄) ရက်နေ့ရောက်တော့

ဗိုလ်ချုပ်မက်အာသာက နောက်ဆုံးအပြီးသတ်တိုက်ပွဲ ဆင်နွှဲဖို့ သူ့တပ်တွေကို အမိန့်ပေးပါတယ်။ ဒါနဲ့ ပတ်သက်ပြီး တိုက်ပွဲဝင်နေကြတဲ့ စစ်ဆင်ရေးမှူး တွေက အလွန်ပဲ စိုးရွံ့ကြပါတယ်။ မြောက်ကိုးရီးယား တောင်တန်းတွေအကြားမှာ ဆောင်းရာသီ စစ်ဆင်ရေး ပြုလုပ်ရတာဟာ အမေရိကန်တပ်တွေအတွက် မလိုလားအပ်တဲ့ တောင်းဆိုမှုဖြစ်ကြောင်း ဆိုခဲ့ကြပါတယ်။ တောင်တန်းတွေ အကြားမှာ နေရာယူ တပ်ဖျောက်ထားတဲ့ တရုတ်စစ်သည်အင်အားကိုလဲ မခန့်မှန်းနိုင်ကြပါဘူး။

ဒါပေမယ့်လဲ စစ်မိန့်ဖြစ်တာကြောင့် ကြောက်လန့်တကြားနဲ့ပဲ စစ်ဆင်ရေးထွက်ခဲ့ကြပါတယ်။ တောင်တန်းတွေ အကြားမှာတော့ တရုတ်တပ်မတော် General Peng Dehuai ရဲ့ တရုတ်စစ်သည် နှစ်သိန်းကျော်က စောင့်ကြိုနေကြပါတယ်။ တရုတ်စစ်သည်တွေမှာ အမေရိကန်တပ်တွေလို လက်နက်ကြီး ပစ်ကူတွေ၊ တင့်ကားတွေ၊ လေကြောင်းအကူအညီတွေ မရှိခဲ့ကြပါဘူး။ ဒါပေမယ့် နာရီအနည်းငယ်အတွင်းမှာပဲ အမေရိကန်နဲ့ ယူအင်တပ်တွေရဲ့ ညာတောင်ပံစစ်ကြောင်းကို ဖောက်ပြီး တောင်ကိုးရီးယားတပ်တွေကို ချေမှုန်းနိုင်ခဲ့ပါတယ်။ နိုဝင်ဘာ (၂၈) ရက်နေ့ရောက်တော့ ယူအင်ရဲ့ အမှတ် (၈) တပ်မတော် ဆုတ်ခွာသွားရပါတယ်။ ဆုတ်ခွာရာမှာလဲ တရုတ်တပ်တွေနဲ့ မြောက်ကိုးရီးယား တပ်တွေက ချုံခိုတိုက်ခိုက်ကြတာကြောင့် အမေရိကန်ရဲ့ 2nd Division တပ်ကြီးတခုလုံး တိုက်ခိုက်ရေးအတွက် ပြန်လည်စုဖွဲ့လို မရအောင်ကို ဖွဲ့စည်းပုံပျက်သွားခဲ့ရပါတယ်။

အရှေ့ဘက်စစ်မျက်နှာမှာလဲ ယူအင်တပ်အင်အား တသောင်းခုနစ်ထောင်ကျော်ဟာ လမ်းကျဉ်း လမ်းမြောင်လေးတွေကနေ အသည်းအသန် ဆုတ်ခွာထွက်ပြေးကြရပါတယ်။ ဒီဇင်ဘာ (၂၄) ရက်နေ့ ရောက်တော့ ယူအင်တပ်တွေဟာ ၃၈ မျဉ်း ပြိုင်အနီးအနားမှာတောင် မရှိကြတော့ပါဘူး။ သုံးလနီးပါးကြာခဲ့တဲ့ ဒီထိတွေ့မှုတွေမှာ တရုတ်စစ်သည် လေးသောင်းကျော် ကျဆုံးခဲ့ပါတယ်။ များသောအားဖြင့် အမေရိကန်လေတပ်ရဲ့ လေကြောင်းတိုက်ခိုက်မှုနဲ့ လက်နက်ကြီးပစ်ကူတွေ ကြောင့်ပါ။ နှစ်ဘက်စလုံး အထိနာမှုတွေကြောင့် အင်အားဖြည့်ရင်း ခေတ္တထိတွေ့မှုရပ်ဆိုင်းသွားပါတယ်။

ဒါပေမယ့် ကမ္ဘာ့အင်အားကြီး နိုင်ငံတွေရဲ့ ခေါင်းဆောင်တွေအကြားမှာ တတိယကမ္ဘာစစ်ဆိုတဲ့ စကားလုံးက ၀င်လာခဲ့ပါပြီ။ မဟာဗျူဟာကျွမ်းကျင်သူတွေက ကိုးရီးယားစစ်ပွဲကနေ တဆင့် အမေရိကန်နဲ့ မဟာမိတ် အရင်းရှင်နိုင်ငံတွေက တဘက်၊ ဆိုဗီယက်-တရုတ်နဲ့ ကွန်မြူနစ်နိုင်ငံ တွေကတဘက် ဆင်နွှဲတဲ့ တတိယကမ္ဘာစစ်ကြီးဖြစ်လာမှာကို စိုးရိမ်လာကြပါတော့တယ်။ အဲဒီအချိန် ကာလမှာ ဆိုဗီယက်နိုင်ငံမှာကလဲ နယူးကလီးယား လက်နက်ရှိနေပြီမို့ တတိယကမ္ဘာစစ်ဖြစ်လာခဲ့ရင် အမေရိကန် ကရော၊ ဆိုဗီယက်ကပါ နယူးကလီးယား သုံးမယ့် အနေအထားမှာ ရှိလာခဲ့ပါပြီ။ ဒီအခြေအနေကိုလဲ နှစ်ဘက်စလုံးက မလိုလားကြပါဘူး။ တတ်နိုင်သမျှ စစ်ပွဲကို ရှောင်လိုကြပါတယ်။

ဗြိတိန်ဝန်ကြီးချုပ် အက်တလီက ကိုးရီးယားစစ်ပွဲနဲ့ ပတ်သက်ပြီး အမေရိကန်ကို စစ်ရေးအရ၊ နိုင်ငံရေး အရ ထောက်ခံထားတာ ဖြစ်ပေမယ့်လဲ ဆိုဗီယက်ယူနီယံနဲ့ ထိပ်တိုက်တွေ့ပြီး ကမ္ဘာစစ်ဖြစ်မယ့် အခြေအနေကို မလိုလားပါဘူး။ ဒါကြောင့် ဒီဇင်ဘာလဆန်းမှာကတည်းက ၀ါရှင်တန်မှာ အရေးပေါ် အစည်းအဝေးလုပ်ပြီး ဗြိတိန်နဲ့ ဆွေးနွေးတိုင်ပင်ခြင်း မပြုပဲ ကိုးရီးယားကို အနုမြူဗုံး မကြဲပါဘူး ဆိုတဲ့ ကတိကို အမေရိကန်သမ္မတ ထရူးမင်းဆီကနေ မရအရ တောင်းယူခဲ့ပါတယ်။ ဗြိတိန်က ဦးဆောင်ပြီး တရုတ်နဲ့ အမေရိကန်အကြားမှာ Peace Initiative လုပ်ဖို့ ကြိုးစားခဲ့ပေမယ့် မအောင်မြင် ပါဘူး။

