ပြည်ပမှ တရားမ၀င်ကြက်သားများ ရောင်းချမှုရှိနေပြီး ကျန်းမာရေးအတွက် လုံခြုံစိတ်ချရမှု မရှိကြောင်းသိရ

Wednesday, 23 May 2012 16:18

ပြည်တွင်းဈေးကွက်၌ တရားမ၀င် ရောင်းချနေသည့် ကြက်သားများ ပြည်ပမှကြက်သားများ တရားမ၀င် တင်သွင်းရောင်းချမှုရှိနေပြီး ယင်းကြက်သားများမှာ ကျန်းမာရေး အတွက် လုံခြုံစိတ်ချရမှုမရှိကြောင်း မွေးမြူရေးနှင့် ရေလုပ်ငန်းအဖွဲ့ချုပ်မှ တာဝန်ရှိသူများက မေလ ၁၇ ရက် နေ့က ပြုလုပ်ခဲ့သည့် သတင်းစာ ရှင်းလင်းပွဲတွင် ပြောကြားခဲ့သည်။ ကြက်သားများမှာ အာဂျင်တီးနားနှင့် ဘရားဇီးနိုင်ငံမှဖြစ်ပြီး စင်္ကာပူမှတစ်ဆင့် တင်သွင်းခြင်း ဖြစ်ကြောင်း သိရှိရပါသည်။ “ အခုရောင်းနေတဲ့ ကြက်သား က တစ်ကီလိုခွဲကို ကျပ် ၅၂၈၀။ ပြည်တွင်းဈေးနှုန်းနဲ့ အတူလောက်သွားကြမယ်။ အထဲမှာ အကောက်ခွန်ခ၊ သယ်စရိတ်၊ တခြားစရိတ်တွေနှုတ်ရင် ဒီဈေးနှုန်းနဲ့ ရောင်းနိုင်တယ်ဆိုတာ ပြည်ပကနေ ဘယ်ဈေးနဲ့ရခဲ့သလဲ စဉ်းစားစရာပါ။ သူ့ဟာသူ ဘယ်လို စာရွက်စာတမ်းပဲပြပြ၊ FDA ထောက်ခံချက်မပါဘဲ ဘယ်လိုလမ်းကြောင်းက ၀င်လာမှန်းမသိတဲ့ အသားတွေကအရမ်း အန္တရာယ်များတယ်။ အထဲမှာဘာပိုးပါနေမလဲ မသိနိုင်ပါဘူး။ နောက် ကြက်သားထုပ်မှာပြထားတဲ့ Exp: date က နှစ်နှစ်ပေးထားတယ်။ နိုင်ငံတကာမှာ စားသောက်ကုန်ဆိုအများ ဆုံးလွန်ရောကျွံရောမှ တစ်နှစ်ပဲခွင့်ပြုတယ်။ ပြည်ပကသွင်းလာတဲ့ ကြက် သားမှာ Exp: date နှစ်နှစ်ဘာကြောင့် ဖြစ်တာလဲ။ ဘယ်က၀င်လာတာမှန်း မသိတာကို မစားဖို့၊ ရောင်းချ သူလည်း ဥပဒေအတိုင်း လုပ်ဖို့ပြောချင် တယ်”ဟု ဒေါက်တာလှလှသိန်းမှဆိုသည်။ “ပြည်တွင်းမှာ ကြက်သား၊ ဆိတ်သား၊ ငုံးသား၊ အမဲသား တင်သွင်းရောင်းချမှုတွေကို ခွင့်မပြုထားပါဘူး” ဟု ရန်ကုန်တိုင်းဒေသကြီး အသားတိုး ကြက်မွေးမြူရေးအသင်း ဥက္ကဌမှ ပြောကြားခဲ့ပါသည်။  ELeven Media Group