အစုံဘဲလေ ဘိန်းရောင်းသူလဲပါတယ်

ဘိန်းရာဇာ အမတ်များကြောင့် ဘိန်းနှစ်ဆတိုးဟု PWO ပြော
ဖနိဒါ | အင်္ဂါနေ့၊ အောက်တိုဘာလ ၂၅ ရက် ၂၀၁၁ ခုနှစ် ၁၉ နာရီ ၄၉ မိနစ်

ချင်းမိုင်(မဇ္စျိမ) ။ ။ အာဏာရ ကြံ့ခိုင်ဖွံ့ဖြိုးရေးပါတီ၏ အမတ်သုံးဦးမှာ ဘိန်းရာဇာများ ဖြစ်သည်ဟု ပြည်ပ အခြေစိုက် ပလောင် အမျိုးသမီး အစည်းအရုံး PWO က စွပ်စွဲလိုက်ပြီး ယင်းတို့ကြောင့် ရှမ်းပြည်မြောက်ပိုင်းတွင် ဘိန်းစိုက်ပျိုးမှု နှစ်ဆ တိုးပွားလာသည်ဟု ဆိုသည်။

နမ့်ခမ်းမြို့နယ် ပြည်နယ်လွှတ်တော် အမတ် ပန်းဆေး ဦးကျော်မြင့် ခေါ် လီယောင်ကျန်း၊ ကွတ်ခိုင်မြို့နယ်မှ
ပြည်နယ် လွှတ်တော်အမတ် ဦးမြင့်လွင် ခေါ် ဦးဝမ်းကွယ်တာနှင့် ပြည်ထောင်စုမှ အောက်လွှတ်တော်အမတ် ဦးတီခွန်မြတ်တို့သည် ပြည်သူ့စစ်ခေါင်းဆောင်များ ဖြစ်ခဲ့ကြပြီး ဒေသတွင်း ဘိန်းစိုက်ပျိုးမှု လုပ်နေကြသူများ
ဖြစ်သည်ဟု PWO က ပြောသည်။

နမ့်ခမ်း၊ ကွတ်ခိုင်၊ တာမိုးညဲနှင့် နမ့်ဖတ်ကာ စသည့် မြို့နယ်များအတွင်း ဘိန်းစိုက်ပျိုးမှု ယခင်ထက် ပိုမို များပြား လာသည်ဟု PWO အထွေထွေ အတွင်းရေးမှူး ဒေါ်လိုည်းနွေနှောင်းက ပြောသည်။

“သူတို့တွေ ဘိန်းဘုရင်တွေလည်း ဖြစ်တယ်။ တော်တော် စိုးရိမ်ရတာပေါ့နော်။ လွတ်တော်ထဲမှာကိုက သူတို့တွေ ပါနေတယ်ဆိုတော့ အာဏာလည်းရနေတယ်။ အောက်ခြေမှာဆိုရင် သူတို့အတွက် ပိုပြီးတော့ လွတ်လွတ် လပ်လပ်လပ် လုပ်ဖို့ လွယ်ကူနေတယ်။ လွတ်တော်မှာလည်း လူတွေကို သုံးသပ်စေချင်တယ်။”ဟု အထွေထွေ အတွင်းရေးမှူး လိုည်းနွေနှောင်းက ပြောသည်။

နမ့်ခမ်းမြို့နယ်အတွင်းရှိ ကျေးရွာပေါင်း ၁၅ ရွာတွင် ၂ဝဝ၈-၂ဝဝ၉ ခုနှစ်က ဘိန်းစိုက်ဧက ၁,၅၃၅ ဧက ရှိရာမှ ၂ဝ၁ဝ-၂ဝ၁၁ ခုနှစ်မှာ ဘိန်းစိုက်သော ကျေးရွာပေါင်း ၂၇ ရွာဖြစ်လာကာ၊ ဘိန်းစိုက်ဧက ၂,၇၄ဝ ဧကထိ
မြင့်တက်ခဲ့သည်ဟု PWO ၏ အင်္ဂါနေ့က ထုတ်ပြန်သော "အဆိပ်သင့်နေဆဲ" အစီအရင်ခံစာ တစောင်တွင် ပါရှိသည်။

ဦးကျော်မြင့်နှင့် ပတ်သက်၍ "အခု လွှတ်တော် အမတ်ဖြစ်တော့ သူကိုယ်တိုင် အာဏာရနေတော့ ဘိန်းစိုက်တာကို ရပ်တန့်မှာ မဟုတ်ဘူး။ နိုင်ငံရေးကိုလည်း ဖြေရှင်းနိုင်မှာ မဟုတ်ဘူး"ဟု သုတေသန တာဝန်ခံတဦးလည်း ဖြစ်သူ လိုည်းနွေနှောင်းက ပြောသည်။