(၁၉၅၁) ခုနှစ်၊ ဇန်န၀ါရီလ (၁) ရက်နေ့ရောက်တော့ တရုတ်တပ်တွေဟာ ရေခဲနေတဲ့ Imjin River ကို တညလုံးဖြတ်ကူးပြီး တဘက်ကမ်းက တောင်ကိုးရီးယားတပ်တွေဆီ ရောက်လာချိန်မှာ တောင်ကိုးရီးယား စစ်သည်တွေ ကြောက်လန့် တကြားနဲ့ ထွက်ပြေးကြပါတော့တယ်။ ဆိုးလ်မြို့တော်ကို ကာကွယ်ဖို့အတွက် ယူအင်တပ်တွေမှာ အင်အားနည်းနေတာကြောင့် ဇန်န၀ါရီလ (၃) ရက်နေ့မှာ မြို့ကနေ ဆုတ်ခွာပြီး မြို့တောင်ပိုင်း မိုင်ငါးဆယ်အကွာမှာ နေရာယူပြီး ထိုးစစ်ပြင်ဖို့ ပြန်လည် စုဖွဲ့ပြင်ဆင်ကြရပါတယ်။ ဇန်န၀ါရီလ (၂၅) ရက်နေ့မှာ ယူအင်တပ်တွေဘက်က ပြန်ပြီး ထိုးစစ်ဆင်ခဲ့ပါ တယ်။ ဖေဖော်ဝါရီနဲ့ မတ်လ တလျှောက်မှာ ထိတွေ့မှု အကြိမ်များစွာဖြစ်ခဲ့ပြီး မတ်လ (၁၄) ရက်နေ့ကျမှ ဆိုးလ်မြို့တော်ကို ယူအင်တပ်တွေက ပြန်လည်သိမ်းပိုက်နိုင်ခဲ့ပါတယ်။ ဧပြီလထဲရောက်တော့ ယူအင်တပ်တွေက ၃၈ မျဉ်းပြိုင်အနီးကို ပြန်လည်ချဉ်းကပ်လာနိုင်ပါပြီ။ အဲဒီအချိန်မှာပဲ ထရူးမင်းရဲ့

စစ်ရေးအကြံပေးတွေက ငြိမ်းချမ်းရေး လုပ်ဖို့ အကြံပြုလာကြပါတယ်။ ထရူးမင်းရဲ့ ငြိမ်းချမ်းရေး ခြေလှမ်းတွေကို ယူအင်ထဲက မဟာမိတ်တွေကလဲ လက်ခံကြပါတယ်။ ထင်ထင်ရှားရှား ဆန့်ကျင်နေ တာကတော့ ဗိုလ်ချုပ်မက်အာသာပါ။ သူက ကွန်မြူနစ်တရုတ်တွေနဲ့ compromise လုပ်စရာ မလိုဘူး လို့ ဆိုခဲ့ပါတယ်။ တရုတ်ပြည်မကြီးကို လေကြောင်းကနေ ထိုးစစ်ဆင်ပြီး ချန်ကေရှိတ်တပ်တွေကို မော်စီတုန်းတပ်တွေနဲ့ ထိပ်တိုက် ပြန်တွေ့ပေးဖို့ အကြံပြုပါတယ်။ အလုံးစုံအောင်ပွဲ ရရှိရေးကိုပဲ ဦးတည်သင့်ကြောင်း ဆိုခဲ့ပါတယ်။

စစ်ပွဲတိုင်းမှာ အဆုံးသတ်အောင်ပွဲရချင်မှ ရနိုင်မှာပါ။ တခါတရံမှာ စစ်ရေးအမြင်တခုတည်းနဲ့ မဆုံးဖြတ်ပဲ နိုင်ငံရေးအမြင်နဲ့ပါ ပေါင်းစပ်ဆုံးဖြတ်ရတာ ရှိပါတယ်။ မက်အာသာ ပြောသလို တရုတ်ပြည်မကြီးကို တိုက်ခိုက်ခြင်းအားဖြင့် ဆိုဗီယက် ယူနီယံကို စစ်ပွဲထဲဆွဲသွင်းရာ ရောက်သွားပါမယ်။ အဲဒီကနေ တတိယကမ္ဘာစစ်ကြီးကို escalation ဖြစ်သွားနိုင်ပါတယ်။ ဒီအချက်ကို အမေရိကန်နဲ့ ဗြိတိန်က မဟာဗျူဟာလေ့လာရေး ပညာရှင်တွေက တင်ပြပြီး compromise လုပ်ဖို့ကို အကြံ ပြုခဲ့ကြပါတယ်။ နောက်ဆုံး အေပြီလ (၁၁) ရက်နေ့မှာ ဗိုလ်ချုပ်မက်အာသာက သူ့ရဲ့ aggressive policy တွေကို လူသိ ရှင်ကြားထုတ်ဖော်ပြောကြားပြီး နောက်ပိုင်းမှာ ထရူးမင်းက သူ့ရဲ့ ဗိုလ်ချုပ်ကြီးကို အနားပေးလိုက် ရပါတော့တယ်။ သူ့နေ ရာမှာ General Ridgway ကို အစားထိုး ခန့်အပ်ခဲ့ပါတယ်။ မေလရောက်တော့ ကိုးရီးယားစစ်မြေပြင်မှာ တိုက်ပွဲဝင်နေကြတဲ့ ခန့်မှန်း နှစ်ဘက်စစ်အင်အားက ဆယ်သိန်းကျော် ဖြစ်နေပါပြီ။ တရုတ်တပ်အင်အား ငါးသိန်းကျော်၊ မြောက်ကိုးရီးယား တပ်အင်အားနှစ်သိန်းနီးပါး၊ တောင်ကိုးရီးယားအက်အား နှစ်သိန်းကျော်နဲ့ အမေရိကန်နဲ့ ယူအင်အက်အား နှစ်သန်းခုနှစ် သောင်းကျော်ဖြစ်ပါတယ်။

