အစာအကြောင်းအသိပညာက
စေ့ဆော်ပေးတာကြောင့် ယုံကြည်မှုတွေ ပွားလာပြီး လက်တွေ့မှာ ထိရောက်တဲ့ပြုပြင်မှုတွေ
ပါလာမယ်ဆိုရင်တော့ မြန်မာတွေရဲ့ လက်ရှိကျန်းမာရေးနဲ့ 
အနာဂတ်ကျန်းမာရေးဟာ
အားရစရာ ကောင်းတဲ့အခြေကို ဆိုက်တော့မှာပဲလို့ အာမခံရဲရဲနဲ့ ပြောနိုင်တော့မယ်။
အနာဂတ်ကျန်းမာရေးဟာ အားရစရာ ကောင်းတဲ့အခြေကို ဆိုက်တော့မှာပဲလို့ အာမခံရဲရဲနဲ့ ပြောနိုင်တော့မယ်။
လက်တွေ့လုပ်စရာတွေအကြောင်းကို
ဆက်ရမယ်ဆိုလျှင်တော့--
- အသားဟင်းများမှာ ဟင်းသီးဟင်းရွက် ရောပေးပါ။ ဟင်းလဲပွားပြီး ကျန်းမာရေး အားပေးလဲဖြစ်ပါတယ်။ သုံးရိုးသုံးစဉ်ဖြစ်တဲ့ ကုလားပဲ၊ ဘူးသီး၊ ခရမ်းသီး၊ အာလူးအပြင် ဂေါ်ရခါသီး၊ ပဲလိပ်ပြာ၊ ထောပတ်ပဲ၊ ပဲနီလေး၊ အခြားပဲများ၊ ပိန်းဥ၊ ခါချက်ဥ၊ မုန်လာဥတို့ကို စမ်းသုံးကြည့်ပါ။
- တောင်ပိုင်းအိန္ဒိယမှာ ဂဏန်းဟင်းမှာ ဒန့်ဒလွန်ရွက်အုပ်တတ်တယ်။ မဆလာသုံးတဲ့ ငါးဟင်းအားလုံးမှာလဲ ဒီလိုရောနိုင်ပါတယ်။ ဒန့်ဒလွန်ရွက်ဟာ အစိမ်းရင့်ရောင်ဖြစ်တာမို့ ဗီတာမင်အေ၊ စီနဲ့ အင်တီအောက်ဆီဒင့်တွေ အများအစားပါပါတယ်။ အာနိသင်ကြီးမားတဲ့ ကျန်းမာရေးအားပေးအစာဖြစ်တယ်။ အခြားဟင်းလျာတွေမှာလဲ စမ်းပြီးသုံးသင့်ပါတယ်။ ဒန့်ဒလွန်ရွက်ကို ပဲနီလေး၊ ကုလားပဲ၊ ပဲထောပတ် စတဲ့ ပြုတ်ပြီးသားပဲတွေနဲ့ ရောပြီးကြော်နိုင်ပါသေးတယ်။ ပဲအရည်သောက်ဟင်းတွေမှာလဲ ဆူးပုပ်ရွက်ခတ်သလို ခတ်နိုင်ပါတယ်။ အပွင့်နဲ့ရွက်နုတွေကို ပြုတ်ပြီး မိုးကျလက်ဖက်သုပ်မျိုး သုပ်စားနိုင်ပါတယ်။
- ဆူးပုပ်ရွက်ကိုလဲ ဒန့်ဒလွန်ရွက်သုံးနည်းကား သုံးနိုင်ပါတယ်။ ဆူးပုပ်ရွက်အညွန့်ကလေးကို ငါးဟင်းအားလုံးမှာ ငရုတ်သီးစိမ်းနံနံပင် အုပ်သလိုအုပ်နိုင်ပါတယ်။ အညှီပြေပြီး ကျန်းမာရေးကောင်းကျိုးလဲပြုမယ်။ အခြားဟင်းတွေမှာလဲ သုံးကြည့်ကြပါ။ အလွန်တန်ခိုးရှိတဲ့ အရွက်မို့ စဉ်းစားရလျှင်ရသလို ကြံဖန်သုံးရမှာပါ။ တချို့ကရွှေဖရုံသီးဟင်းမှာ ထည့်တာတွေ့ဘူးတယ်။ အခြားနေရာတွေမှာလဲ ထွင်ပြီးသုံးနိုင်သေးတယ် ထင်ပါတယ်။ စားနေကျ ကြက်ဥ ဘဲဥနဲ့ကြော်၊ ကြော်စား၊ ချက်စား ပဲကြီးနဲ့ အခြားပဲဟင်းတွေမှာမှာ မီးအုံမီးမြှိုက် ရေနွေးဖျောပြီး အတို့အမြှုပ်အဖြစ်သုံးတဲ့အပြင် သုပ်စားလို့လဲ ရပါတယ်။ ဆူးပုပ်ရွက်ကို ရေနွေးဖျော၊ ကြက်သွန်နီ ဂေါ်ဖီနဲ့ ရောပြီး ပုဇွန်ခြောက် ဆီချက် သံပရာသီးနဲ့ မြင်းခွာရွက်သုပ်သလို သုပ်ပါ။ ပဲမှုန့်ထည့်ချင်ရင် ထည့်နိုင်ပါတယ်။ မဟုတ်ရင်လဲ လက်ဖက်သုပ်မှာ (သင်္ဘောရွက်ထည့်သလို) ထည့်စားပါ၊ စမ်းကြည့်ကြပါ။ ခံတွင်းတွေ့မှာပါ။
- အမွှေးအကြိုင်အတွက်သုံးတာတွေ
အားလုံးလိုလိုဟာ ကောင်းကြတာပဲ။ ဒီတော့ ဒါတွေကို အလေးထားသုံးကြရလိမ့်မယ်။
ထည့်နေကျတွေမှာ ပိုပိုမိုမိုသုံးပြီး မထည့်တတ်သေးပေမယ့်
ကောင်းမယ်ထင်တဲ့နေရာတွေမှာ သုံးပေးပါ။ အနံ့အသက်အတွက်ထည့်တဲ့
အမွှေးအကြိုင်တွေပဲဆိုပြီး မစားဘဲဖယ်မပစ်ပါနဲ့ စားဖြစ်အောင်စားပေးပါ။ တကယ်လို့
အရေသာမကြိုက်ဘူးဆိုရင် မျိုသာချလိုက်ပါ။ ခပ်စိမ်းစိမ်းစားရတာတွေက
ပိုထိရောက်ပါတယ်။ မချက်ရသေးတာဆိုတော့ ဒါတွေမှာပါတဲ့ ဗီတာမင်စီ အပြည့်အဝရမယ်။
ငရုတ်သီးစိမ်းကလဲ ကောင်းပါတယ်။ စပ်တာကြောင့် အများအစားမသုံးနိုင်တောင်
ဟိုနည်းနည်း ဒီနည်းနည်းထည့်နိုင်ရင်လဲ မဆိုးပါဘူး။ - ဇီးဖြူသီး၊ ချဉ်ပေါင်သီးမှည့်ထောင်း စတာတွေဟာလဲ ကျန်းမာရေးဘက်က ကြည့်ပြောရရင် တကယ့်အဖိုးတန်တွေပဲ။ ဇီးဖြူသီးမှာပါတဲ့ ဗီတာမင်စီကိုပဲ ကြည့်ပါအုံးတော့။ ဇီးဖြူသီးထောင်းရင် အစိမ်းကိုပဲ သုံးပါ။ ကြက်သွန်ဖြူ ငရုတ်သီးစိမ်း မြေပဲဆံနဲ့ထောင်းရင် ဒီအထောင်းမှာပါတဲ့ အင်တီအောက်ဆီဒင့်တွေကတော့ တပုံတပင်ပဲလို့ ဆိုရတော့မယ်။ ဒါကြောင့် နည်းနည်းလေးစားရင်တောင် တာသွားပါတယ်။ ဒီလိုပဲ ချဉ်ပေါင်သီးမှည့်(အနီ) ကိုလဲ သုံးနိုင်ပါတယ်။ တူညီတဲ့ကောင်းကျိုးမျိုး ရနိုင်ပါတယ်။ မရမ်းသီးထောင်းကိုလဲ ဒီလိုပဲ သဘောထားရမယ်။ ကြိုက်လျှင်မျှဉ်ငါးပိ၊ ပုဇွန်ခြောက်တို့ ထည့်နိုင်ပေမယ့် မြေပဲဆံလောက် အဟာရအာနိသင် မရှိဘူး။ အငန်လဲ ပိုသွားမှာ စိုးရတယ်။
- ခါဂျက်ဥ(ဥဝါ) ဆိုတာက ကောင်းကျိုးမျိုးစုံ အထူးသဖြင့် အစွမ်းထက်လှတဲ့ အင်တီအောက်ဆီဒင့် ဘီတာကယ်ရော်တင်း ပါတာကြောင့် ကျန်းမာရေးအဟာရ ပညာရှင်တွေက အစားအစာတွေထဲမှာ ထိပ်တန်းတင်ထားတဲ့ ဟီးရိုးတစ်ပါး ဖြစ်တယ်။ ဒါကို အသားအချိုချက်မှာ ရောလို့ အင်မတန်ကောင်းပါတယ်။ အစိမ်းကြော်မှာထည့်၊ ဆယ့်နှစ်မျိုးဟင်းချိုလိုမျိုးမှာထည့်၊ သီးစုံဟင်းမှာထည့်တဲ့အပြင် ခြစ်ပြီး သင်္ဘောသီးသုပ်သလို သုပ်စား၊ ရှာလကာရည်နဲ့ အချဉ်တယ်စား လုပ်နိုင်ပါသေးတယ်။ အာလူးလိုအသားဟင်းတွေမှာ ရောနိုင်ပါတယ်။ အရည်ညှစ်စက်ရှိသူများ အရည်(ဂျုစ်) လုပ်ပြီးသောက်လျှင် အထူးကောင်းကျိုးပေးနိုင်ပါတယ်။ ကြိုက်ရင်လတ်လတ်ဆတ်ဆတ် ဂျင်းနုနည်းနည်းလောက်ထည့်ကြည့်ပါ။ အနံ့အရသာတစ်မျိုးထူးပါတယ်။ ဒီလိုပဲ တရုတ်နံနံကိုလဲ ထည့်နိုင်ပါတယ်။ ချက်ရင်လဲ ဘီတာကယ်ရော်တင်းကတော့ အာနိသင်မပြယ်ဘူး။
- ပဲမျိုးစုံကတော့ မြန်မာတွေနေ့တိုင်းလိုလို ရေရေလည်လည် သုံးပေးရမယ့်အစာဖြစ်တယ်။ သူတမယ်ထဲ ခါတိုင်းလိုချက်တဲ့အပြင် အသားတွင်မကသေးဘူး ဟင်းသီးဟင်းရွက်တွေနဲ့လဲ ရောနိုင်ပါသေးတယ်။ ကုလားပဲ၊ ပဲနီလေး၊ ပဲဝါလေး၊ ပဲထောပတ်၊ ပဲလိပ်ပြာ စတာတို့ကို ချဉ်ပေါင်ရွက်၊ ကင်ပွန်းချဉ်ရွက်၊ ဟင်းနုနွယ်ရွက်နဲ့ ရောကြော်ပါ။ သက်သတ်လွတ်ဟင်းလဲဖြစ်ပြီး အရသာလဲ ကောင်းပါတယ်။ အာဟာရအာနိသင် ပေါင်းစုံပါတာမို့ ကျန်းမာရေးအတွက် အားထားရတဲ့ဟင်းဖြစ်မယ်။ နောက်ဥပမာတခုက ပဲထောပတ်ကို