2011-12-10
ဒေါ်အောင်ဆန်းစုကြည် ကြိုးပမ်းဆောင်ရွက်နေတဲ့ ငြိမ်းချမ်းရေးပန်းတိုင်ကို တက်လှမ်းနိုင်ရေးအတွက် ဝိုင်းဝန်းပါဝင် ဆောင်ရွက်ကြဖို့ ဒီကနေ့ ကျင်းပတဲ့ ဒေါ်အောင်ဆန်းစုကြည်ငြိမ်းချမ်းရေး နိုဘယ်ဆုရရှိခြင်း နှစ် ၂ဝ ပြည့် အခမ်းအနားမှာ NLD ပါတီခေါင်းဆောင်တဦးဖြစ်တဲ့ ဦးဝင်းတင်က ပြည်သူကို ပန်ကြားလိုက်ပါတယ်။
၂ဝ၁၁ ခုနှစ် ဒီဇင်ဘာလ ၁ဝ ရက်နေ့က ရန်ကုန် ရွှေညဝါ သာဓု ပရိယတ္တိ စာသင်တိုက်တွင် ပြုလုပ်သည့် ဒေါ်အောင်ဆန်းစုကြည် ငြိမ်းချမ်းရေး နိုဘယ်ဆုရရှိခြင်း နှစ် ၂ဝ ပြည့် အထိမ်းအမှတ် ဂုဏ်ပြုပွဲ အခမ်းအနားတွင် ဒေါ်အောင်ဆန်းစုကြည် မိန့်ခွန်းပြောကြားစဉ်။
ဒီအခမ်းအနားမှာ ဦးဝင်းတင်က… ဒေါ်အောင်ဆန်းစုကြည်ရဲ့ ဆောင်ရွက်ချက်တွေကို ပြည်သူက အသိအမှတ်ပြုခဲ့ပြီး ဖြစ်သလို ကမ္ဘာကလည်း အသိအမှတ် ပြုတာကြောင့် ငြိမ်းချမ်းရေးနိုဘယ်ဆုကို ချီးမြှင့်ခံရတာလို့ ဆိုပါတယ်။ ဒေါ်အောင်ဆန်းစုကြည်ရဲ့ ငြိမ်းချမ်းရေး ဆောင်ရွက်ချက်တွေကို ဝိုင်းဝန်းကြဖို့ ဦးဝင်းတင်က အခုလို ပြောပါတယ်။
“ဒေါ်အောင်ဆန်းစုကြည်က ငြိမ်းချမ်းရေးပန်းတိုင်ကို ချီတက်နေတဲ့ လှေကြီးကို ပဲ့ကိုင်ပြီး လှော်ခတ်နေတဲ့အချိန်မှာ ပြည်သူပေါင်းများစွာ လူငယ်ကျောင်းသားများစွာ ပါဝင် လှော်ခတ်နေကြ သလိုပဲ တချို့သော ပုဂ္ဂိုလ်များဟာ မိမိတို့ဆန္ဒအလျောက် ကြိုးပမ်းနေကြတဲ့ ပုဂ္ဂိုလ်များလည်း ရှိပါတယ်။ ဘာနဲ့တူလဲ ဆိုတော့ လှေကြီးပေါ်ကနေပြီးတော့ ဘေးမှာဆင်းပြီး ရေကူးလိုက်နေတဲ့ ပုဂ္ဂိုလ်များလည်း ရှိပါတယ်။ အဲဒီတော့ ကျနော်တို့ မေတ္တာရပ်ခံ တိုက်တွန်းချင်တာက စောစောက ဒေါ်အောင်ဆန်းစုကြည် ပြောခဲ့တဲ့အတိုင်းပဲ ဒီ ငြိမ်းချမ်းရေးခရီးအတွက် လှေကြီးကို လှော်ခတ်မြဲ ဖြစ်ပါတယ်၊ လှေပေါ်မှာလည်း ပြည်သူတွေ၊ ကျောင်းသားလူငယ်တွေ၊ ရဟန်းသံဃာတွေ အားလုံး ပါဝင်ပြီး လှော်ခတ်နေကြပါတယ်၊ အဲဒီအချိန်မှာ ဘေးကနေပြီး မိမိတို့ရဲ့ ဆန္ဒ၊ ဆုံးဖြတ်ချက်၊ သဘောထားအတိုင်း ရေကူးပြီး သွားနေတဲ့ ပုဂ္ဂိုလ်များကိုလည်း လှေပေါ်တက်ပြီးတော့ တစုတဝေးထဲ ငြိမ်းချမ်းရေးပန်းတိုင် ရောက်အောင် ဒေါ်အောင်ဆန်းစုကြည်ရဲ့ ဦးဆောင်မှုအောက်ကနေ လှော်ခတ်သွားကြပါလို့ ကျနော်တိုက်တွန်းရင်း နိဂုံးချုပ်ပါတယ်”