အပစ်အခတ်ရပ်စဲရေးအတွက် ကြိုးပမ်းကြပြီ

ဇွန်လရောက်တော့ တရုတ်မော်စီတုန်းအစိုးရက ကိုးရီးယားစစ်ပွဲမှာ အပစ်အခတ်ရပ်စဲလိုကြောင်း ဆိုဗီယက်ယူနီယံကို အသိပေးပြောခဲ့ပါတယ်။ အဲဒီလမှာပဲ အမေရိကန်ကနေ ဆိုဗီယက်သံအမတ်ကို ၃၈

မျဉ်းပြိုင်ဟိုဘက်ဒီဘက်မှာ အပစ်အခတ်ရပ်စဲဖို့ကို သဘောတူကြောင်း ပြောကြားခဲ့ပါတယ်။ နှစ်ဘက် စလုံးက တိုက်ခိုက်မှုတွေ ရပ်တန့်လိုတာကြောင့် ငြိမ်းချမ်းရေးဆွေးနွေးပွဲက အဆင်ပြေမယောင် ရှိခဲ့ပေမယ့် တဘက်နဲ့ တဘက် ယုံကြည်မှု အားနည်းချက်တွေကြောင့် နောက်ထပ်နှစ်နှစ် ထပ်ကြာခဲ့ပါတယ်။ ကိုးရီးယား တောင်နဲ့ မြောက်ကို စစ်ရေးအရ တဘက်နဲ့ တဘက် ကျူးကျော်ပြီး ပြန်လည် ပေါင်းစည်းပေးဖို့ခက်ခဲကြောင်း နှစ်ဘက်စလုံးက သဘောတူ လက်ခံထားခဲ့ကြပါတယ်။

ဘယ်လိုပဲဖြစ်ဖြစ် နှစ်ဘက်တပ်တွေအကြား ထိတွေ့မှုတွေကတော့ ရှိနေဆဲပါပဲ။ တဘက်နဲ့ တဘက် စစ်ရေးအရ အနိုင်မယူနိုင်တာကို နှစ်ဘက်စလုံးက သိနေကြပေမယ့် တွေ့ဆုံညှိနှိုင်းမှုမှာ တဘက်နဲ့တဘက် ဖိအားပေးနိုင်ဖို့ တိုက်ခိုက်မှုတွေ ရှိနေခဲ့ပါတယ်။ အောက်တိုဘာလရောက်တော့ Main Line of Resistance သတ်မှတ်ပြီး နှစ်ဘက်စလုံးက ထိပ်တိုက်ရင်ဆိုင်ထားတဲ့ အခြေအနေမှာပဲ ရှိပါတော့တယ်။ Conflict Stalemate အဆင့်ကို ရောက်နေပါပြီ။ ဒီလိုအချိန်မှာ negotiation အောင်မြင်ဖို့ အခွင့်အလမ်းအများဆုံး အခြေအနေပါ။

တောင်ကိုးရီးယားက အမေရိကန် ရုပ်သေးအစိုးရအကြီးအကဲ Rhee က အပစ်အခတ်ရပ်စဲရေးကို သဘောမတူညီပါဘူး။ မြောက်ကိုးရီးယားကို သိမ်းပိုက်နိုင်တဲ့အထိ အမေရိကန်ရဲ့ စစ်ရေးအကူအညီရဖို့ ကြိုးပမ်းပါတယ်။ ဒါပေမယ့် အမေရိကန်တွေကို လွှမ်းမိုးနိုင်တဲ့ သြဇာအာဏာ မရှိပါဘူး။ တကယ်တမ်း ဆွေးနွေးညှိနှိုင်းကြတော့ တောင်ကိုးရီးယားက အမေရိကန်က token representation အဆင့်မှာပဲ ထားခဲ့ပါတယ်။ တကယ်တန်းကျတော့ တွေ့ဆုံညှိနှိုင်းပွဲမှာ တဘက်က အမေရိကန်နဲ့ တခြားတဘက်က တရုတ်နဲ့ မြောက်ကိုးရီးယားတို့ ဆွေးနွေးခဲ့ကြတာပါ။

နိုဝင်ဘာလရောက်တော့ နှစ်ဘက်စလုံးက armistice line ထားဖို့ သဘောတူညီခဲ့ပါတယ်။ (၁၉၅၂)ခုနှစ်၊ ဖေဖော်ဝါရီလ ရောက်တော့ အပစ်အခတ်ရပ်စဲရေးနဲ့ ပတ်သက်တဲ့ အကျယ်တ၀င့် အချက်တွေကို ညှိနှိုင်းဆွေးနွေးနိုင်ခဲ့ကြပါတယ်။ နောက်ထပ်ဆွေးနွေးဖို့ကျန်တဲ့ ကြီးမားတဲ့ပြဿနာကတော့ စစ်အကျဉ်း သား ပြဿနာပါ။ armistice lineသာ မရှိခဲ့ရင် ဆွေးနွေးပွဲတွေ ချက်ချင်း ရပ်ပြီး စစ်ကြီးပြန်ဖြစ်သွားနိုင်တဲ့

အခြေအနေမျိုးပါ။ ယူအင်ဘက်က တပ်တွေမှာက စစ်အကျဉ်းသား တသိန်းခွဲရှိနေပါတယ်။ မြောက်ကိုးရီးယား ဘက်မှာကလဲ စစ်အကျဉ်းသားတွေအများအပြား ရှိနေပါတယ်။ ဒါပေမယ့် အမေရိကန်တွေက all for all exchange ကို သဘောမတူပါဘူး။ စစ်အကျဉ်းသားတွေကို ကွန်မြူနစ်တိုင်းပြည်တွေဆီ ပြန်ခြင်း၊ မပြန်ခြင်းနဲ့ ပတ်သက်ပြီး ရွေးချယ်မှုပေးရမယ်လို့ ဆိုပါတယ်။ ဒါကို တရုတ်နဲ့ မြောက်ကိုးရီးယားဘက်က အလွန်ပဲ ဒေါသထွက်ကုန် ကြပါတယ်။

တောင်ကိုးရီးယားမှာရှိနေတဲ့ စစ်အကျဉ်းသား ထိန်းသိမ်းရေး စခန်းတွေမှာ အစာရေစာ ပြတ်လပ်မှုနဲ့ ညှဉ်းပန်းနှိပ်စက်မှုခံနေရတဲ့ ကွန်မြူနစ်တပ်သားတွေဟာ ဘယ်လိုအကြောင်းနဲ့မှ ဆက်နေစရာ အကြောင်း မရှိဘူးလို့ သူတို့က ဆိုခဲ့ပါ တယ်။ မေလမှာ ဖြစ်တဲ့ Koje Camp ဆန္ဒပြပွဲမှာ အမေရိကန်တပ်တွေက တင့်ကားတွေအသုံးပြုပြီး နှိမ်နင်းခဲ့တဲ့အထိပါ။ တပြိုင်နက်တည်းမှာပဲ အမေရိကန်နဲ့ တောင်ကိုးရီးယားတို့ကလဲ မြောက်ကိုးရီးယား ထိန်းသိမ်းရေး စခန်းတွေထဲက စစ်အ ကျဉ်းသားတွေအတွက် စိုးရိမ်နေကြရပါတယ်။ နှစ်ဘက်စလုံးက စစ်အကျဉ်းသား ထိန်းသိမ်းရေး စခန်းတွေအားလုံးမှာ ရိုက်နှက်မှုတွေ၊ ညှဉ်းပမ်းနှိပ်စက်မှုတွေ၊ အစာရေစာ မလုံလောက်မှုတွေကတော့ ရှိနေခဲ့ပါတယ်။

