အမေရိကန်နိုင်ငံမှ လေ့လာမှုတစ်ခုအရ နားကြပ်တပ်ပြီး သီချင်းနားထောင်ရင်း အလုပ်သို့မဟုတ် ကျောင်းသို့ လမ်းလျှောက် သွားသူများတွင် မတော်တဆ ဖြစ်မှုများကြောင့် ထိခိုက်ဒဏ်ရာရမှုများ၂ဝဝ၄ ခုနှစ်ကထက် သုံးဆပိုတိုးလာကြောင်း တွေ့ရှိရသည်။ မေရီလင်းတက္ကသိုလ်မှ သုတေသီများ၏အဆိုအရ i Pod နှင့် MP3များ အသုံးပြုခြင်းသည် ကား၊ ရထားများ တိုးတိုက်မိခြင်း အပါအဝင် ပတ်ဝန်းကျင်ကို စိတ်ဝင်စားမှု လျော့နည်းစေကြောင်း တွေ့ရသည်။ ''လူငယ်တွေနဲ့ ဆယ်ကျော်သက်တွေကြား MP3သုံးစွဲမှုဟာ များပြားလာပါတယ်။ နားကြပ်တပ်ထားတဲ့ သူတွေဟာ ယာဉ်တိုက်ခံရမှု ပိုများနိုင်ပြီး ဒဏ်ရာရ သေဆုံးမှု ပိုများတာကို တွေ့ခဲ့ရပါတယ်။ နားကြပ်တပ်ပြီး လမ်းလျှောက်တဲ့ သူတွေဟာကား၊ ရထား၊ ထရပ်ကား၊ ဘတ်စကား စတာတွေရဲ့ တိုက်မှုခံကြရပြီး ထိခိုက်ဒဏ်ရာရသူတွေရဲ့ ၇ဝ ရာခိုင်နှုန်းဟာ သေလောက်တဲ့ ဒဏ်ရာတွေရကြကာ ၅ဝရာခိုင်နှုန်းဟာ ရထားတိုက်ခံခဲ့ရတာကို တွေ့ရပါတယ်''ဟု တွဲဖက်ပါမောက္ခ ဒေါက်တာရစ်ချတ်လီချင်စတိန်း ကရှင်းပြခဲ့ပါသည်။၎င်းတွေ့ရှိချက်အား Injury Prevention ဂျာနယ်တွင် ဖော်ပြခဲ့ခြင်းဖြစ်သည်။ ဤလေ့လာမှုအား လီချင်စတိန်းနှင့် အဖွဲ့သည် ၂ဝဝ၄ခုနှစ် ဇန်နဝါရီလမှ၂ဝ၁၁ ဇွန်လအတွင်း ရနိုင်သမျှသော အချက်အလက်များအား စုစည်းလေ့လာ ခဲ့ခြင်းဖြစ်သည်။ ဤကာလအတွင်း နားကြပ်တပ် လမ်းလျှောက်သူများအား ယာဉ်တိုက်မှု ၁၁၆ ခုရှိခဲ့ပြီး ၂ဝဝ၄-ဝ၅တွင် ၁၆ မှုသာရှိခဲ့ရာမှ ၂ဝ၁ဝ-၂ဝ၁၁တွင် ၄၇ မှုထိ သုံးဆနီးပါး တိုးတက်လာခဲ့ခြင်းဖြစ်သည်။ အတိုက်ခံရသူများ၏ သုံးပုံနှစ်ပုံမှာ အသက် ၃ဝ အောက်များဖြစ်ပြီး ၅၅ ရာခိုင်နှုန်းမှာ ရထားတိုက်ခံရခြင်းဖြစ်သည်။
ဤကဲ့သို့ နားကြပ်တပ်သီချင်း နားထောင်ရင်း လမ်းလျှောက်နေစဉ် ဘေးပတ်ဝန်းကျင်မှ အသံများကို သီချင်းသံက ပိတ်ပင်ထားသဖြင့် မကြားရသောကြောင့် ထိခိုက်မှုများ ဖြစ်ပွားရခြင်းဖြစ်သဖြင့် ပတ်ဝန်းကျင်အား မျက်စိရှင်ရှင်ထားကာ ကြည့်ရှုရင်း သွားလာသင့်ကြောင်း လီချင်စတိန်းက အကြံပေးထားပါသည်။
No comments:
Post a Comment