ဒီအခမ်းအနားကို ဒေါ်အောင်ဆန်းစုကြည် ငြိမ်းချမ်းရေး နိုဘယ်ဆု ရရှိချိန် ၁၉၉၁ ခုနှစ်က ဆုလက်ခံ ယူနိုင်ရေးအတွက် ဒေါ်အောင်ဆန်းစုကြည်ကို နေအိမ်အကျယ်ချုပ်က လွှတ်ပေးဖို့ ဆန္ဒပြတောင်းဆိုခဲ့တဲ့ အတွက် ဖမ်းဆီး အကျဉ်းချခံခဲ့ရတဲ့ 10/D ကျောင်းသားအဖွဲ့က ကြီးမှူးကျင်းပခဲ့တာပါ။
အခမ်းအနား မကျင်းပခင် ဒေါ်အောင်ဆန်းစုကြည်က ရွှေညဝါ ဆရာတော်ရဲ့ ရန်ကုန် ဗုဒ္ဓတက္ကသိုလ် ပိဋကတ်စာကြည့်တိုက်ကို ဖဲကြိုးဖြတ် ဖွင့်လှစ်ပေးတယ်လို့ အခမ်းအနား ကျင်းပရေး တာဝန်ခံတဦးဖြစ်တဲ့ ကိုကိုကြီး (စမ်းချောင်း) က ပြောပါတယ်။
အခမ်းအနားကို နိုင်ငံခြားသံတမန်တွေ၊ ကျောင်းသားတွေ၊ နိုင်ငံရေး ပါတီတွေနဲ့ စိတ်ဝင်စားသူ ပြည်သူတွေ စုစုပေါင်း ၁ ထောင်ကျော် တက်ရောက်ခဲ့ပါတယ်။ (RFA)
ငြိမ်းချမ်းပြီး လူ့အခွင့်အရေး ပြည့်ဝတဲ့ ဒီမိုကရေစီနိုင်ငံကို ရောက်ရှိအောင် ၀ိုင်းဝန်းဆောင်ရွက်ကြဖို့ ဒေါ်အောင်ဆန်းစုကြည်က“ကျမတို့ခေတ်မှာ အရင်ခေတ်အဆက်ဆက်က မရခဲ့တဲ့ငြိမ်းချမ်းရေးကို ရအောင်လုပ်နိုင်ဖို့ အခွင့်အရေး ရနေပြီဆိုတဲ့ စိတ်တွေထားပြီးတော့ ဒီအခွင့်အရေးကို လက်မလွှတ်တမ်းဆုပ်ကိုင်ဖို့ အရေးကြီးပါတယ်။ အခွင့်အရေးဆိုတာ တခါတလေ တော်တော်နဲ့ ပြန်မလာတတ်ပါဘူး။ လာတဲ့အခါမှာ ရအောင်ဆုပ်ကိုင်ရမယ်။ ဒီအခွင့်အရေးကို အများအကျိုးအတွက်ဖြစ်အောင်လို့ သုံးစွဲသွားရမယ်။ အဲဒီလိုစိတ်နဲ့ ကျမတို့အားလုံး ဆက်ပြီးတော့ သွားနိုင်လို့ရှိရင် ကျမတို့ရဲ့ နိုင်ငံထဲမှာ မကြာမီကာလမှာ အားလုံးလိုချင်တဲ့ ငြိမ်းချမ်းတဲ့ လူ့အခွင့်အရေးကို အပြည့်အ၀ အကာအကွယ်ပေးတဲ့ ဒီမိုကရေစီနိုင်ငံတစ်ခု ဖြစ်လာမှာပါ။”
မြန်မာနိုင်ငံရဲ့ မှတ်တမ်းတင် သမိုင်းကာလ နှစ်ပေါင်း ၁,၀၀၀ ကျော်မှာ ငြိမ်းချမ်းတဲ့ကာလက နှစ်ပေါင်း ၇၀ လောက်ပဲ ရှိခဲ့တယ်လို့ သမိုင်းဆရာ ဒေါက်တာ တိုးလားက သူ့ရဲ့ ဆောင်းပါးတစ်ပုဒ်မှာ ပြောခဲ့ဖူးပါတယ်။ အဲဒီအဖြစ်ကနေ မြန်မာနိုင်ငံ ရုန်းထွက်နိုင်ပြီး ပြည်သူတွေ အိပ်ကောင်းခြင်းအိပ်ရ၊ နိုးကောင်းခြင်းနိုးရတဲ့ ဘ၀မျိုးကို ဒေါ်အောင်ဆန်းစုကြည်က မျှော်မှန်းပြောကြားပါတယ်။