တချိန်တည်းမှာပဲ ဆွေးနွေးပွဲကို အကြောင်းပြထားစဉ်ကာလမှာ တောင်ကိုးရီးယားဗိုလ်ချုပ် Paek Sun-yop က တောင်ကိုးရီးယားနိုင်ငံထဲမှာ ရှိနေတဲ့ ကွန်မြူနစ်တွေကို သုတ်သင်ရှင်းလင်းရေး ပြုလုပ်ပါတယ်။ တောင်ကိုးရီးယား ကွန်မြူနစ် တော်လှန်ရေးကို ၁၉၅၂ ခု၊ ဇန်န၀ါရီမှာ Ratkiller ဆိုတဲ့ အော်ပရေးရှင်းနဲ့ ချေမှုန်းခဲ့ကြပါတယ်။ (၁၉၅၂) ကာလတွေမှာ နှစ်ဘက်စလုံးကတော့ အဆုံးသတ်အောင်ပွဲ စစ်ဆင်ရေး မဟုတ်တဲ့ ထိတွေ့မှုတွေကို ဆက်တိုက် ပြုလုပ်နေခဲ့ကြပါတယ်။ ဇွန်လ (၂၃) မှာ Yalu မြစ်ပေါ်က Supung dam နဲ့ တခြား dam သုံးခုကို အမေရိကန်လေတပ်က ဗုံးကြဲခဲ့တာကြောင့် မြောက်ကိုးရီးယားနဲ့ တရုတ်ပြည်အရှေ့မြောက်ပိုင်းတို့မှာ လျှပ်စစ်ဓာတ်အား ပြတ်တောက် သွားခဲ့ပါတယ်။

အမေရိကန်နဲ့ ယူအင်တပ်တွေရဲ့ တိုက်ခိုက်ခြင်းကို ကာကွယ်ဖို့အတွက် မြောက်ကိုးရီးယားနဲ့ တရုတ်တပ်တွေက (၇၄၅) မိုင်အရှည်ရှိတဲ့ မြေအောက်ဥမင် လှိုဏ်ခေါင်း ကွန်ယက်ကြီးကို စတင် ဖောက်လုပ်ခဲ့ပါတယ်။ (၁၉၅၃) ခုနှစ်၊ နှစ်ဦးပိုင်းမှာ တရုတ်စစ်သည်အင်အား တသန်းကျော်က ကိုးရီးယားစစ်မြေပြင်မှာ ရောက်နေခဲ့ပါပြီ။ ယူအင်တပ်အင်အား ရှစ်သိန်းကျော်ကလဲ စစ်မြေပြင်ပေါ်မှာ ရှိနေခဲ့ပါတယ်။ အဲဒီအချိန်မှာပဲ နိုင်ငံရေးအပြောင်းအလဲတွေကလဲ စဖြစ်လာပါတယ်။ အမေရိကန်မှာ ဒုတိယကမ္ဘာစစ်က နာမည်ကြီးဗိုလ်ချုပ်ကြီးဖြစ်တဲ့ အိုင်ဆစ်ဟောင်ဝါက သမ္မတဖြစ်လာပါပြီ။ တချိန်တည်းမှာပဲ ဆိုဗီယက်မှာလဲ စတာလင် သေဆုံးသွားခဲ့ပါပြီ။ ဆိုဗီယက်ခေါင်းဆောင်တွေက ဆွေးနွေးပွဲကို အချိန်တိုအတွင်း အပြီး ဖြတ်ဖို့ ဖိအားပေးလာပါတော့တယ်။

မေလမှာ ယူအင်တပ်တွေက မြောက်ကိုးရီးယားမြို့တော် Pyongyang ရဲ့ မြောက်ပိုင်းက ရေကာတာတွေကို ဗုံးကြဲဖျက် ဆီးပစ်လိုက်တာကြောင့် ရေလွှမ်းမိုးမှုဖြစ်လာပြီး မြောက်ကိုးရီးယားရဲ့ လယ်ယာမြေတွေ ပျက်စီးသွားပါတယ်။ ပြည်သူလူထုမှာ အငတ်ဘေးနဲ့ ရင်ဆိုင်ရပါတော့တယ်။ ဒီလိုဖြစ်ပြီး မကြာခင်မှာပဲ နှစ်ဘက်စလုံးက သဲသဲမဲမဲ တိုက်ခိုက်မှုတွေ လုပ် ကပါတယ်။ ဇူလိုင်လထဲမှာ တပတ်အတွင်းမှာတင် ယူအင်တပ်တွေဘက်က စစ်သည် သုံးသောင်းကျော် ကျဆုံးပါတယ်။ တရုတ်နဲ့ မြောက်ကိုးရီးယားဘက်မှာ ဒီထက်ပိုပြီး အသေအပျောက်များမယ်လို့ လေ့လာသူတွေက ခန့်မှန်းကြ ပါတယ်။ ဖိအားများလာတာနဲ့အမျှ ဆွေးနွေးပွဲအရှိန်ကလဲ မြန်လာပါတယ်။

အမေရိကန်ရုပ်သေးအစိုးရ တောင်ကိုးရီးယား ခေါင်းဆောင် Rhee က တဘက်နဲ့ တဘက် သဘောတူထားတဲ့ စစ်အကျဉ်းသားဖလှယ်ရေး သဘောတူညီချက်ကို ဖောက်ဖျက်ပြီး အကျဉ်းသား တွေကို လွှတ်ပေးလိုက်ပါတယ်။ ဆွေးနွေးပွဲ ပျက်ပြားဖို့ နည်းမျိုးစုံနဲ့ ကြံစည်ပါတယ်။ ဒါပေမယ့် အထိနာနေပြီဖြစ်တဲ့ အမေရိကန်တပ်မှူးတွေနဲ့ တရုတ်၊ မြောက်ကိုးရီး ယား တပ်မှူးတွေကို ဆွေးနွေးပွဲကို အပျက်မခံကြတော့ပါဘူး။ (၁၉၅၃) ခုနှစ်၊ ဇွန်လ (၂၇) ရက်နေ့မှာပဲ ARMISTICE ကို သဘောတူ လက်မှတ်ရေးထိုးလိုက်ကြပါတော့တယ်။ သုံးနှစ်၊ သုံးလနဲ့ သုံးရက်ကြာခဲ့တဲ့ စစ်ကြီးကတော့ ပြီးဆုံးသွားပါပြီ။