ဦးကျော်မြင့်သည် ရွေးကောက်ပွဲအတွင်း မဲအနိုင်ရရေးအတွက် သူ့ထံ မဲထည့်ပါက ငါးနှစ် ဘိန်းစိုက်ပျိုးခွင့် ပြုမည်ဟု မဲဆွယ်စည်းရုံးခဲ့သလို၊ ဘိန်းခင်းများ မဖျက်ဆီးစေရန် ကာကွယ်ပေးမည်ဟုလည်း ကတိပေးခဲ့သည်ဟု အစီရင်ခံစာ တွင် ပါရှိသည်။

နမ့်ခမ်းရှိ အသက် ၁၅ နှစ်နှင့် အထက်အရွယ်ရှိ မူးယစ်ဆေးဝါးသုံးစွဲသူ ယမန်နှစ်က ဦးရေ ၇၅ဝ တွင် ၆၈ ရာခိုင်နှုန်း ရှိရာမှ ယခုနှစ်အတွင်း ၁,၂ဝဝ ဦးတွင် ၉၁ ရာခိုင်နှုန်းအထိ တိုးမြင့်လာသည်ဟုလည်း အစီရင်ခံစာတွင် ပါရှိသည်။

PWO က ယမန်နှစ်ဆန်းမှ ယခုလနှစ် ဇူလိုင်လကုန်အထိ နှစ်နှစ်ခန်ကြာ ဒေသခံရွာသားများ၊ မူးယစ်ဆေး သုံးစွဲသူ များ၊ ကျေးရွာဥက္ကဋ္ဌ၊ ပြည်သူ့ စစ်တပ်ဖွဲ့ဝင်များ လက်တွေ့သွားရောက်တွေ့ဆုံ မေးမြန်း၍ စစ်တမ်း ကောက်ယူခဲ့ခြင်း
ဖြစ်သည်ဟု ဆိုသည်။

ပန်းဆေး၊ တာဂွန်း၊ စတန့်(အပေါ်)၊ စတန့်(အောက်)၊ မန်းပိုး၊ မိုင်းဝီး၊ စန်ခါး၊ မန်းဆပ်၊ ပန်ခါး၊ နမ်းစရီး စသည့်
ကျေးရွာများတွင် ဘိန်းအများဆုံး စိုက်ပျိုးသည့် ရွာကြီးများ ဖြစ်ပြီး တအိမ်ထောင်လျှင် အနည်းဆုံး သုံး ဧကခန့် စိုက်ပျိုးနိုင်ပြီး စီးပွားရေးအရ စိုက်ပျိုးသူများမှာ အနည်းဆုံး ၁ဝ ဧကထိ စိုက်ပျိုးကြသည်ဟု သိရသည်။

နမ့်ခမ်းမြို့နယ်အတွင်း ဘိန်းစိုက်ပျိုးမှု တိုးမြင့်လာသည်ဟု သိရှိသော်လည်း တအောင်း(ပလောင်)အမျိုးသားပါတီ TNP မှ လက်တွေ့ ကွင်းဆင်းလေ့လာချိန် မရသေးသဖြင့် မည်မျှ တိုးမြင့်သည်ဟု မရှိရသေးကြောင်း ပါတီ၏ အထွေထွေ အတွင်းရေးမှူး ဦးမိုင်အုန်းခိုင်က ပြောသည်။

"ဘိန်းစိုက်မှု အခြေအနေ ပိုများလာတယ်လို့တော့ ကြားနေတာပဲ။ ဒါပေမယ့် ကျနော်တို့အနေနဲ့ ကွင်းဆင်းပြီးတော့ မလေ့လာမိသေးဘူး။ ကျနော်တို့ ပါတီအနေနဲ့တော့ မူးယစ်ဆေးဝါးနဲ့ ပတ်သက်တာ ဘယ်လိုလုပ်ရင်ကောင်းမလဲ ဆိုပြီး ညှိနှိုင်းနေတုန်းပါ" ဟု သူက မဇ္စျိမကို ပြောသည်။

TNP ပါတီသည် ရွေးကောက်ပွဲတွင် ရှမ်းပြည်နယ်တွင် ငါးမြို့နယ်ဝင်ပြိုင်ခဲ့ရာမှ နမ့်ခမ်း၊ ကွတ်ခိုင်၊ ကျောက်မဲ စသည့် မြို့နယ်များတွင် ရှုံးနှိမ့်ခဲ့ပြီး မန်တုန်နှင့် နမ့်ဆန်မြို့နယ် နှစ်ခုသာ အနိုင်ရခဲ့သည်။