အိုးကပ်ချက်သလိုချက်ပြီး ပုဇွန်ဖြစ်ဖြစ် ဘော့ချိတ်ပဲဖြစ်ဖြစ် ဆတူလောက်ရောချက်ကြည့်ပါ။ စားလို့လဲကောင်း အဟာရတန်ဖိုး အပြည့်ပါတဲ့ ဟင်းတမယ်ဖြစ်မယ်။ အသားဟင်းတွေလောက် စရိတ်လဲမရှိဘူး။ “ဘယ်လိုလဲ အသားဟင်းမပါဘူးလား” လို့ မေးတဲ့သူရှိရင် ပဲဟာ အသားဓာတ် အပြည့်အဝပါကြောင်း၊ ဒါ့ပြင် အခြားကောင်းကျိုးအာနိသင်တွေလဲ ထပ်ဆောင်းပါကြောင်းကို ရှင်းပြပါ။ အသားကြီးအသားမှာ ဆိုးကျိုးပေးနိုင်တာတွေ ရှိတဲ့အကြောင်း၊ ပြည့်ဝဆီပါတာကြောင့် ခေတ်ရောဂါတွေကို အားပေးနေကြောင်းကို ပညာပေးလိုက်စမ်းပါ။ ချက်ရာမှာတော့ စားသူတွေ ကြိုက်လာအောင် အရသာရှိရှိဖြစ်အောင် ဖန်တီးပေးလိုက်ပါ။
- နောက် ဟီးရိုးတစ်ပါးဖြစ်တဲ့ ပဲပြားကို မြန်မာနည်း၊ တရုတ်နည်း၊ ကုလားနည်း ချက်နည်းမျိုးစုံနဲ့ စမ်းချက်ပြီး တစ်ပတ်မှာ အနည်းဆုံး ၂၊ ၃ ခါလောက် စားပေးပါ။ အထက်ကဖော်ပြခဲ့တဲ့ ပဲများကို သုံးသလို အသားနဲ့ရော၊ ဟင်းသီးဟင်းရွက်နဲ့ပါ ရောလို့ရပါတယ်။
- ခရမ်းချဉ်သီးကတော့ အင်မတန်မှ စားထိုက်လွန်းလို့ ရှာဖွေကြံဆပြီး သူ့ကို နေ့တိုင်းလိုလို သုံးပေးပါ။
- အပင်ပေါက်များ _ ပဲတီပင်၊ မြေပဲပေါက် ဒါတွေဟာလဲ သိပ်စားဖို့ကောင်းတာတွေပါ။ အဓိကကောင်းကျိုးပြုတာကတော့ ဗီတာမင်အီးဖြစ်တယ်။ ဖိုင်ဘာနဲ့အခြား အင်တီအောက်ဆီဒင့်များလဲ ရနိုင်ပါသေးတယ်။
- အတို့အမြှုပ်များ _ ဒါတွေကတော့ မြန်မာတွေရဲ့ အစားအစားထဲမှာ ဟက်ဟက်ပက်ပက် အားပေးခံရတဲ့ အစာတစ်မျိုးဖြစ်တယ်။ နေ့စဉ်လိုပဲ ပါတတ်တယ်။ အထူးသဖြင့် သိပ်ဆင်းရဲတဲ့ အိမ်ထောင်စုမှာဆို ဟင်းဆိုလို့ ဒီတစ်မယ်ထဲပဲ ဖြစ်ချင်ဖြစ်မှာ။ အတို့အမြှုပ်တွေကတော့ ဟင်းသီးဟင်းရွက်များများစားနိုင်ဖို့ တီထွင်ပေးလိုက်တဲ့ အခွင့်အရေးပဲ။ အမျိုးအမည်စုံလွန်းလို့ အလွန်တန်ဖိုးရှိပါတယ်။ အစိမ်းစားရတာတွေပါလို့ ဗီတာမင်တို့ သတ္တုဓာတ် စတာတွေ လျော့မကုန်ဘူး။ ဒါပေမဲ့ သန့်ရှင်းရေးကိုတော့ အထူးအလေးပေးရလိမ့်မယ်၊ အစိမ်းစားရတဲ့ ဟင်းသီးဟင်းရွက်တွေမှာ ဝမ်းရောဂါပိုးပါနိုင်တယ်။ ဒီတော့ သေသေချာချာ ဆေးရလိမ့်မယ်။ ဒါတောင် စင်ချင်မှစင်မှာ။ စင်အောင်ဆေးပါ။ ဒါတောင် လုံလောက်ချင်မှ လုံလောက်မှာ။
- ဖိုင်ဘာဟာ အခုခေတ်ရောဂါကာကွယ်ရေးမှာ ဘယ်လောက်အရေးကြီးတယ် ဆိုတာ တင်ပြပြီးခဲ့ပါပြီ။ အခုခေတ် လူတွေသေစေတဲ့ရောဂါတွေ ပေါများလာတာကို ဖိုင်ဘာ လျှော့စားလာတာက အကြောင်းရင်းတခုဖြစ်တယ်။ အထက်မှာဖော်ပြခဲ့သလို ဟင်းသီးဟင်းရွက်တွေ များများစားပေးမယ်ဆိုရင် ဖိုင်ဘာ ဖူလုံမှာပါ။ ဖိုင်ဘာနှစ်မျိုးရှိတဲ့အနက် ပျော်ဝင်ဖိုင်ဘာ စားပေးဖို့ကိုလဲ မမေ့သင့်ဘူး။ ဒီဖိုင်ဘာမျိုးက အစေ့များတဲ့အသီးတွေနဲ့ ချွဲစေးတာတွေမှာပါတယ်။ ဒါကြောင့် ခရမ်းသီးမျိုးစုံ ရုံးပတီသီး ချဉ်ပေါင်သီး စတာတွေကို တခါတလေ စားပေးထိုက်တယ်။ အတို့အမြှုပ်ထဲမှာ ပါအောင် ထည့်လို့ရပါတယ်။ သစ်သီးထဲကလဲ အစေ့များတဲ့ မာလကာသီး၊ စတော်ဘယ်ရီသီး ပင်မှည့်သီးတွေမှာ ပက်တင်ပါတာမို့ ပျော်ဝင်ဖိုင်ဘာများတယ်။
အရေးကြီးတာတွေ ရှိပါသေးတယ်။ ဒါတွေကတော့ ကောင်းတဲ့ဆီ (ပဲဆီ) ကိုသာ သုံးဖို့၊ ဆီကြော်တွေ မစားဖို့၊ ထောပတ် မာဂျရင်းတွေ မသုံးဖို့၊ အငန်လျှော့ဖို့၊ မဝစေအောင် ကိုယ်အလေးချိန်ကို ထိန်းထားဖို့ဆိုတာတွေပဲ။ ဟင်းစီစဉ်ရာမှာ ဟင်းချက်ရာမှာ ဒီအကြောင်းအရာတွေကို သတိဖြစ်စေပြီး အမြဲတမ်း ဆင်ဆင်ခြင်ခြင်လုပ်ဖို့လိုပါတယ်
နောက်သတိထားပြီး လျှော့စားရမှာကတော့ ဆား (အငန်ဓာတ်) ပဲ။ မြန်မာ့ပင်တိုင်စာဖြစ်တဲ့ ငါးပိ၊ ငါးခြောက်၊ ငံပြာရည်၊ ပုဇွန်ခြောက် ဆိုတာတွေက ဆားကဲတဲ့ ပစ္စည်းတွေပါ။ ဒီတော့ ငါးပိရည်၊ ငံပြာရည်ကို လျှော့ရလိမ့်မယ်။ အစားထိုးရလိမ့်မယ်။ အကောင်းဆုံးကတော့ ခရမ်းချဉ်သီးထောင်း (ပန်ထွေဖျော်) ပဲ။ ပုံးရည်ကြီး နှမ်းဖတ်ချဉ် တို့ကိုလဲ သုံးနိုင်ပါတယ်။ (မှတ်ချက် - နှမ်းဖတ်ချဉ်မှာ အသည်းကင်ဆာအားပေး အဆိပ်အတောက်တမျိုးပါတယ်လို့ ဆိုတယ်)