စစ်ပွဲကြီး အပြီးမှာ

(၁၉၅၃) ခုနှစ်၊ ဇွန်လ (၂၇) ရက်နေ့မှာ UN Command ဘက်က General William K. Harrison နဲ့ ကွန်မြူနစ်အင်အား စုတွေဘက်က Nam II တို့က armistice ကို လက်မှတ်ရေးထိုးခဲ့ကြပါတယ်။ ဒီစာချုပ်မှာ အပြီးသတ်ငြိမ်းချမ်းရေးစာချုပ် အတွက် နိုင်ငံတကာ ကွန်ဖရင့်တခုကျင်းပဖို့ သတ်မှတ်ချက် ပါရှိပါတယ်။ ဒီသတ်မှတ်ချက်အရ (၁၉၅၄) ခု၊ အေပြီလမှာ အမေရိကန်၊ ဗြိတိန်၊ ပြင်သစ်၊ ဆိုဗီယက်ယူနီယံ၊ တရုတ်တို့က နိုင်ငံခြားရေး ၀န်ကြီးတွေ တက်ရောက်ခဲ့ကြပါတယ်။ ယူအင်ဘက်က ကိုးရီးယားကျွန်းဆွယ်တခုလုံးမှာ ယူအင်က စောင့်ကြည့်တဲ့ ရွေးကောက်ပွဲတွေ ကျင်းပပြီး ကိုးရီးယားကို ပြန်လည်ပေါင်းစည်းဖို့ အကြံပြုချက်တင်ပါတယ်။ ကွန်မြူနစ်တွေဘက်က ကိုးရီးယားမြေပေါ်မှာ ရောက်နေတဲ့ နိုင်ငံခြားတပ်တွေအားလုံး ရွေးကောက်ပွဲမတိုင်မီ ထွက်ခွာပေးဖို့ တောင်းဆိုပါတယ်။ ဒီအကြံပြုချက်၊ တောင်းဆိုချက်တွေနဲ့ ပတ်သက်ပြီး ဘယ်လိုမှ ဆက်လက်ညှိနှိုင်းလို့ မရခဲ့ပါဘူး။ (၁၉၅၃) ခုနှစ်၊ သြဂုတ်လမှာ လက်မှတ်ရေးထိုးထားတဲ့ အမေရိ ကန်နဲ့ တောင်ကိုးရီးယား (Republic of Korea) တို့ အကြားက Mutual Defence Treaty က အောက်တိုဘာလ ကတည်းက အသက်ဝင်နေပါပြီ။

ဒီလိုနဲ့ပဲ နောင်နှစ်ပေါင်း ခြောက်ဆယ်နီးပါး အချိန်ကာလအထိ အမေရိကန် eighth US Army, US Air Forces Korea (USAFK), US Naval Forces Korea (CNFK), Marine Forces Korea (MARFORK) တို့ကလဲ Combined Forces Command ရဲ့ အစိတ်အပိုင်းတခုအနေနဲ့ တပ်စွဲထားဆဲပါပဲ။ တောင်ကိုးရီးယားနဲ့ မြောက်ကိုးရီးယားကလဲ ကွဲပြားနေဆဲပါပဲ။

မိုင်ပေါင်း (၁၆၀) ရှည်လျားပြီး၊ နှစ်မိုင်ခွဲ အကျယ်ရှိတဲ့ ကိုးရီးယားနှစ်နိုင်ငံအကြားက Demilitarized Zone (DMS) မှာ ဖြစ်ပွားခဲ့တဲ့ တင်းမာမှုတွေ၊ nuclear tensions တွေ၊ Naval clashes တွေကလဲ အများအပြားပါ။ ၁၉၆၆ ခု၊ အောက်တိုဘာလမှာ စတင်ခဲ့တဲ့ သုံးနှစ်ကြာ DMS ပဋ္ဋိပက္ခမှာ အမေရိကန်တပ်သား လေးဆယ်ကျော်အပါအ၀င် တောင်ကိုးရီးယားတပ်သား သုံးရာနီးပါးနဲ့ မြောက်ကိုးရီးယားတပ်သား လေးရာကျော် သေဆုံးခဲ့ပါတယ်။ (၁၉၆၈) ခုမှာ ဖြစ်ပွားခဲ့တဲ့ တောင် ကိုးရီးယားသမ္မတ လုပ်ကြံသတ်ဖြတ်ရန် ကြိုးပမ်းမှုမှာလဲ မြောက်ကိုးရီးယား ကွန်မင်ဒိုတွေအပါအ၀င် တောင်ကိုးရီးယား ရဲတွေနဲ့ အရပ်သားတွေမှာ သေဆုံးခဲ့ပါတယ်။ (၁၉၆၈)၊ (၁၉၆၉)၊ (၁၉၇၀) ခုနှစ် တွေမှာလဲ မြောက်ကိုးရီးယားကွန်မင်ဒိုများက တောင်ကိုးရီးယား နယ်စပ်ကို ဖြတ်ကျော်တိုက်ခိုက်မှုတွေ ဖြစ်ခဲ့ပါတယ်။

