ဇူလိုင်လ ၁၃ ရက်နေ့တွင် ကွတ်ခိုင်မြို့နယ် မဲဆန္ဒနယ်မှ ကြံ့ခိုင်ရေးပါတီ၏ အမတ် ဦးတီခွန်မြတ်က အဆိုပါ ဥပဒေ
ပြဋ္ဌာန်းပေးရန် တောင်းဆိုခဲ့ခြင်း ဖြစ်သည်။
ထိုအဆိုကို ချင်းပြည်နယ်၊ ထန်တလန် မဲဆန္ဒနယ်မှ လွှတ်တော်ကိုယ်စားလှယ် ဒေါ်ဇာတလဲမ်းက ထောက်ခံဆွေးနွေး ရာတွင် ပင်လုံစာချုပ်တွင် ပါဝင်သည့် တိုင်းရင်းသားများကို အုပ်ချုပ်ရေးတွင် ကိုယ်တိုင်စီရင် ခွင့်ပေးမည်၊ တန်းတူညီတူ အခွင့်အရေး ရရှိစေရမည်ဟူသည့် အချက်များကို ထောက်ပြပြောဆိုကာ အဆိုပါ အခွင့်အရေးများ ယနေ့အချိန်ထိ မရရှိသေးကြောင်း ထည့်သွင်း ပြောဆိုသွားသည်။
တိုင်းရင်းသား
လူမျိုးများ၏ အခွင့်အရေး ကာကွယ်စောင့်ရှောက်သည့် ဥပဒေရေးဆွဲပြဋ္ဌာန်းရေး
အဆိုကို တနင်္လာနေ့ ပြည်သူ့ လွှတ်တော်တွင် တိုင်းရင်းသား လွှတ်တော်အမတ်များက
ထောက်ခံဆွေးနွေး (ဓါတ်ပုံ မျိုးသန့် / မဇ္ဈိမ)
ထို့အပြင် “ချင်းတိုင်းရင်းသားနှင့် ခရစ်ယာန်ဘာသာဝင်များမှာ ဗိုလ်မှူးကြီးအဆင့်နှင့် ရာထူးကြီးမားသော အဆင့်များမှ ခွဲခြားမှုများ၊ ဘာသာရေး အခွင့်အလမ်းများ ဘာသာရေး အဆောက်အအုံများ ဆောက်တဲ့အခါများတွင်လည်း လွတ်လပ် မှုမရှိပါဘူး။ နိဂုံးချုပ်အနေနဲ့ စာအုပ်ပေါ်မှာ ရှိတဲ့ ဥပဒေ မဟုတ်ဘဲနဲ့ လက်တွေ့ အကောင်အထည် ဖော်ဆောင်ရွက်ဖို့ လိုပါတယ်” ဟု ဆွေးနွေးသွားသည်။
ဟုမ္မလင်း မဲဆန္ဒနယ်မှ ဦးအေးကလည်း ကချင်ပြည်နယ်နှင့် ရှမ်းပြည်နယ်များအတွင်း နေထိုင်ကြသည့် တိုင်းလိုင်း(ခေါ်) တိုင်းနိုင် တိုင်းရင်းသားတို့ ကိုယ်ပိုင် စာပေသင်ကြားခွင့်မရခြင်း၊ ဘာသာစကားနှင့် ယဉ်ကျေးမှုများတို့ကို ခေတ် အဆက်ဆက် အာဏာပိုင်တို့မှ အားမပေး၍ ပျောက်ကွယ်သွားရကြောင်း ဆွေးနွေးတင်ပြသွားသည်။
“လမ်းစဉ်ပါတီခေတ်မှာ ပြည်နယ်တခု တောင်းဆိုလာမှာ စိုးရိမ်မှုရယ်၊ ရှမ်းပြည်နယ် နည်းတူ အခြားအခွင့်အရေး
တောင်းဆိုမှာ စိုးရိမ်တာကြောင့် ဖိနှိပ်ခံခဲ့ကြရပါတယ်။ မိမိတို့ နှစ်သစ်ကူး ပွဲတော်တောင် ကျင်းပခွင့်မရခဲ့ကြပါဘူး။ ရှမ်းဘာသာစကားကို စာသင်ကျောင်းတွေမှာ ပြောဆိုခွင့် မရခဲ့ကြပါဘူး” ဟု ဆွေးနွေးသွားသည်။
ထို့အပြင် တိုင်းရင်းသားရေးရာ ဝန်ကြီးများ၏ အာဏာနှင့် လုပ်ပိုင်ခွင့် မရှိခြင်းကိုလည်း “တိုင်းရင်းသားရေးရာ ဝန်ကြီး များကလည်း ဖွဲ့စည်းပုံအခြေခံဥပဒေရဲ့ ခွင့်ပြုထားတဲ့အတိုင်း အပြည့်အဝ ခံစားရရှိခြင်း မရှိရသေးပါ။ လွှတ်တော်မှာ တိုက်ယူ၊ တောင်းယူနေကြတဲ့အထိ ဖြစ်နေပါသေးတယ်။ ဒါဟာလည်း ကောင်းတဲ့ လက္ခဏာ မဟုတ်ပါဘူး” ဟု ဦးအေးက ထည့်သွင်း ဆွေးနွေးသွားသည်။
တိုင်းရင်းသားအခွင့်အရေး ဥပဒေပြဋ္ဌာန်းပေးရန် အဆိုကို ဆွေးနွေးရန် လွှတ်တော်အမတ် ၂၇ ဦး စာရင်းပေးသွားထားပြီး တနှစ်ကျော်ကြာ လွှတ်တော်သမိုင်းတလျှောက် အမတ်ဦးရေ အများဆုံး ဆွေးနွေးသည့် အဆိုလည်း ဖြစ်သည်။
ထိုအဆိုကို အမျိုးသားဒီမိုကရေစီအဖွဲ့ချုပ် ဥက္ကဋ္ဌ ဒေါ်အောင်ဆန်းစုကြည်လည်း ပါဝင်ဆွေးနွေးရန် စာရင်းပေးသွင်း ပြီးဖြစ်သည်ဟု သိရသည်။
တိုင်းရင်းသား အခွင့်အရေး ဥပဒေပြဋ္ဌာန်းပေးသင့်ကြောင်း နေပြည်တော် သမ္မတ အိမ်တော်တွင် ဇွန်လ ၃ ရက်နေ့က
ပြုလုပ်သည့် ပြည်ထောင်စု ငြိမ်းချမ်းရေး ဖေါ်ဆောင်ရေး ဗဟိုကော်မတီ နှစ်လ ပြည့်သည့်နေ့ ပထမဆုံး စည်းဝေးမှုတွင် သမ္မတ ဦးသိန်းစိန်က ပြောကြားသွားခဲ့သေးသည်။
ပြိုင်တူတွန်းလျှင် ရွှေ့ နိုင်သည် ။
No comments:
Post a Comment