ဒေါ်အောင်ဆန်းစုကြည်နဲ့ သမ္မတ တွေ့ဆုံဆွေးနွေးချက်တွေကို ပါတီ ထောက်ခံ ကြိုဆို
2011-08-22
သမ္မတ ဦးသိန်းစိန်နဲ့ မြန်မာ့ ဒီမိုကရေစီ ခေါင်းဆောင် ဒေါ်အောင်ဆန်းစုကြည်တို့ နေပြည်တော်မှာ တွေ့ဆုံ ဆွေးနွေး သဘောတူခဲ့တာတွေကို NLD အမျိုးသား ဒီမိုကရေစီ အဖွဲ့ချုပ် ဗဟိုအလုပ် အမှုဆောင်အဖွဲ့က ဒီနေ့သဘောတူ ကြိုဆို ထောက်ခံ လိုက်ပါတယ်။သမ္မတနဲ့ တွေ့ဆုံ ဆွေးနွေးခဲ့တာတွေနဲ့ ပတ်သက်ပြီး NLD အလုပ် အမှုဆောင် အဖွဲ့ကို ဒေါ်အောင်ဆန်းစုကြည်က ဒီကနေ့ ပြန်လည် ရှင်းပြ တင်ပြခဲ့တယ်လို့ သိရပါတယ်။ ပါတီပြောခွင့်ရသူ ဦးဥာဏ်ဝင်းကို RFA က ဆက်သွယ်မေးမြန်းရာမှာ ဒေါ်အောင်ဆန်းစုကြည်ဟာ တိုင်းပြည်နဲ့ ပြည်သူလူထု အတွက် လက်တွေ့ အကျိုးရှိတဲ့ ကိစ္စရပ်တွေကို ဆွေးနွေး သဘောတူညီချက်တွေ ရခဲ့ကြောင်း၊ သဘောတူညီချက်တွေ အများကြီး ရှိရာမှာ ထင်ရှားတဲ့ ကိစ္စတွေ ကတော့ တိုင်းရင်းသား ကိစ္စ၊ ငြိမ်းချမ်းရေး ကိစ္စ၊ နိုင်ငံရေး ကိစ္စတွေ ပါဝင်ကြောင်း၊ အသေးစိတ်ကိုတော့ ထုတ်ပြန် ပြောဆိုနိုင်ခြင်း မရှိသေးကြောင်း ဖြေကြားခဲ့ ပါတယ်။ ဒီကနေ့ ကျင်းပတဲ့ အစည်းအဝေးမှာ ဆွေးနွေး ဆုံးဖြတ်ချက် အရ ဆွေးနွေး သဘောတူချက်တွေကို ကြေညာချက် ထုတ်ပြန် ကြိုဆိုတာကို ပြန်ကြားရေး တာဝန်ခံ ဦးအုန်းကြိုင်က ဖတ်ကြားပြပါတယ်။ "နိုင်ငံတော် သမ္မတနှင့် ဒေါ်အောင်ဆန်းစုကြည်တို့သည် မတူကွဲပြားသော အမြင်များ ဘေးဖယ်ထားပြီး နိုင်ငံနှင့် ပြည်သူလူထုအတွက် အမှန်တကယ် အကျိုးရှိစေမည့် ဗဟိုအကျိုးစီးပွါးများတွင် ပူးပေါင်းဆောင်ရွက်နိုင်မည့် အလားအလာများအား ရင်းနှီး ပွင့်လင်းစွာ ပြုခဲ့ကြောင်း မြန်မာ့ သတင်းစဉ်က ထုတ်ပြန်ခဲ့ပြီး ဖြစ်ပါသည်။ ထိုဆွေးနွေးချက်များကို အမျိုးသား ဒီမိုကရေစီ အဖွဲ့ချုပ် အထွေထွေ အတွင်းရေးမှူးချုပ် ဒေါ်အောင်ဆန်းစုကြည်က ၀မ်းမြောက် အားရမှုရှိကြောင်း ဗဟိုအလုပ်အမှုဆောင် အဖွဲ့သို့ ရှင်းလင်း တင်ပြခဲ့ပါသည်။" ဆက်လက်ပြီး ဒေါ်အောင်ဆန်းစုကြည်ဟာ နိုင်ငံတော်စီးပွားရေးဖွံ့ဖြိုးတိုးတက်မှုအတွက် ပြုပြင် ပြောင်းလဲမှု ဆိုင်ရာ အမျိုးသားအဆင့် အလုပ်ရုံဆွေးနွေးပွဲကိုလည်း ဒီလ ၂၀ ရက်နေ့က တက်ရောက်ခဲ့တယ်လို့ ကြေညာချက်မှာ ဖော်ပြပါတယ်။ ဒီဆွေးနွေးပွဲမှာ ဖတ်ကြားတဲ့ စာတမ်းတွေကို ဒေါ်အောင်ဆန်းစုကြည်က စိတ်ဝင်စားပြီး ပြည်ထောင်စု အစိုးရ အဖွဲ့ဝင်တွေနဲ့ တွေ့ဆုံ စကားပြောခဲ့ရတာကို ကျေနပ် ၀မ်းသာတယ်လို့ တဆက်တည်း ရေးထားပါတယ်။ ကြေငြာချက် နိဂုံးမှာတော့ မြန်မာ့ သတင်းစဉ်ပါ ထုတ်ပြန်ချက်ကို လည်းကောင်း၊ ဒေါ်အောင်ဆန်း စုကြည်ရဲ့ ရှင်းလင်း တင်ပြချက်ကို လည်းကောင်း၊ အမျိုးသား ဒီမိုကရေစီ အဖွဲ့ချုပ် ဗဟိုအလုပ် အမှုဆောင်အဖွဲ့က သဘောတူ ကြိုဆိုထောက်ခံတဲ့ အကြောင်းလည်း ဖော်ပြထားပါတယ်။ ဒေါ်အောင်ဆန်းစုကြည်ဟာ နေပြည်တော်မှာ ရှိတဲ့ သမ္မတ အိမ်တော်က သမ္မတ ရုံးခန်းမှာ သမ္မတ ဦးသိန်းစိန်နဲ့ ဒီလ ၁၉ ရက် ညနေပိုင်းမှာ ပထမဆုံး အကြိမ် တွေ့ဆုံခဲ့ပါတယ်။ ဒီတွေ့ဆုံပွဲအပေါ် ပါတီက ထောက်ခံခဲ့တာတွေနဲ့ ပတ်သက်ပြီး ပြောခွင့်ရသူ ဦးဥာဏ်ဝင်းကို RFA က ကိုဇော်မိုးကျော် ဆက်သွယ် မေးမြန်းထားတာကိုလည်း တဆက်ထဲ နားဆင်နိုင်ပါတယ်။
No comments:
Post a Comment