(၁၉၇၄) ခုနှစ်မှာတော့ မြောက်ကိုးရီးယားကနေ တောင်ကိုးရီးယားကို ကျူးကျော်ဝင်ရောက်ဖို့ ဆောက်လုပ်ထားတဲ့ ဥမင် လှိုဏ်ခေါင်းတခုကို တောင်ကိုးရီးယားတပ်တွေက ရှာဖွေတွေ့ရှိခဲ့ပါတယ်။ (၁၉၇၅) ခုနှစ်မှာ ဒုတိယ ဥမင်လှိုဏ်ခေါင်း တခုကို ထပ်မံ ရှာဖွေ တွေ့ရှိခဲ့ပါတယ်။ (၁၉၇၆) ခုနှစ်မှာလဲ နယ်စပ်ကို ဖြတ်ကျော်လာတဲ့ မြောက်ကိုးရီးယားကွန်မင်ဒိုတွေနဲ့ တောင်ကိုးရီးယားတပ်တွေ ထိတွေ့မှာ ဖြစ်ပွားခဲ့ပြီး၊ သြဂုတ်လမှာတော့ ကမ္ဘာကျော် The Axe Murder Incident ဖြစ် ပွားခဲ့ပါတယ်။ (၁၉၇၇) ခုနှစ်မှာတော့ မြောက်ကိုးရီးယားနယ်မြေထဲကို ကျွံသွားတဲ့ American CH-47 Chinook helicopter ပစ်ချခံခဲ့ရပါတယ်။ (၁၉၇၈) ခုနှစ် မှာ တတိယ ဥမင်လှိုဏ်ခေါင်းတခုကို တောင်ကိုးရီးယားတပ်တွေက ရှာဖွေ တွေ့ရှိခဲ့ပါတယ်။ (၁၉၇၉) ခုနှစ်မှာလဲ မြောက်ကိုးရီးယားအေးဂျင့်များရဲ့ ကျုးကျော်ဝင်ရောက်မှုတွေ ရှိခဲ့ပြီး၊ မြောက်ကိုးရီး ယားမိုင်းကွင်းထဲကို တပ်ကျွံသွားတဲ့ အမေရိကန်တပ်သားအချို့လဲ သေဆုံး ဒဏ်ရာရမှုတွေ ရှိခဲ့ပါတယ်။ (၁၉၈၀) ကနေ (၁၉၉၂) ခုအထိမှာလဲ မြောက်ကိုးရီးယားကျူးကျော်မှုတွေ ရှိခဲ့ပြီး၊ (၁၉၉၀) မှာတော့ ဥမင်လှိုဏ်ခေါင်းတွေ ထပ်မံ ရှာဖွေတွေ့ရှိခဲ့ပါတယ်။ (၁၉၉၄) ခုနှစ်မှာ မြောက်ကိုးရီးယားနယ်မြေထဲကို ဆယ်ကီလိုမီတာကျော်ပြီး ၀င်သွားတဲ့ American OH-58A+ helicopter ပစ်ချခံခဲ့ရပါတယ်။ (၁၉၉၆) ခုနှစ်မှာ Joint Security Area ထဲကို မြောက်ကိုးရီးယား တပ်တွေ ၀င်ရောက်မှု သုံးကြိမ်ဖြစ်ပွားခဲ့ပါတယ်။ (၁၉၉၇) ခုနှစ်ကနေ (၂၀၀၆) ခုနှစ်အထိ တောင်ကိုးရီးယား နယ်စပ်ကို ကျူး ကျော်ဖို့ အားထုတ်မှုတွေ ဆက်လက်ဖြစ်ပွားခဲ့ပါတယ်။

(၂၀၀၆) ခုနှစ်မှာ မြောက်ကိုးရီးယားက ပထမဆုံး နယူးကလီးယား စမ်းသပ်မှု စတင်ပြုလုပ်ခဲ့ပြီး၊ (၂၀၀၉) ခုနှစ်မှာ ဒုတိယအကြိမ် စမ်းသပ်မှု ပြုလုပ်ခဲ့ပါတယ်။ nuclear tensions တွေအပြင် naval clash တွေလဲ

အများအပြား ဖြစ်ပွားခဲ့ပါ တယ်။ (၁၉၉၉) ခုနှစ်မှာ မြောက်ကိုးရီးယား ကင်းလှည့်ရေယာဉ် ခြောက်စီးဟာ Yellow Sea Maritime Border ကို ကျူး ကျော်ဝင်ရောက်ခဲ့တဲ့အတွက် တောင်ကိုးရီးယားရေတပ်နဲ့ ထိတွေ့မှု ကိုးကြိမ်ဖြစ်ပွားခဲ့ပါတယ်။ (၂၀၀၉) ခုနှစ်၊ ဇူလိုင်လ မှာ မြောက်ကိုးရီးယား ရေပိုင်နက်ထဲကို ရောက်သွားတဲ့ တောင်ကိုးရီးယား ငါးဖမ်းရေယာဉ်ကို မြောက်ကိုးရီးယားရေတပ် က ဖမ်းဆီးထိန်းသိမ်း ထားမှု ဖြစ်ပွားခဲ့ပါတယ်။ (၂၀၀၉)ခုနှစ်၊ စက်တင်ဘာလမှာ တောင်ကိုးရီးယား ရေပိုင်နက်ထဲကို မြောက်ကိုးရီးယား naval vessel တစီးက ၀င်ရောက်မှု ဖြစ်ပွားခဲ့ပါတယ်။ (၂၀၁၀) ခုနှစ်၊ မတ်လမှာတော့ တောင်ကိုးရီး ယား စစ်ရေယာဉ် Cheonan ကို မြောက်ကိုးရီးယား စစ်ရေယာဉ်က တော်ပီဒိုနဲ့ ပစ်ခတ်ပြီး နစ်မြှုပ်ပစ်ခဲ့ပါတယ်။

ဒီလိုနဲ့ (၂၀၁၀)၊ နိုဝင်ဘာလမှာတော့ မြောက်ကိုးရီးယားတပ်တွေက တောင်ကိုးရီးယား Yeonpyeong island ကို လက်နက်ကြီးများနဲ့ ပစ်ခတ်တိုက်ခိုက်ရာက တောင်ကိုးရီးယားဘက်က ပြန်လည် တိုက်ခိုက်မှုတွေ ဖြစ်ပွားခဲ့ပါတယ်။ နှစ်နိုင်ငံ အကြား စစ်ရေးတင်းမာမှုတွေ ဖြစ်ပွားခဲ့ပြီး တောင်ကိုးရီးယားဘက်က K-9 155mm self-propelled howitzers တွေ အသုံးပြုရုံမက လေတပ် F-16 jets တွေကို ပဋိပက္ခဖြစ်ပွားရာ ဒေသကို စေလွှတ်တဲ့အထိ ဖြစ်ခဲ့ပါတယ်။

ဒီလိုအခြေအနေမှာ ၂၁ရာစု၊ ကိုးရီးယားစစ်ပွဲကြီး ထပ်မံဖြစ်ပွားလာတော့မှာကို ကမ္ဘာ့နိုင်ငံရေးဇာတ်ခုံက ရင်တမမနဲ့ စိုးရိမ်ခဲ့ကြရပါတယ်။ ၂၁ ရာစုမှာ ကမ္ဘာ့အင်အားကြီးနိုင်ငံတွေအကြားက စစ်ရေးအသွင်နဲ့ ထိပ်တိုက်ရင်ဆိုင် ထိတွေ့မှုကို အင်အားကြီးနိုင်ငံတွေက စစ်ခေါင်းဆောင်များအပါအ၀င် မည်သူမျှ လိုလားခြင်းမရှိကြပါဘူး။ Character of war က ၂၁ ရာစုမှာ ပြောင်းလဲသွားခဲ့ပါပြီ။ Deterrence strategy ကို အသုံးပြုကြပေမယ့် conflict escalation ဆက်မဖြစ်သွား အောင် ထိန်းထိန်းသိမ်းသိမ်း လုပ်ကြပါတယ်။

