| ၈၈ မျိုးဆက် ကျောင်းသားများ ချောက်၊ ရေနံချောင်းနှင့် မကွေးမြို့များသို့ သွားရောက်ပြီး ငြိမ်းချမ်းရေးနှင့် ပွင့်လင်း လူ့အဖွဲ့အစည်းအကြောင်း ဟောပြော |
| Monday, 12 March 2012 10:28 | |
 မကွေးဒေသခံများအား ဟောပြောနေသည့် ၈၈ မျိုးဆက် ကျောင်းသားခေါင်းဆောင် တစ်ဦးဖြစ်သည့် ကိုမင်းကိုနိုင်အား တွေ့ရစဉ် ထိုခရီးစဉ်၏ ပထမဆုံးအနေဖြင့် ဟင်္သာတ၊ သရက်၊ အောင်လံ၊ ဇလွန်မြို့များသို့ လည်းကောင်း၊ ဒုတိယခရီးစဉ်အဖြစ် မြစ်ကြီးနားမြို့၊ မန္တလေးမြို့များသို့ လည်းကောင်း သွားရောက်ခဲ့ပြီး ချောက်မြို့NLD ရုံးခန်းဖွင့်ပွဲသို့ သွားရောက်စဉ် တတိယ ခရီးစဉ်အဖြစ် ရေနံချောင်း၊ မကွေးမြို့များသို့ သွားရောက်ခဲ့ခြင်းဖြစ်ကြောင်း သိရသည်။ ထိုတတိယမြောက်ခရီး စဉ်အဖြစ် ချောက်မြို့သို့ မတ်လ ၅ ရက်နေ့ နံနက် ၇ နာရီ မိနစ် ၃၀ ခန့် တွင် ရောက်ရှိခဲ့ကြပြီး နံနက် ၉ နာရီ တွင် ချောက်မြို့ ဦးဖိုးဟန်လမ်း၊ ဗဟိုလွှတ်သစ်ရပ်ရှိ NLD ရုံးခန်းကို ဖွင့်လှစ်ပေးခဲ့ကြောင်း၊ ထို့နောက် ကိုမင်းကိုနိုင်နှင့် ကိုဂျင်မီတို့က တက်ရောက်လာသော ချောက်မြို့ခံ ပြည်သူလူ ထုအား ငြိမ်းချမ်းရေးနှင့် ပွင့်လင်းလူ့ အဖွဲ့အစည်းအ ကြောင်း ဟောပြောခဲ့ကြောင်း၊ ထိုနေ့ မွန်းလွဲ ၁ နာရီ အချိန်တွင် ချောက်မြို့အေးစေတီ ဘုန်းကြီးကျောင်းတွင် ချောက်မြို့ပေါ်ရှိ လူမှုရေး အသင်းအဖွဲ့များ၊ ကျန်းမာရေး အသင်းအဖွဲ့များနှင့် တွေ့ဆုံ ဆွေးနွေးပွဲ ပြုလုပ်ခဲ့ပြီး ပညာရေး၊ ကျန်းမာရေး ကိစ္စများ ဆွေးနွေးခဲ့ကြကြောင်း သိရသည်။
မတ်လ ၆ ရက်နေ့ နံနက် ၇ နာ ရီခန့်က ၈၈ မျိုးဆက် ကျောင်းသားများအဖွဲ့ မကွေးမြသလွန် စေတီတော် မြတ်ကြီးသို့ သွားရောက် ဖူးမြော်ခဲ့ရာတွင်လည်း တက္ကသိုလ်ပေါင်းစုံမှ ကျောင်းသား၊ ကျောင်းသူများနှင့် မြို့ခံပြည်သူလူထုများ စီတန်းလိုက်ပါခဲ့ကြောင်း သိရသည်။ မြသလွန် စေတီတော် မြတ်ကြီးအား ဖူးမြော်ပြီးသောအခါ ၈၈ မျိုးဆက်ကျောင်းသားများ အဖွဲ့သည် မကွေးမြို့ပေါ်ရှိ ပါရမီသွေးလှူရှင်များ အသင်း၊ ကရုဏာရှင်များ နာရေးကူညီမှု အသင်းများသို့ သွားရောက်ခဲ့ပြီး ကျန်းမာရေး စောင့်ရှောက်မှုကိစ္စများ ဆွေးနွေးခဲ့ကြကြောင်း သိရသည်။ ထို့နောက် ၈၈မျိုးဆက် ကျောင်းသားများအဖွဲ့သည် ထိုနေ့ နံနက် ၈ နာရီ မိနစ် ၃၀ တွင် မကွေးမြို့ ဗိုလ်ချုပ်ပန်းခြံအတွင်းရှိ ဗိုလ်ချုပ်အောင်ဆန်းကြေးရုပ်သို့ သွားရောက်ကာ ကြေးရုပ်ရှေ့တွင် ကျဆုံးလေပြီးသော ဗိုလ်ချုပ်အောင်ဆန်းနှင့်တကွ အာဇာနည် ခေါင်းဆောင်ကြီးများအား အလေးပြုကြကြောင်း သိရသည်။ ထို့နောက် မကွေးမြို့ရွာသစ်ရပ် ၁၅ လမ်းရှိ တည်းခိုရာနေအိမ်၌ နံ နက် ၉ နာရီခန့်တွင် လူထုနှင့် တွေ့ဆုံဟောပြောပွဲ ကျင်းပခဲ့ကြောင်းသိရ သည်။ ထိုဟောပြောပွဲကို ၈၈မျိုး ဆက်ကျောင်းသားများမှ တစ်ဦးချင်း လူထုနှင့်မိတ်ဆက်၍ စတင်ခဲ့ပြီး ကိုမျိုးအောင်နိုင်၊ ကိုအံ့ဖွယ်ကျော်၊ ကိုဥာဏ်လင်း၊ ကိုဂျင်မီ၊ ကိုမင်းကိုနိုင် တို့က ဟောပြောခဲ့ကြသည်။ ကိုဥာဏ်လင်းက ဟောပြောရာ တွင် ဒီမိုကရေစီဆိုသည်မှာ ပြည်သူ အားလုံး တက်တက်ကြွကြွ ပါဝင်သည့် စနစ်ဖြစ်ကြောင်း၊ ပရဟိတနှင့် လူမှု ရေးအသင်းအဖွဲ့များ အများအပြား လိုအပ်ကြောင်း၊ နိုင်ငံတော်သမ္မတကြီး၏ မိန့်ခွန်းတွင်လည်း လူထုလူတန်းစား အဖွဲ့အစည်းများ ပေါ်ပေါက်ရန် လုပ်ဆောင်မည်ဟု ပြောကြားခဲ့ကြောင်း၊ ထိုသို့ သမဂ္ဂများနှင့် လူမှုရေးအသင်းအဖွဲ့များ ပေါ်ပေါက်လာ၍ ပြည်သူလူထု၏နစ်နာမှု၊ လိုအပ်မှုများ စုပေါင်းတောင်းဆိုရန် လိုအပ်ကြောင်း၊ ထိုသို့စုပေါင်း တောင်းဆိုနိုင်ရန် တစ်ဦးနှင့်တစ်ဦး ကျောချင်းကပ်၊ လက်ချင်းယှက်ထားမှ နေ့စဉ်ဘ၀ တိုးတက်မည် ဖြစ်ကြောင်း ပြောကြားခဲ့သည်။ ထို့နောက် ယနေ့ဒီမိုကရေစီ စနစ်ဆိုတာ ဘာလဲဆိုလျှင် ဒီမိုကရေစီ ဆိုသည်မှာ လူတွေကို သတ္တိရှိအောင်၊ လုပ်ရဲကိုင်ရဲရှိအောင် ပြုလုပ်ပေးတာ ဖြစ်ကြောင်း၊ လူတွေကို ကြောက်ရွံ့အောင် လုပ်တာသည် အာဏာရှင်ဖြစ်ကြောင်း၊ အစိုးရတစ်ရပ်ကို ကြည့်လျှင် လူတွေကိုသတ္တိရှိအောင် လုပ်ပေး သလား၊ ကြောက်အောင် လုပ်ပေးသလား ကြည့်သင့်ကြောင်း၊ ကြောက်အောင်လုပ်လျှင် အာဏာရှင်ဟု သတ်မှတ်ကြောင်း၊ အစိုးရရော ပြည်သူလူထုပါ အကြောက်တရား ကင်းဝေးရန်လိုကြောင်း၊ နိုင်ငံတော် သမ္မတကြီး ၏ ဒုတိယမိန့်ခွန်းမှာ ပထမမိန့်ခွန်းထက် ပိုမိုကောင်းမွန်ကြောင်း၊ ထိုမိန့် ခွန်းကို နားထောင်သူများမှာ မိမိတို့သာမက တိုင်းဒေသအသီးသီးရှိ ရပ်ကွက်၊ ကျေးရွာ အုပ်ချုပ်ရေးမှူးများ အထိနားထောင်ရန် လိုအပ်ကြောင်း၊ ပြုပြင်ပြောင်းလဲ လိုသည့် မည်သူ့ကိုမဆို ကြိုဆိုရမည်ဖြစ်ကြောင်း၊ ဥပဒေ မရှိဘဲ နှစ်ပေါင်းများစွာ အုပ်ချုပ်လာသော အကျင့်ကို ဒေသအာဏာပိုင်များမှ စ၍ ဖြစ်သင့်ကြောင်း၊ အုပ်ချုပ်သူတို့၏ အားနည်းချက်များကို ထိန်းကျောင်းရန် တာဝန်ရှိသည်မှာ ယခုရှိ နေသော အခြေခံပြည်သူများ ဖြစ်ကြောင်း၊ ပြည်သူ့လွှတ်တော် ဥက္ကဋ္ဌကြီး သူရဦးရွှေမန်း ကိုယ်တိုင် မှန်တာ ကိုရဲရဲပြော၍ ရဲရဲလုပ်ရန် ပြောကြားခဲ့ကြောင်း ပွင့်လင်းသော လူ့အဖွဲ့အစည်းဆိုသည်မှာ ယခုစိမ်းနေသေးသော်လည်း နောင်တွင် ဒီမိုကရေစီ ကဲ့သို့ပင် ယဉ်ပါးသွားမည် ဖြစ်ကြောင်း၊ မကျေနပ်တာကို မကျေနပ်ကြောင်း၊ လွှတ်တော်များ၊ မီဒီယာများမှ တစ်ဆင့်တင်ပြ၍ ရနေပြီဖြစ်ကြောင်း မည်သည့် အစိုးရတက်တက် ကိုယ်လုပ်မှ ကိုယ်စားရမည် ဖြစ်ကြောင်း၊ ကိုယ့်အားကိုယ်ကိုးရ မည်ဖြစ်ကြောင်း၊ ဒီမိုကရေစီအတွက် အရေးအကြီးဆုံးမှာ သတ္တိရှိရှိ လုပ်ခြင်း၊ ဗြောင်လုပ်ခြင်း၊ ဘောင်အတွင်းက ပြုလုပ်ခြင်းဖြစ်ကြောင်း ခေတ်အပြောင်းအလဲ ကာလတွင် ငိုက်မျဉ်း တွန့်ဆုတ်မနေဘဲ ကိုယ်ရပိုင်ခွင့် ဘာလဲဆိုသည်ကို စဉ်းစား၍ ညီညွတ်ရဲရင့်စွာ ပြုလုပ်ကြရန် လိုကြောင်း ပြောကြားခဲ့သည်။ ထို့နောက် ကိုမင်းကိုနိုင်က ပြောကြားရာတွင် မကွေးမြို့သည် လွတ်လပ်ရေးဖခင်ကြီး ဗိုလ်ချုပ်အောင်ဆန်း မွေးဖွားခဲ့ရာ နတ်မောက်မြို့၏ တိုင်းမြို့ဖြစ်ကြောင်း၊ မကွေးမြို့သည် ချောက်ရေနံမြေ သပိတ်သားများ ချီတက်စဉ်က ရန်ကုန်မှအကူတပ်သားအဖြစ် စေလွှတ်လိုက်သော ကျောင်းသားများနှင့် ဆုံစည်းခဲ့သော အောင်မြေဖြစ်ကြောင်း၊ မကွေးမြို့တွင် စာပေဟောပြောပွဲ လွတ်လွတ်လပ်လပ် လုပ်ခွင့်မရသည်ကို သိရ၍ စိတ်မကောင်းဖြစ်မိကြောင်း၊ မကွေးမြို့ပေါ်ရှိ လူမှုရေးအသင်းအဖွဲ့များ လွတ်လပ်စွာ လုပ်ဆောင်နိုင်မှု မရှိသည်ကိုလည်း စိတ်မကောင်း ဖြစ်မိကြောင်း ပြည်သူလူထုတွင် ကြောက်ရွံ့မှုများ ရှိနေရခြင်းမှာ ကောင်းသော အလားအလာ မဟုတ်ကြောင်း၊ ပြည်သူလူထု ဆိုသည်မှာ သခင်ဖြစ်ပြီး၊ လွှတ်တော် အမတ်များမှာ ပြည်သူ့အကျိုးဆောင် အစေအပါးများ ဖြစ်ကြောင်း၊ နိုင်ငံတော်သမ္မတကြီးမှ ပြည်သူလူထုကို မိဘပြည်သူများဟု ခေါ်ခဲ့သည်မှာ အင်မတန် ကျက်သရေရှိကြောင်း၊ ထိုသို့ အခြေအနေ ရောက်ရှိလာခဲ့သည် မှာ အလကားရခဲ့ခြင်း မဟုတ်ကြောင်း၊ ယခင် အုပ်ချုပ်မှုပုံစံဖြင့် ခေါက်ရိုးကျိုးသူ အများအပြား ရှိသေးကြောင်း ပြည်သူ့အရေး၊ နိုင်ငံအရေးကို ရဲရဲ ရင့်ရင့်ပြောဆိုရန် အသင့်ရှိသင့် ကြောင်း ပြောကြားခဲ့သည်။ ထို့ပြင် မကွေးမြို့အတွင်း ၎င်းတို့ လှည့်လည်စဉ် ယာဉ်ထိန်းရဲများ၊ မြန်မာနိုင်ငံ ရဲတပ်ဖွဲ့တပ်သားများ စောင့်ရှောက်ခဲ့သောကြောင့် အလွန်ဝမ်း သာမိကြောင်း၊ ထိုသို့ စောင့်ရှောက်မှုများကို ရေရှည် ဖော်ဆောင် သင့်ကြောင်း၊ အလုပ်မလုပ်ဘဲ ပိုက်ဆံလိုချင်သူများက ပြုပြင်ပြောင်းလဲရေးကို လိုလားမည် မဟုတ်ကြောင်း၊ ယနေ့ပွဲသို့ တက်ရောက်လာသူများမှာ မည်သူတစ်ဦးတစ်ယောက်၏ ခြိမ်းခြောက်မှုမှ မပါဝင်ဘဲ လာရောက်ခဲ့ကြကြောင်း လူမှုရေး၊ ကျန်းမာရေးပူး ပေါင်း၍ မဟတ္တမဂန္ဒီကဲ့သို့ ပြည်သူနှင့် တစ်တန်းတည်း ရပ်တည်ခဲ့သော သြဇာကြီးမား သူမျိုးများ လိုအပ်ပါကြောင်းများ ပြောကြားခဲ့သည်။ ထို့နောက် နံနက် ၁၁ နာရီ ခန့်တွင် ၈၈ မျိုးဆက် ကျောင်းသားများအဖွဲ့သည် မင်းဘူမြို့မှတစ်ဆင့် ရွှေစက်တော်ပွဲတော်သို့ သွားရောက်ခဲ့ကြောင်း သိရသည်။ ထိုအဖွဲ့သည် ရွှေစက်တော်ပွဲတော်မှ နေ့ချင်း ပြန်လာမည် ဖြစ်ပြီး မကွေး- ကံပြား နေပြည်တော်လမ်းမှ တစ်ဆင့် မြို့သစ်မြို့တွင် လူထုနှင့်တွေ့ဆုံ မိတ်ဆက်ပြီး ရန်ကုန်သို့ ပြန်ကြမည်ဖြစ်ကြောင်း သတင်းရရှိပါသည်။ |
No comments:
Post a Comment