“အိပ်တဲ့အခါမှာ အေးအေးချမ်းချမ်းနဲ့ လုံလုံခြုံခြုံနဲ့ အိမ်နိုင်တယ်၊ နိုးတဲ့အခါမှာလည်း ဒီအတိုင်းပဲဖြစ်ရမယ်။ နိုးလာပြီ၊ နိုးနိုးချင်း ဒီနေ့တော့ ဘာဖြစ်ဦးမှာလဲ။ ဘယ်သူက ဘာလုပ်ဦးမှာလဲ၊ ဘယ်သူကနေ အနိုင်ကျင့်ဦးမှာလဲ၊ ဒီနေ့ဝမ်းစာကို ဘယ်လိုရှာရဦးမှာလဲ၊ ဒီလို ပူပင်သောကတွေ ဘာမှမရှိဘဲနဲ့ နိုးရခြင်းဟာ ဒါ ငြိမ်းချမ်းရေးရဲ့ အရသာပဲ။ နိုးတဲ့အခါမှာလည်း ချမ်းသာရတယ်။ ဒီတော့ ကျမတို့နိုင်ငံ တနိုင်ငံလုံးကို ငြိမ်းချမ်းစေချင်တယ်ဆိုတာ ဒါပါပဲ။ ကျမတို့ရဲ့ ပြည်သူပြည်သားအားလုံး အထူးသဖြင့် အခုချိန်မှာဆိုလို့ရှိရင် စစ်မက်တွေကြောင့် စစ်နဲ့ဆိုင်တဲ့ကိစ္စတွေ၊ အပစ်အခတ်တွေကြောင့်မိုလို့ ရန်ပွားမှုတွေကြောင့်မိုလို့ အေးအေးချမ်းချမ်း မနေရတဲ့ ကျမတို့ရဲ့ တိုင်းရင်းသားတွေကို အထူး ကျမ စဉ်စားမိပါတယ်။”
ဒေါ်အောင်ဆန်းစုကြည်က အဲဒီအတိတ်က အဖျက်သဘောဆောင်ခဲ့တဲ့ လုပ်ရပ်တွေကို ပစ္စုပ္ပန်နဲ့ အနာဂတ် အတွက် အပြုသဘောဆောင်တဲ့ လုပ်ရပ်တွေအဖြစ် အားလုံးကပြောင်းလဲကြဖို့ တိုက်တွန်းလိုက်ပါတယ်။
“အဓိက အကုသိုလ်တွေကို အခု ပစ္စုပ္ပန်နဲ့ အနာဂတ် အတွက် ကုသိုလ်တွေဖြစ်အောင်လို့ ကျမတို့ ကြိုးစားရမယ်။ အဲဒီလိုလုပ်ခြင်းမှသာလျင် ကျမတို့ပြည်သူတွေ အားလုံးလိုချင်တဲ့ ငြိမ်းချမ်းရေး ပန်းတိုင်ဆီကို ကျမတို့ လျောလျောရှူရှူ နိုင်မယ်။”
ဒါ့အပြင် မေတ္တာ၊ ဂရုဏာစိတ်ဓါတ်အပြင် မုဒိတာစိတ်နဲ့ မြန်မာနိုင်ငံကို တည်ဆောက်ကြဖို့လည်း တိုက်တွန်းသွားပါတယ်။
“တစ်ဦးအပေါ်တစ်ဦး မေတ္တာ၊ ဂရုဏာတင်သာမက မုဒိတာပွားပြီးတော့ ကျမတို့အထဲက တိုးတက်နိုင်တာ မှန်သမျှအတွက် အားလုံးက ၀ိုင်းပြီးတော့ ဂုဏ်ယူပြီးတော့ ကိုယ်လည်း ဒီလိုပဲ တတ်နိုင်သမျှ တိုးတက်အောင် လုပ်မယ်လို့ စိတ်တွေနဲ့ ကျမတို့ လုပ်သွားမယ်ဆိုရင် ငြိမ်းချမ်းရေးပန်းတိုင်ဟာ သိပ်ပြီးတော့ ဝေးမှာ မဟုတ်ပါဘူး။ ငြိမ်းချမ်းရေးပန်းတိုင်ဟာ ထင်သလောက် ခက်မှာမဟုတ်ပါဘူး။” (VOA)
No comments:
Post a Comment