စနေနေ့၊ အောက်တိုဘာလ ၁၊ ၂၀၁၁
မြစ်ဆုံရေကာတာ စီမံကိန်းရပ်ဖို့ သမ္မတကြေညာချက် ယုံမမှတ်၊ပုံမအပ်ကြနဲ့
၈၈၊၂၀၀၇၊ဒီပဲယင်းနဲ့ ခရစ္စတီးကျွန်း တာဝန်မကင်းတဲ့သူတွေ ပါတဲ့ အစိုးရအဖွဲ့ကြီးနော်။ ဒီလိုပြောလိုက်တာနဲ့ ဒီလိုပဲ လို့ ယုံလိုက်ရင် ကျနော်တို့မြန်မာတွေဟာ စစ်အာဏာရှင်စနစ်နဲ့
ပဲတန်တဲ့ ဖွတ်မေ့၊ ပဒတ်မေ့ မေ့တတ်တဲ့သူတွေ ဖြစ်ကုန်လိမ့်မယ်။
ခုမနက် ဖေ့စ်ဘွတ်ခ် ကို ဖွင့်ဖွင့်ချင်း ကျနော့်ကို ကြိုဆိုနေတဲ့ သတင်းက မြစ်ဆုံစီမံကိန်းကို မိမိတို့အစိုးရလက်ထက်မှာ ရပ်ဆိုင်းထားမယ် ဆိုတဲ့ သမ္မတရဲ့သတင်း နဲ့ အဲဒီသတင်းကို ၀ိုင်းကြိုဆိုနေကြတဲ့ ကျနော့်မိတ်ဆွေများရဲ့ ပလူပျံအသံပါ။
ကျနော်ကတော့ အဲဒီသ၀ဏ်လွှာကို သေချာဖတ်ခွင့်မရသေးတဲ့အတွက် ဘာ ဆိုတာ ရေရေရာရာ မသိသေးပါဘူး။ သိရသလောက်နဲ့ဝေဖန်ရရင် မြစ်ဆုံစီမံကိန်းကို လုံးဝရပ်ဆိုင်းမယ် လို့ မသုံးထားဘူး။ မိမိတို့အစိုးရ...လက်ထက်မှာ ရပ်ဆိုင်းမယ် လို့ပဲသုံးထားတယ်။ နောက် မြစ်ဆုံစီမံကိန်းသာမက အဲဒီစီမံကိန်းမှာ ဆည်တွေ ခြောက်ခု လိုက် တသီတန်းကြီးဆောက်မယ် ဆိုတာ တရုတ်စီပီအိုင်က ဗီဒီယိုအခွေမှာ အတိအလင်းဖေါ်ပြထားတယ်။ မြစ်ဆုံတခုထဲ ရပ်လိုက်ရုံနဲ့လည်း ပြီးသွားမယ် မထင်ဘူး။ ခု ဟာ က ရပ်တယ်လို့လည်း မပြောဘူး။ ဒီ ငါးနှစ်သက်တမ်းလေးမှာပဲ ဒီတင်္ဂလေးမှာပဲ ရပ်ဆိုင်းမယ် ပြောတာ။
ကျနော့်ကို သံသယများတယ် ပြောလည်း ဟုတ်ပါတယ်၊ နှစ် ၅၀ စာ သံသယ ရှိပါတယ် လို့ အတိအလင်း ၀န်ခံပြီးပြီ။ ခုလေးပဲသတင်းတပုဒ်မှာ ကိုအော်ပီကျယ်ရဲ့ဟောပြောပွဲကို အကြောင်းပြချက်မရှိ အကန့် အသတ်မရှိ ရွှေ့ဆိုင်းထားတယ် ဆိုတာပါလာပြန်တယ်။
မိတ်ဆွေတို့ရေ..