နိဂုံး

နိဂုံးချုပ်ဆိုရရင် လွန်ခဲ့တဲ့ နှစ်ပေါင်းခြောက်ဆယ်ကျော်ကာလက ဖြစ်ပွားခဲ့တဲ့ ကိုးရီးယား စစ်ပွဲဟာ လူမျိုးရေး၊ ဘာသာရေး၊ အိုင်ဒီရော်လော်ဂျီတွေပေါ်မှာ အခြေခံတဲ့ ပဋိပက္ခတွေ ရှိနေတဲ့ နိုင်ငံငယ် လေးတွေကို သင်ခန်းစာတွေ အများကြီး ပေးခဲ့ပါတယ်။ နိုင်ငံတနိုင်ငံရဲ့ အနာဂတ်အရေးကို အဖြူ၊ အမည်း ကွဲပြားမှု လိုင်းတခုတည်းပေါ်ကနေ ဆုံးဖြတ်လို့ မရပါဘူး။ စစ်ရေးအမြင်၊ နိုင်ငံရေးအမြင်၊ စီးပွားရေးအမြင်၊ လူမှုရေး အမြင်၊ နိုင်ငံတကာရေးရာ ရှုထောင့်တွေ အားလုံးကို ထည့်သွင်းတွက်ချက်ပြီး သုံးသပ်ကြရမှာ ဖြစ်ပါတယ်။ နိုင်ငံတခုရဲ့ နိုင်ငံရေးအကူးအပြောင်း ကာလတွေကိုလဲ အမြော်အ မြင်ကြီးစွာနဲ့ စနစ်တကျပြင်ဆင်စီမံကြဖို့ လိုအပ်ပါတယ်။ ကိုလိုနီစနစ် အဆောက်အအုံကြီးကို ဖြိုချမယ်၊ ဘုံရန်သူကို ဖြို မယ်ဆိုပြီး အကြမ်းမဖက်တော်လှန်ရေးလုပ်ခဲ့တဲ့ India နိုင်ငံကြီးလဲ လွတ်လပ်ရေးရတာမှ မကြာသေးခင် ခေါင်းဆောင်ပါ လုပ်ကြံခံရပြီး ပြည်တွင်းစစ်တွေနဲ့ နှစ်ခြမ်းစကွဲသွားခဲ့ရာက ထပ်ဆင့် ကွဲပြဲမှုတွေပါ ကြုံခဲ့ရဖူးပါတယ်။ လက်နက်ကိုင် တော်လှန်ရေးတွေ၊ လူထုတိုက်ပွဲတွေ ပေါင်းစပ်ပြီး ဖြိုခဲ့တဲ့ မြန်မာနိုင်ငံမှာလဲ လွတ်လပ်ရေး မရခင်ကတည်းက ခေါင်း ဆောင်တွေ လုပ်ကြံခံရပြီး ပြည်တွင်းစစ်တွေ ဖြစ်လိုက်တာ ဆယ်စုနှစ်ပေါင်းများစွာပါပဲ။ ဒီလိုနိုင်ငံတွေ ကမ္ဘာတ၀ှမ်းလုံးမှာ အများကြီးရှိခဲ့ပါတယ်။

ဒါတွေကို ကိုလိုနီအမွေဆိုးကြောင့်ဆိုပြီး ဒေါသထွက်ကြ၊ စိတ်နာကြနဲ့ အချိန်တွေ ကုန်လာကြရင်း၊ ကိုယ့်ဘက်က အားနည်းခဲ့ကြတဲ့ ညီညွတ်ရေးတည်ဆောက်မှု၊ နိုင်ငံရေးအတွေးအခေါ် အားနည်းမှု၊ မင်းလောင်းမျှော်မှု၊ ခေါင်းဆောင်ကိုးကွယ်မှု၊ နောက်ကျောဓားထိုးမှု စတဲ့ အမွေဆိုးတွေကိုတော့ တယုတယ အမွေဆက်ခံလာကြတဲ့ နိုင်ငံလေးတွေလဲ အများကြီးရှိနေဆဲပါ။ စနစ်ဆိုတဲ့ အဆောက်အဦး တခုကို ဖြိုချရင်ပဲဖြစ်ဖြစ်၊ ပြုပြင်ရင်ပဲဖြစ်ဖြစ် ကြိုတင်တွက်ချက် စဉ်းစားထား ရမယ့် အချက်အလက်တွေ၊ ရှုမြင်သုံးသပ်ပြင်ဆင်ထားရမယ့် ကဏ္ဍတွေကလဲ အများအပြားပါ။ စဉ်းစားသုံးသပ်၊ ပြင်ဆင် ထားကြဖို့ လိုအပ်ပါတယ်။

ပိုပြီး အရေးကြီးတာက စနစ်တခုကို ဖြိုချပြီး အသစ်ပြန်ဆောက်ဖို့၊ ပြုပြင်ဖို့ အခွင့်အာဏာကို လုကြရင်းနဲ့ တရားရုံးမှာ အမွေတက်လုကြတဲ့ ညီအစ်ကိုတွေလို မဖြစ်အောင် ဂရုစိုက်ဖို့ လိုပါတယ်။ ညီအစ်ကိုချင်း ညှိနှိုင်းဆွေးနွေးလို့ ရပါရက်နဲ့ ရှေ့နေတွေ အပြန်အလှန်ငှားပြီး တရားရုံးမှာ ဦးတည်လျှောက်ကြတဲ့အခါ တော်တည့်ဖြောင့်မတ်တဲ့ ဥပဒေဘက်တော် သားတွေနဲ့တွေ့ရင်တော့ ကံကောင်းပါရဲ့။ အစကတည်းက ပြိုင်ဘက်ဖြစ်နေတဲ့ ရှေ့နေတွေ၊ နှစ်ဘက်ခွစားတဲ့ တရားသူ ကြီးတွေနဲ့ တွေ့လို့ကတော့ အမှုကြာပြီး ဟိုက စားလိုက်၊ ဒီက စားလိုက်နဲ့ ရှိသမျှအမွေတွေ ပြောင်သလင်း ခါသွားနိုင်ပါတယ်။ ဒီအချက်ကို နိုင်ငံတော်အနာဂတ်ကြီးကို ဦးဆောင်ဦးရွက်ပြုလိုကြတဲ့ စစ်ခေါင်းဆောင်တွေ၊ အတိုက်အခံ နိုင်ငံရေး ခေါင်းဆောင်တွေနဲ့ ခေါင်းဆောင်လို့ မိမိကိုယ်ကို သတ်မှတ်နေကြသူများ အားလုံး သတိပြုကြဖို့ လိုအပ်ပါ တယ်။