လက်ရှိ ပလောင်လူမျိုးများ၏ အဓိက အသက်မွေးဝမ်းကျောင်းတခုဖြစ်သော လက်ဖက်စိုက်ပျိုးရေး လုပ်ငန်းများကို စစ်အစိုးရက ချုပ်ကိုင်ထားပြီး လက်ဖက်ဈေးနှုန်းများ ကျသွားခဲ့သည်ကလည်း ပလောင်ပြည်သူများ ဘိန်းစိုက်ပျိုးမှု ပိုမို များပြားလာသည့် အကြောင်းအရင်းတရပ်ဖြစ်သည်ဟု PWO က ဆိုသည်။

စစ်အစိုးရအာဏာပိုင်များက မူးယစ်ဆေးဝါး ရောင်းဝယ်သူ ဖမ်းဆီးခြင်း မပြုဘဲ မူးယစ်ဆေးဝါး သုံးစွဲသူများကိုသာ ဖမ်းဆီးခဲ့သော်လည်း လာဘ်ယူ၍ ပြန်လည် လွှတ်ပေးလျက် ရှိနေပြီး ရဲတပ်ဖွဲ့နှင့် ပြည်သူ့စစ်တပ်ဖွဲ့များက ဖမ်းဆီး ခံရသူ တဦးအနည်းဆုံး တသိန်းခွဲမှ အများဆုံး နှစ်သိန်းခွဲထိပေး၍ ပြန်လည် လွှတ်ပေးခဲ့မှုများ ရှိသည်ဟု ဖော်ပြ ထားသည်။

ဘိန်းစိုက်ရာသီမှာ သြဂုတ်လတွင် ဘိန်းစိုက်ပျုိး၍ ဖေဖော်ဝါရီလနှင့် ဧပြီလအတွင်း ဘိန်းခြစ်သည့် ရာသီဖြစ်ပြီး ဘိန်းမခြစ်မီ ဒီဇင်ဘာလတွင် အာဏာပိုင်များက အခွန်ကောက်ခံချိန်ဖြစ်ပြီး ဘိန်းတိုက်ဖျက်ရေးအဖွဲ့ လာရောက် ပါက ဘိန်းစိုက်တောင်သူများမှ အခွန်အဖြစ် တအိမ်ထောင်လျှင် အနည်းဆုံး ၁၅,၀၀၀ ကျပ် လာဘ်ထိုးရလေ့ ရှိသည်ဟု ဆိုသည်။

ပြည်သူ့စစ်အင်အား ၄၀၀ ခန့်ကို ဦးဆောင်းခဲ့သူ အသက် ၅၀ ကျော်အရွယ် တရုတ်-ဗမာလူမျိုး ဦးကျော်မြင့်သည် အစိုးရ၏ သောင်းကျန်းသူဆန့်ကျင်ရေး ပြည်သူ့စစ်တပ်ဖွဲ့၏ ခေါင်းဆောင်တဦးဖြစ်ခဲ့ပြီး နမ့်ခမ်းမြို့နယ် ပန်းဆေး နယ်မြေအတွင်း ဘိန်းစိုက်ပျိုးမှုနှင့် ဘိန်းကုန်ကူးသည့် လုပ်ငန်းများကို ဆယ်စုနှစ်ကျော်ကြာ ချုပ်ခိုင်ခဲ့သူ ဖြစ်သည်။ ၂ဝ၁ဝ ရွေးကောက်ပွဲ ဝင်ပြိုင်ခဲ့ရမှ လက်ရှိ သူ၏ ညီဖြစ်သူ ဦးကျော်ထွေးက ဆက်လက် တာဝန်ယူနေသည်ဟု သိရသည်။

၂ဝဝ၉ ခုနှစ်က ကုလသမဂ္ဂ မူးယစ်ဆေးဝါးနှင့် ရာဇဝတ်မှုဆိုင်ရာရုံးစစ်တမ်း UNODC တွင် ရှမ်းပြည်မြောက်ပိုင်း
ကျေးရွာ ၂၃ ရွာတွင် ဘိန်းစိုက်ပျိုးမှု ၁,၆ဝဝ ဟတ်တာ ရှိခဲ့ပြီး ၂ဝ၁ဝ ခုနှစ်တွင် ၃,၇ဝဝ ဟတ်တာသို့ မြင့်တက်လာ သည်ဟု ဆိုထားသည်။

သို့သော် PWO က နမ့်ခမ်းမြို့နယ်တခုတည်း၏ စစ်တမ်းအရ ယခုနှစ်မှာ ၈၉၂ ဟတ်တာရှိသဖြင့် UNODC ၏ အချက်အလက်နှင့် ကွဲလွဲနေကာ ယင်းတို့၏ စစ်တမ်းများသည် အစိုးရ၏ အချက်အလက်များဖြစ်၍ သီးခြား လွတ်လပ်သည်ဟု မဆိုနိုင်ကြောင်း ထည့်သွင်းဖော်ပြထားသည်။