ဆီကြော်ရတာတွေကို ရှောင်ပါ။ ဆီကြော်တွေကို မစားပါနဲ့။ ဆီကြော်ဖို့လိုရင်လဲ ဆီက ပူခြစ်နေပြီး အငွေ့တွေ အကြာချည်းတက်နေတဲ့အထိမထားပါနဲ့၊ အန္တရာယ်များပါတယ်။ အငွေ့တက်စ၊ မတက်ခင်လောက်အထိပဲထားပါ။
တဆက်ထဲ တင်ပြချင်တာကတော့ ဟင်းချက်ရာမှာ သတိထားစရာအတိုအထွာတွေပဲ။
တို့စရာ စတာတွေနဲ့ အခြားသုံးစရာအတွက် ဟင်းရွက်ကို ပြုတ်ရရင်ပြုတ်တဲ့အရည်ကို ပြန်သုံးပါ။ သွန်မပစ်ပါနဲ့။ ဟင်းချို ချဉ်ရည်ဟင်းမှာ သုံးနိုင်ပါတယ်။
ဟင်းသီးဟင်းရွက် အထူးသဖြင့် ဆူးပုပ်ရွက်၊ ကင်းပုံရွက်တို့လို အစိမ်းရင့်ရောင်ရှိတဲ့ အရွက်တွေကို အကြာကြီး ချက်တာပြုတ်တာ မလုပ်ပါနဲ့၊ ပါတဲ့ ကောင်းတဲ့အာနိသင် အထူးသဖြင့် ဗီတာမင်စီ ပြယ်သွားမှာ စိုးရတယ်။
ဆားပေါ့ပေါ့ အမြဲချက်ပါ။ ဆားပိုစားလိုသူတွေအတွက် စားပွဲရောက်မှ ထပ်ထည့်ပါ။
ဆားပေါ့စားရတဲ့သူရှိလျှင် ဆားမပါ (သို့) အပေါ့ဆုံးချက်ပြီး ဆားပေါ့စား သူအတွက် ဖယ်ထားခတ်ထားပြီးမှ ဆားလိုသလို ထပ်ထည့်ပါ။
ဆေးဆိုးထားတာအားလုံးကို ရှောင်ပါ။ (ပုဇွန်ချဉ်၊ မျှစ်၊ နှမ်းဖတ်ချဉ် စတာများ)
ဆီကိုချက်ရတဲ့အခါမှာ ဒယ်အိုးပေါ်က စီးပြီးမနေပါနဲ့၊ တက်လာတဲ့ဆီငွေ့တွေကို မရှူဖြစ်အောင် သတိထားပါ။ ဒီဆီငွေ့တွေဟာ ကင်ဆာအားပေးဖြစ်တယ်။
ကြော်ပြီးကျန်တဲ့ဆီကို ပြန်မသုံးပါနဲ့။
အကြာကြီးကြော်ရတဲ့အခါမျိုှးမှာ ကြားအချိန်မှာ ဒယ်အိုးကို ရေနဲ့ကျင်းပြီးအေးအောင် ခဏထားပြီးမှ ဆက်ကြော်ပါ။
ဆီသိုလှောင်ထားတဲ့ ဆီပုံး၊ ပုလင်းတွေကို အလင်းရောင်အားများတဲ့ နေရာတွေမှာ မထားပါနဲ့။ ခပ်မှောင်မှောင်နေရာမှာ ထားပါ။
