– Monks oppose NLD’s decision
နိုဝင်ဘာ ၂၁၊ ၂၀၁၁
၂၀၀၇ ခုနှစ် သံဃာ့ဆန္ဒပြပွဲမြင်ကွင်းတခုနိုင်ငံရေး ပါတီတရပ်အဖြစ် မှတ်ပုံပြန်တင်ရန်နှင့် လာမည့်ရွေးကောက်ပွဲများတွင် ၀င်ရောက်ယှဉ်ပြိုင်ရန် သောကြာနေ့တွင် NLD က ဆုံးဖြတ်လိုက်ခြင်းကို သံဃာ့တပ်ပေါင်းစုက မထောက်ခံနိုင်ကြောင်း ယနေ့နေ့စွဲဖြင့် ကြေညာချက်တစောင် ထုတ်ပြန်လိုက်သည်။
ယခုအချိန်သည် ရွှေဂုံတိုင်ကြေညာချက် ထုတ်ပြန်စဉ်က အခြေအနေနှင့် ခြားနားခြင်း မရှိသေးဘဲ ဒီမိုကရေစီစနစ်ကို ဖေါ်ဆောင်မည့် အပြောင်းအလဲများ ထူးထူးခြားခြား မတွေ့ရသေးသဖြင့် NLD က ပါတီ မှတ်ပုံပြန်တင်ရန်နှင့် ရွေးကောက်ပွဲ ၀င်ရန် ဆုံးဖြတ်လိုက်ခြင်းသည် ရွှေဂုံတိုင်ကြေညာစာတမ်းမှ လမ်းကြောင်းလွဲသွားပြီ ဖြစ်သည်ဟု ယင်းကြေညာချက်တွင် ဖေါ်ပြထားသည်။
ယနေ့ မြန်မာနိုင်ငံရေးအခြေအနေနှင့် ပတ်သက်၍ တိုင်းရင်းသား ဒေသများတွင် စစ်ပွဲများ ဖြစ်ပွားနေခြင်း၊ ရဟန်းသံဃာတော်များအပါအ၀င် နိုင်ငံရေး အကျဉ်းသား ၂ ထောင်ခန့် အကျဉ်းကျနေဆဲဖြစ်ခြင်း လူမှုရေး နိုင်ငံရေး စီးပွားရေး ကဏ္ဍအသီးသီးတွင် ဒီမိုကရေစီကင်းမဲ့နေဆဲ ဖြစ်သည်ဟုလည်း သံဃာ့တပ်ပေါင်းစုက ထောက်ပြထားသည်။
မြန်မာနိုင်ငံပြဿနာများကို စစ်ကြံ့ဖွံ့လွှတ်တော်ထဲတွင် လုံးဝ ဖြေရှင်းနိုင်လိမ့်မည် မဟုတ်ဘဲ တန်းတူရည်တူ တွေ့ဆုံဆွေးနွေးခြင်းဖြင့်သာ ဖြေရှင်းနိုင်လိမ့်မည်ဟု ယုံကြည်ကြောင်းလည်း ဖေါ်ပြထားသည်။
NLD ၏ ဆုံးဖြတ်ချက်သည် တိုင်းပြည်၏ ပကတိ အခြေအနေများနှင့် မကိုက်ညီ မသင့်လျော်ဟု သံဃာ့တပ်ပေါင်းစုက ယူဆကြောင်း ရေးထားသည်။
ပြည်တွင်းစစ်ရပ်စဲရေး၊ နိုင်ငံရေး အကျဉ်းသား အားလုံး ချွင်းချက်မရှိ လွတ်မြောက်ရေး၊ နိုင်ငံရေး အရ တွေ့ဆုံ ဆွေးနွေးအဖြေရှာရေး၊ ဒီမိုကရေစီ အခွင့်အရေးများ အတွက် ပြည်သူအပေါင်းနှင့် လက်တွဲ၍ ဆက်လက်ကြိုးပမ်းသွားမည်ဟု ဆိုသည်။
သံဃာ့တပ်ပေါင်းစုအဖွဲ့တွင် မြန်မာနိုင်ငံလုံးဆိုင်ရာ ရဟန်းပျိုသမဂ္ဂများ အဖွဲ့ချုပ်နှင့် မြန်မာနိုင်ငံလုံးဆိုင်ရာ သံဃာ့သမဂ္ဂီအဖွဲ့ချုပ်တို့ ပါဝင်သည်။
၂၀၀၇ ရွှေဝါရောင် သံဃာ့ အရေးအခင်း ပြီးသည့်နောက် နအဖ အစိုးရက သံဃာ့ရာနှင့်ချီ ဖမ်းဆီး အကျဉ်းချခဲ့သည်။ ယခုအချိန်ထိ အကျဉ်းထောင်ထဲတွင် သံဃာ အပါး ၂၀၀ ၀န်းကျင် ကျန်ရှိနေသေးသည်ဟု နိုင်ငံရေး အကျဉ်းသား ကူညီပေးသူများက ပြောသည်။
No comments:
Post a Comment