နောက်တချက်က ၂၁ရာစုရဲ့ စစ်ပွဲသဏ္ဍာန်တွေဟာ ပြောင်းလဲနေပြီဆိုတာကို ကမ္ဘာ့နိုင်ငံရေး ရေချိန်နဲ့ အညီ ရှုမြင်တတ် ဖို့ လိုပါတယ်။ (၂၀) ရာစုက Cold War Dilemma လေးကိုပဲ ဦးနှောက်ထဲ ထည့်ထားကြရင်တော့ (၂၁) ရာစုမှာ အသွင်အမျိုးမျိုးနဲ့ ပေါ်ပေါက်နေတဲ့ တခြားစစ်ပွဲတွေရဲ့ သားကောင်ဘ၀ကို ကျရောက်သွားပါလိမ့်မယ်။ တဘက်နဲ့တဘက် အနိုင်တိုက်ဖို့ ကြိုးစားကြရင်း အမျိုးသားအကျိုးစီးပွားကို အမှန်တကယ် ခြိမ်းချောက်လာတဲ့ အန္တရာယ်တွေကို ဥပေက္ခာ ပြုထားကြမယ် ဆိုရင် ဒါတွေရဲ့ ဆိုးကျိုးအမွေတွေကို နောင်လာနောက်သား မျိုးဆက်တွေ ခံစားကြရ ပါလိမ့်မယ်။

ကိုးရီးယားစစ်ပွဲကြီး ဖြစ်ပွားခဲ့ရတာဟာ လွန်ခဲ့တဲ့ နှစ်ခြောက်ဆယ်ကျော်က ကိုးရီးယား ခေါင်းဆောင်တွေရဲ့ ဆင်ခြင်တုံတရား နည်းပါးမှု၊ အာဏာ မက်မောမှု၊ အမြော်အမြင်နည်းမှု၊ ကျွန်စော်နံမှု၊ သူတပါးကြိုးဆွဲသမျှ ရုတ်သေးက လိုက်ကမှု၊ အင်အားကြီးနိုင်ငံတွေ ၀င်ရောက်ခြယ်လှယ်တာကို တဘက်နဲ့ တဘက် အပြန်အလှန် လက်ခံစွပ်စွဲကြရင်း မိမိတို့ အချင်း ချင်းကြားက အမျိုးသား သွေးစည်းညီညွတ်ရေးကို မတည်ဆောက်နိုင်မှု၊ အိမ်ကြက်ချင်း အိုးမဲသုတ် ခွပ်ခိုင်းတာကို အဟုတ် မှတ်ပြီး အသေခံခွပ်လိုမှု၊ နိုင်ငံရေးအစွန်းရောက်မှု၊ တိုင်းပြည်ရဲ့ အချုပ်အခြာအာဏာနဲ့ နယ်မြေပိုင်နက်ကို တန်ဖိုးမထားပဲ ပေးတာယူကျွေးတာစားရရေးအတွက် နယ်နိမိတ်ပိုင်းခြား သတ်မှတ်မှု တွေကို လက်ခံမှု စတာတွေကြောင့်ပဲ ဖြစ်ပါတယ်။ ဒါကြောင့် မြန်မာ့နိုင်ငံရေးခေါင်းဆောင်တွေ အပါအ၀င် ပြည်သူလူထုကြီး အနေနဲ့ ကိုးရီးယားစစ်ပွဲက သင်ခန်းစာများကို ဆင်ခြင်သုံးသပ်ရင်း၊ ၂၁ ရာစုမှာ ပြောင်းလဲလာတဲ့ စစ်ပွဲသဏ္ဍာန်တွေ ကိုလဲ မျက်ခြေမပြတ် အကဲခတ်ရင်း နိုင်ငံတော် အနာဂတ်အတွက် အရေးကြီးတဲ့ သုံးသပ်ပြင်ဆင်ချက်များ၊ ဆုံးဖြတ်ချက်များကို လုပ်ဆောင်ကြဖို့ လိုအပ်လှပါ ကြောင်း ရေးသားတင်ပြအပ်ပါတယ်။

ခင်မမမျိုး (၂၁၊ ၁၊ ၂၀၁၁)

ရည်ညွှန်းကိုးကား။ ။

Catchpole, B. (2001) The Korean War 1950-53, Constable Robinson

Chant, C. (1992) The Military History of the United States. Vol. 11, The Korean War, New York, Marshall Cavendish

Grant, R. (2004) Atlas of Conflicts: The Korean War, WAL, Milwaukee

Malkasian, C. (2001) The Korean War 1950-1953, Essential History Series, Fitzroy Dearborn

ROK Ministry of Defence, “Response to ‘Rush to judgement’”, 27 July 2010

Summers, H. (1990) Korean War Almanac, New York: Facts on File

စာရေးသူ၏ ကိုယ်ရေးအကျဉ်း

ကလောင်အမည်-ခင်မမမျိုး

မွေးဖွားရာဇာတိ-တောင်ကြီးမြို့၊ မြန်မာနိုင်ငံ

လက်ရှိနေရပ်-အဘာဒင်းမြို့၊ ယူကေနိုင်ငံ

ပညာအရည်အချင်း-နိုင်ငံရေးနှင့် အစိုးရရေးရာ ဒီပလိုမာ၊ နိုင်ငံတကာလေ့လာရေး ဘီအေဂုဏ်ထူးဘွဲ့၊

နိုင်ငံရေးဘောဂဗေဒ မဟာဝိဇ္ဇာဘွဲ့၊

စစ်မဟာဗျူဟာလေ့လာရေး မဟာသိပ္ပံဘွဲ့၊

နိုင်ငံရေးသုတေသန မဟာသုတေသနဘွဲ့။

လက်ရှိ-နိုင်ငံရေးသိပ္ပံ ပါရဂူဘွဲ့ကျောင်းသူ၊ ဘုရင့်ကောလိပ်

အဘာဒင်းတက္ကသိုလ်။

တွဲဖက်သုတေသီ၊ ကောဘက်စင်တာ၊

စစ်ဦးစီး တက္ကသိုလ်။

ပရော်ဖက်ရှင်နယ်အဖွဲ့ဝင်-နိုင်ငံတကာ လုံခြုံရေးအဖွဲ့၊ နိုင်ငံတကာ လေ့လာရေးအသင်း၊ အမေရိကန်ပြည်ထောင်စု။

လုံခြုံရေးနှင့် ထောက်လှမ်းရေး ဆိုင်ရာ ကျွမ်းကျင် ပညာရှင် အဖွဲ့၊ နိုင်ငံရေးရာ လေ့လာရေးအသင်း၊ ဗြိတိန်နိုင်ငံ။

အကြမ်းဖက်မှုနှိမ်နင်းရေးနှင့် လုံခြုံရေး ဆိုင်ရာ နိုင်ငံတကာ ကျွမ်းကျင် ပညာရှင်များ အစည်းအရုံး၊ အမေရိကန် ပြည်ထောင်စု။

ယဉ်ကျေးမှုရေးရာ သံတမန်သိပ္ပံ၊ ဂျာမဏီ။

ပြိုင်တူတွန်းလျှင် ရွှေ့ နိုင်သည် ။