ဆီမှာ ရေအရောနှောမပါပါစေနဲ့။ ရေပါရင် ဆီကမြန်မြန်ပျက်ပြီး မကောင်းတဲ့အာနိသင်တွေ ဖြစ်လာတတ်တယ်။ ဒီလိုပဲ ဆီချေးစော်နံတဲ့ဆီဟာလဲ ကျန်းမာရေးနဲ့ မညီညွတ်တော့ဘူး။
ဆီသတ်တာတို့ အသားငါး ကြော်၊ ချက်တဲ့အခါမှာ ဆီကို အငွေ့တွေ အကြာကြီးတက်တဲ့အထိ မထားပါနဲ့၊ ဆီကျက်ကျက်ချင်း ထည့်ကြော်လိုက်ပါ။
အစိမ်းစားတဲ့ သီးရွက်တွေကို ရေများများနဲ့ အထပ်ထပ်ဆေးပါ။
အသုပ်စတာတို့လို နယ်ရမယ့်အခါမျိုးမှာ (ပလတ်စတစ်) လက်အိတ်ကို သုံးပါ။ သုံးပြီး လွှင့်ပစ်နိုင်ရင် အကောင်းဆုံးပဲ။ မဖြစ်လို့ ပြန်သုံးရမယ်ဆိုရင်တော့ ဆေးပြီးမှသိမ်းပါ။ နောက်တစ်ခါ ပြန်သုံးခါနီးမှာ အိတ်ကိုလက်မှာစွပ်ထားပြီး ဆပ်ပြာနဲ့ ထပ်ဆေးပါ။
ဟင်းတွေကို အခါခါမနွှေးပါနဲ့၊ ကင်ပွန်းချဉ်ရွက်၊ ကင်းပုံရွက်၊ ဆူးပုပ်ရွက် တို့ဆိုရင် စားခါနီးမှသာထည့်ပါ။ အခါခါနွှေးတော့ တန်ဖိုးရှိတဲ့ဓာတ်တွေပြယ်သွားနိုင်ပါတယ်။ (အထူးသဖြင့် အရေးကြီးလှတဲ့ ဗီတာမင်စီ)၊ ဒါ့ပြင် မီးလဲကုန် အချိန်လဲကုန်ပါတယ်။
ယင်ကောင်မနားစေအောင် အထူးဂရုစိုက်ပါ။ အစားအသောက်ကို အမြဲအုပ်ထားပါ။
ဈေးဝယ်ရင် စိတ်ထဲမှာ အမှတ်ထားရမယ့် စာရင်းရှိပါတယ်။ ဒါကတော့ ဒီနေ့ ကိုယ်ချက်မယ့် ဟင်းစပ်မှာ -
(၁) ကစီဓာတ်၊ ပရိုတင်းဓာတ်၊ အဆီလုံလောက်စွာပါရဲ့လား။
(၂) သတ္တုဓာတ်နဲ့ ဗီတာမင်တွေကော ဖူလုံရဲ့လား။
(၃) အင်တီအောက်ဆီဒင့်ရော ပြည့်ပြည့်ဝဝရှိရဲ့လား။
(၄) ဖိုင်ဘာရောပါသလား။
မပြည့်စုံသေးဘူးထင်ရင် တစ်နည်းနည်းနဲ့ ဖြည့်တင်းပေးလိုက်ပါ။ ဥပမာ ဗီတာမင်စီ၊ အင်တီအောက်ဆီဒင့်၊ သို့မဟုတ် ဖိုင်ဘာနည်းနေမယ်ဆိုရင် ဒါတွေအများအစားပါတဲ့ လတ်ဆတ်တဲ့ အသီးတစ်မျိုးကို ကျွေးဖြစ်အောင် ကျွေးလိုက်ပါ။ ဒါမှသာ ကျန်းမာရေးအစ မီးဖိုချောင်က ဆိုတဲ့ ဆောင်ပုဒ်နဲ့ ကိုက်ညီတော့မယ်။
(ဤဆောင်းပါးရေးသားသူအား ကျေးဇူးအထူးတင်ပါသည်)
No comments:
Post a Comment