တက်လွယ်၊ ကျလွယ်၊ ယုံလွယ်လွန်းတာလည်း မကောင်းဘူး။
အဲဒီလိုပဲ သံသယ ထားနေရတာကိုကလည်း မကောင်းပါဘူး။
အဲဒီ သမ္မတရဲ့ သ၀ဏ်လွှာမတိုင်မီကတည်းက မြစ်ဆုံဆည်ကို အကြောင်းတစုံတရာကြောင့် ရွှေ့ဆိုင်းတော့မယ် ဆိုတာ ကိုဗမာ့သွေးရဲ့ သတင်းဝေဖန်ချက်မှာ ကျနော်ကြိုရေးခဲ့ပါတယ်။ ကျနော့်ကို အနယ်နယ် အရပ်ရပ်က မိတ်ဆွေတွေ ပေးပို့ကြတဲ့ စာတွေက တဆင့် ဒီသတင်းကို ကြိုသိရလို့ ရေးခဲ့တာပါ။ ကျနော်လည်း ဘာအရည်အချင်း ဘာအကြားအမြင်ကိုမှ ရလို့ ဒီလိုကြိုရေးနိုင်ခဲ့တာ မဟုတ်ပါဘူး။ အဲဒီကတည်းက ကျနော်ထောက်ပြခဲ့တယ်။ မြစ်ဆုံဆည်ဟာ ပြည်သူလူထု ရဲ့ကျယ်ကျယ်လောင်လောင် အော်သံတွေကြောင့် သူတို့နောက်ဆုတ်လိမ့်မယ်။ ဒါပေမယ့် လွှတ်တော်ထဲမှာ အတိုက်အခံနိုင်ငံရေးပါတီတွေ၊ တိုင်းရင်းသားပါတီတွေက ကန့်ကွက်တဲ့အဆိုကို တင်တော့လက်မခံဘူး။ ကြံ့ဖွံ့က သူတို့ဖါသာ နာမည်ကောင်းရယူသွားမယ်ထင်တယ် လို့ ရေးခဲ့တယ်။
ခုတော့ ပိုတောင်လှလှပပ သမ္မတ သ၀ဏ်လွှာနဲ့ ရုတ်သိမ်းခဲ့တယ်။
သမ္မတရဲ့ သ၀ဏ်လွှာနဲ့ပါတ်သက်လို့ ကျနော် ဒီလို တုန့်ပြန်ချင်ပါတယ်။
၁။ သမ္မတရဲ့ သ၀ဏ်လွှာကို ချွင်းချက်မရှိ ကြိုဆိုပါတယ်။ သမ္မတရဲ့ သ၀ဏ်လွှာအတိုင်း အစိုးရနဲ့လွှတ်တော်က လိုက်နာကြမယ်လို့မျှော်လင့်ပါတယ်။
တဆက်တည်း မြစ်ဆုံဆည်သာမက၊ အဲဒီဧရာဝတီနဲ့မေခ၊ မလိခ မြစ်တွေပေါ်က ဆည်တွေအားလုံးကို ပါ ရပ်ဆိုင်းပေးဖို့၊ အချိန်ကာလတခုသာမက၊ အကြွင်းမဲ့ အဲဒီစီမံကိန်းတွေကို ဖျက်သိမ်းပေးဖို့ မေတ္တာရပ်ခံတောင်းဆိုပါရစေ။
၂။ ဧရာဝတီမြစ်ဆုံစီမံကိန်း ကို ကိုင်တွယ်ဖြေရှင်းပေးသလို၊ နိုင်ငံရေးအကျဉ်းသားတွေ အားလုံးကို ချွင်းချက်မရှိ လွှတ်ပေးဖို့ မေတ္တာရပ်ခံတောင်းဆိုပါရစေ။
၃။ တိုင်းရင်းသားလက်နက်ကိုင်အဖွဲ့အစည်းများကို ထိုးစစ်ဆင်တိုက်ခိုက်နေတာတွေကို ရပ်ဆိုင်းပြီး နိုင်ငံရေးနည်းနဲ့ငြိမ်းချမ်းရေးကို တည်ဆောက်ဖြေရှင်းပေးပါ လို့ မေတ္တာရပ်ခံတောင်းဆိုပါရစေ။
မိတ်ဆွေတွေကို လည်း တခုလေး သတိပေးနှိုးဆော်ရေးသားချင်တာက လက်ရှိအစိုးရဟာ စီးပွားရေးပိတ်ဆို့မှုကို ရုတ်သိမ်းဖို့နဲ့ အာဆီယံဥက္ကဋ္ဌဖြစ်ဖို့ ဖုတ်ပူမီးတိုက်ကို ဖြစ်နေတယ်။
ဒီတော့ ဒီအချိန်မှာ သူတို့ဒီလိုပဲ တုန့်ပြန်ဆက်ဆံမှာပဲ။
ဒီလိုကလေး “လေ” သက်သက်နဲ့ပဲ တုန့်ပြန်ရသေးတယ်၊ ချက်ခြင်းလက်ငင်း ယုံမမှတ်၊ပုံမအပ်ကြနဲ့ဦးဗျ။ အဲဒီအစိုးရ၀န်ကြီးအဖွဲ့ထဲ ခင်ဗျားတို့မသိတဲ့ လူ ဘယ်နှယောက်များ ပါလို့လဲ။ ဒီမျက်နှာတွေနဲ့ပဲ ဘယ်လိုတွေပြောခဲ့၊ ဆိုခဲ့၊ လုပ်ခဲ့၊ ကိုင်ခဲ့တယ် ဆိုတာ အထွေအထူးပြောစရာတောင်မလိုဘူး။
၈၈၊၂၀၀၇၊ဒီပဲယင်းနဲ့ ခရစ္စတီးကျွန်း တာဝန်မကင်းတဲ့သူတွေ ပါတဲ့ အစိုးရအဖွဲ့ကြီးနော်။
ဒီလိုပြောလိုက်တာနဲ့ ဒီလိုပဲ လို့ ယုံလိုက်ရင် ကျနော်တို့မြန်မာတွေဟာ စစ်အာဏာရှင်စနစ်နဲ့ပဲတန်တဲ့ ဖွတ်မေ့၊ ပဒတ်မေ့ မေ့တတ်တဲ့သူတွေ ဖြစ်ကုန်လိမ့်မယ်။
ဗိုလ်ချုပ်အောင်ဆန်း မိန့်ခွန်းထဲက လို ကျနော်တို့ တက်ထောင်မိမှာ စိုးရိမ်ပါတယ်။
ချိုတူးဇော်
No comments:
Post a Comment